16 எம்.பி.க்களில் சிலர் மட்டுமே பங்கேற்பு சு.க.வின் மேடையில் ஏறிய வரதராஜப்பெருமாள்

16 எம்.பி.க்களில் சிலர் மட்டுமே பங்கேற்பு சு.க.வின் மேடையில் ஏறிய வரதராஜப்பெருமாள்

(ஆர்.யசி)

பிரதி அமைச்சர் அலிஸாஹிர் மௌலானாவும் ஆதரவாளர்களுடன் கலந்துகொண்டார்
மட்டக்களப்பில் நேற்று நடைபெற்ற ஜனாதிபதி மைத்திரிபால சிறிசேனவின் தலைமையிலான ஸ்ரீலங்கா சுதந்திர கட்சியின் மே தினக் கூட்டத்தில் முன்னாள் வடகிழக்கு முதல்வர் வரதராஜப்பெருமாள் பங்கேற்றிருந்தார். எனினும் ஸ்ரீலங்கா சுதந்திர கட்சியின் ரணில் எதிர்ப்பு அணியினர் பங்கேற்பதாக வாக்குறுதியளித்தும் பலரும் கூட்டத்தை புறக்கணித்தனர். இருந்தபோதிலும் ரணில் எதிர்ப்பு குழுவின்  முக்கியஸ்தர் எஸ்.பி. திசாநாயக்க இந்தக் கூட்டத்தில் கலந்துகொண்டிருந்தார்.  

ஸ்ரீலங்கா சுதந்திர கட்சியின் மே தினக் கூட்டம் நேற்று மட்டக்களப்பு செங்கலடியில் ஜனாதிபதி மைத்திரபால சிறிசேனவின் தலைமையில் இடம்பெற்றது. நேற்று பிற்பகல் ஒரு மணியளவில் செங்கலடியில் ஊர்வலத்துடன் ஆரம்பிக்கப்பட்டு பிற்பகல் நான்கு மணியளவில் பொதுக் கூட்டம் நடத்தப்பட்டது.

ஸ்ரீலங்கா சுதந்திர கட்சியின் பாராளுமன்ற உறுப்பினர்கள், தொழிற்சங்கங்கள், சிவில் அமைப்புகள் ஆகியவற்றின் பிரதிநிதிகள் மற்றும் பெருந்திரளான ஆதரவாளர்கள் என அனைவரும் கலந்துகொண்டிருந்தனர்.

ரணில் எதிர்ப்பு அணியினரின் பின்வாங்கல்
கடந்த காலத்தில் தேசிய அரசாங்கத்தில் இருந்து நெருக்கடிகளை ஏற்படுத்தி பின்னர் தேசிய அரசாங்கத்தை விட்டு வெளியேறிய ஸ்ரீலங்கா சுதந்திர கட்சியின் ரணில் எதிர்ப்பு அணியின் 16 உறுப்பினர்களும் நேற்றைய ஸ்ரீலங்கா சுதந்திர கட்சியின் மே தினக் கூட்டத்தில் கலந்துகொள்வார்கள் என தெரிவிக்கப்பட்டிருந்த போதிலும் பல்வேறு சந்தர்ப்பங்களில் தான் மே தினக் கூட்டத்தில் கலந்துகொள்வோம் என கூறிய போதிலும் நேற்றைய கூட்டத்தில் அவர்களின் பலர் கலந்துகொள்ளவில்லை. முன்னாள் அமைச்சர் எஸ்.பி.திசாநாயக மாத்திரம் கலந்துகொண்டிருந்தார்.     

சு.க. கூட்டத்தில் வரதராஜ பெருமாள்.

இதேவேளை நேற்றைய ஸ்ரீலங்கா சுதந்திர கட்சியின் மே தினக் கூட்டத்தில் முன்னாள் வடக்கு கிழக்கு முதல்வர் வரதராஜ பெருமாள் கலந்துகொண்டு உரையாற்றியிருந்தார். பலராலும் எதிர்பார்க்கப்படாத நிலையில் அவர் நேற்றைய தினம் ஸ்ரீலங்கா சுதந்திர கட்சியின் மே தினக் கூட்டத்தில் பங்கு கொண்டிருந்தமை விசேட அமசமாகும்.

இந்த கூட்டத்தில் கலந்துகொண்ட அவர் உரையாற்றுகையில் மிக நீண்டகாலத்திற்கு பின்னர் நான் இன்று இங்கே மேடையேறியுள்ளேன். மே தினத்தில் ஜனாதிபதி தலைமையில் இன்று நானும் இணைந்துள்ளேன். இரண்டு நாட்களுக்கு முன்னர்தான் இந்த உலகத்தில் புரட்சி புயல்களை உருவாக்கிய காரல்மார்க்ஸ் இறந்து இருநூறு ஆண்டுகள் கடந்தது. அதனை மறந்துவிடக்கூடாது. அங்கிருந்து ஆரம்பிக்கும் தொழிலாளர் புரட்சிகள் இன்றும் ஏதோவொரு நோக்கத்தை அடிப்படையாகக் கொண்டு இயங்கி வருகின்றது.

இந்த உலகத்தில் 1 வீதமான ஆதிக்க வாதிகளுடன் 80 வீதமான சொத்துக்கள் உள்ளன. மிச்சமுள்ள சொற்ப வளங்களை வைத்துக்கொண்டுதான் ஏனைய மக்கள் வாழவேண்டிய நிலைமை ஏற்பட்டுள்ளது. எமது நாடும் எல்லா வளங்களும் உள்ள நாடாகும். இந்த உலகத்தை படைத்த கடவுள் தனக்காக இலங்கையை படைத்தான் என்று கூறுவதில் தவறில்லை, ஆனால் நாம் தான் அதனை அழித்து வருகின்றோம். 60 வீதமான நீர்வளம் எம்முடம் உள்ளது ஆனால் தொழில் துறையில் நாங்கள் பின்தங்கியுள்ளோம். ஆகவே நாம் நிலைமைகளை மாற்றியமைக்க வேண்டும். இன மத மொழி பேதத்திற்கு அப்பால் நாம் இணைந்து செயற்பட வேண்டும் எனவும் குறிப்பிட்டிருந்தார்.