ஆட்சியை கவிழ்க்க ரணில் தீவிர முயற்சி -ஜோதிட எதிர்வு கூறலுக்கமைய காய்நகர்த்தல்

ஆட்சியை கவிழ்க்க ரணில் தீவிர முயற்சி -ஜோதிட எதிர்வு கூறலுக்கமைய காய்நகர்த்தல்

[15 - April - 2007] [Font Size - A - A - A]

யுத்தத்தின் பிடியில் சிக்கியுள்ள இலங்கையில் புதிய அரசியல் மோதலொன்று உருவாகி வருகின்றது.

எதிர்க் கட்சித் தலைவர் ரணில் விக்கிரமசிங்கவின் இராஜ யோகத்திற்கும் ஜனாதிபதி மகிந்த ராஜபக்‌ஷவின் ராஜ்ய நிர்வாகத்திற்குமிடையிலான மோதலே இப்புதியதொன்று என்று ஆய்வாளர்கள் சுட்டிக் காட்டுகின்றனர்.

ஏப்ரல் நடுப்பகுதியிலிருந்து ஆட்சிப் பொறுப்பு கிடைக்கும் என்ற ஜோதிடர்களின் ஆரூடத்தினால் உற்சாகமடைந்துள்ள எதிர்க்கட்சித் தலைவர் அடுத்தமாதமளவில் ஜனாதிபதி மகிந்த ராஜபக்‌ஷவின் அரசாங்கத்தை கவிழ்ப்பதற்கான பல முயற்சிகளில் ஈடுபட்டுள்ளார்.

பல விவகாரங்கள் குறித்து வெளிப்படையாகப் பேசிவரும் அவர், தனது கட்சி பாராளுமன்ற உறுப்பினர்களை மே மாதத்தில் நாட்டை விட்டுச் செல்ல வேண்டாமென கேட்டுள்ளார்.

எனினும், தற்போதைய யதார்த்தத்தை கருத்தில் கொள்ளும்போது ரணில் விக்கிரமசிங்கவின் கனவுகள் அர்த்தமற்றவை என்கின்றனர் அனுபவமிக்க அரசியல் ஆய்வாளர்கள். யுத்தம், தேசிய பாதுகாப்பு மற்றும் நாட்டின் இறைமை போன்ற விவகாரங்களில் பெரும்பான்மை சிங்களவர்களின் முழுமையான ஆதரவு அரசாங்கத்துக்கு உள்ளது என்கின்றனர்.

அதிகரித்துவரும் அத்தியா வசியப் பொருட்களின் விலை, கொழும்பில் தமிழர்கள் கடத்தப்படுதல், கிழக்கு மாகாணத்தில் இலட்சக்கணக்கான தமிழர்கள் இடம்பெயர்ந்துள்ளமை, மனித உரிமை விவகாரத்தில் சர்வதேச சமூகத்திடமிருந்து தனிமைப்படுத்தப்பட்டுள்ளமை, இராணுவ தந்திரோபாயத்தில் காணப்படும் தவறுகள் போன்றவை அரசாங்கத்தை கவிழ்ப்பதற்கு போதுமானது என்று எதிர்க்கட்சித் தலைவர் கருதுகின்றார்.

மேலும், விலையதிகரிப்பு, கட்டுநாயக்க விமானத்தளம் மீதான விடுதலைப் புலிகளின் விமானத் தாக்குதல் போன்றவற்றை அடிப்படையாக வைத்து தேசிய பாதுகாப்பு மற்றும் அத்தியாவசியப் பொருட்களின் விலையதிகரிப்பு போன்றவை குறித்து கவலையடைந்துள்ள சிங்கள பெரும்பான்மையை தனது பக்கம் வெல்வதற்கு ரணில் விக்கிரமசிங்க எதிர்பார்த்துள்ளார்.

கட்டுநாயக்க விமானத் தளம் குறித்து அரசாங்கம் பொறுப்பற்று நடந்து கொண்டதாக தெரிவிக்கும் அவர், ஜனாதிபதியின் சகோதரர் கோதாபய ராஜபக்‌ஷவுக்கு பதில் முன்னாள் இராணுவ அதிகாரியும், கடும்போக்கு தேசியவாதியுமான ஜானக பெரேராவை பாதுகாப்பு அமைச்சின் செயலாளராக நியமிக்க வேண்டும் என்கிறார் ரணில் விக்கிரமசிங்க. ஆட்கடத்தலையும் கப்பம் பெறுவதையும் தடுத்து நிறுத்தப் போவதாக சிறுபான்மை தமிழ் சமூகத்திடம் உறுதியளித்துள்ளார்.

இலங்கை கிரிக்கெட் அணி நாட்டிற்கு நற்பெயரை ஏற்படுத்திக் கொடுப்பதற்கு முயற்சிகளை மேற்கொண்டுள்ள தருணத்தில், ராஜபக்‌ஷ அரசாங்கம் தனது மனித உரிமை மீறல்கள் மூலம் நாட்டிற்கு அவப்பெயரை ஏற்படுத்த முயல்வதாக அவர் குற்றம்சாட்டியுள்ளார்.

ஐக்கிய தேசியக் கட்சியிலிருந்து அரசாங்கத்தில் இணைந்துகொண்ட 18 பாராளுமன்ற உறுப்பினர்களும் மகிந்த அரசாங்கத்தை எதிர்த்து அதிலிருந்து விலகுவார்கள் என ரணில் எதிர்பார்க்கின்றார்.

அவர்களுக்கு அமைச்சர் பதவி வழங்கப்பட்டுள்ளபோதிலும் போதிய அதிகாரம் வழங்கப்படவில்லை.

சமீபத்தில் எட்வேட் குணசேகர மீண்டும் இணைந்துள்ளமை மேலும் பலர் இணையக்கூடும் என்ற நம்பிக்கையை அவருக்கு அளித்துள்ளது.

மூலம் - தினக்குரல்