பாகிஸ்தானில் மதத்தையும் கடவுளையும் பழித்தால் இதுதான் நடக்கும்

துண்டிக்கப்பட்ட கையை ஒரு தட்டில் வைத்து, வெள்ளைத் துணியால் மூடி, மதகுருவிடம் மன்னிப்பு கேட்பதற்காக மசூதியில் கொடுத்தான்.

அடுத்த சில நாட்களில், இறை தூதர் மீது அவன் கொண்டிருந்த பற்றுதலைப் பாராட்டுவதற்காக அருகிலுள்ள கிராமங்கள் மர்றும் நகரங்களில் இருந்து நிறைய பேர் காதீரை தேடி வந்தார்கள்.

இரண்டு ஆண்டுகள் ஓடிவிட்டது. இப்போது உள்ளூர் மதரஸாவில் குரான் படிப்பதில் பெரும்பாலான நேரத்தை அவன் செலவிடுகிறான்.

ஆனால், இதில் எந்த வருத்தமும் இல்லை என்று தொடர்ந்து கூறுகிறான்.

''மக்கள் என்ன சொல்கிறார்கள் என்பது பற்றி எனக்குக் கவலையில்லை. எனக்கும், இறைதூதருக்கும் இடையிலுள்ள விஷயம் இது. உங்களால் அதைப் புரிந்து கொள்ள முடியாது,'' என்று அவன் தெரிவித்தான்.

அத்தியாயம் 5: சுதந்திரம்

லாகூரில் வரலாற்று முக்கியத்துவம் வாய்ந்த மால் சாலையில், மற்ற கட்டடங்களைவிட லாகூர் உயர் நீதிமன்றம் உயர்ந்து நிற்கிறது.

சிவப்பு செங்கற்களால் கட்டப்பட்டு, உயரத்தில் அரைக்கோள வடிவத்தில் வெள்ளை கோபுரம் உள்ள அந்தக் கட்டடம், கடந்த காலனி ஆதிக்க காலத்தை நினைவுபடுத்தும் அடையாளங்களில் ஒன்றாக இருக்கிறது.

உயர் நீதிமன்றத்தைச் சுற்றிலும், குறுகிய நடைபாதைகளில் பல வழக்கறிஞர்களின் அறைகள் உள்ளன. பெரும்பாலும் குப்பைகள் நிறைந்து அழுக்காக, நெரிசலாக இருக்கும்.

உயர் நீதிமன்றத்துக்குப் பின்புறம் ஒரு சிறிய வணிக வளாகத்தில், பரபரப்பாக இயங்கும் ஒரு தேநீர் கடைக்கு மேலே, வழக்கறிஞர் குலாம் முஸ்தபா சௌத்ரியின் அறை உள்ளது.

Image caption வழக்கறிஞர் குலாம் முஸ்தபா சௌத்ரி

கஹாட்டம்-இ-நபுவத் என்ற மத துவேஷத்துக்கு எதிரான வழக்கறிஞர் அமைப்பின் தலைவராக சவுத்ரி உள்ளார். ``இறைதூதரின் முழுமைநிலை'' என்று அர்த்தமாகும் வகையில் இந்தப் பெயர் வைக்கப் பட்டுள்ளது. மது துவேஷ வழக்கு தொடரும் எந்த முஸ்லிமுக்கும் இந்த அமைப்பு இலவச சட்ட உதவி அளிக்கிறது.

நாடு முழுக்க 800 தன்னார்வலர் வழக்கறிஞர்கள் இந்த அமைப்பில் இருக்கிறார்கள்.

``நாட்டில் எந்த இடத்தில், இதுபோன்ற (மத துவேஷ) நிகழ்வுகளை எப்போது நாங்கள் கவனித்தாலும், புகார் கொடுத்தவர்களை நாங்கள் அணுகி, இலவச சட்ட உதவிகள் அளிக்கிறோம்'' என்று விளக்குகிறார் சவுத்ரி.

``அல்லாவின் ஆசியை பெறவும், இறைதூதர் முகமது நபியின் பெருமையைப் பாதுகாக்கவும் தான் நாங்கள் இதைச் செய்கிறோமே தவிர, லாப நோக்கம் எதுவும் கிடையாது'' என்று அவர் குறிப்பிட்டார்.

இந்த அமைப்பை ஏறத்தாழ 18 ஆண்டுகளுக்கு முன்பு, வழக்கறிஞராக தொழில் தொடங்கிய உடனே, சவுத்ரி தொடங்கியுள்ளார். இப்போது 50 வயதைக் கடந்துள்ள அவர், தனது லட்சியத்தில் இன்னும் அதிகமான உந்துதல் இருப்பதாகத் தெரிவித்தார்.

''இது மிகவும் துரதிருஷ்டவசமானது - மத துவேஷம் அதிகமாகிவிட்டது. லாகூர் நகரில் மட்டும் மத துவேஷம் தொடர்பாக 40 வழக்குகள் விசாரணையில் உள்ளன.''

''மத துவேஷம் செய்பவர்கள் ஹீரோபோல போற்றப் படுகிறார்கள், இது சோகமான விஷயம்,'' என்கிறார் அவர்.

ஆசியா பீபி வழக்கு எப்படி கையாளப்பட்டது என்பது குறித்து அவர் அதிருப்தி தெரிவித்தார்.

''அந்தப் பெண்மணி இறைதூதரை அவமதித்துள்ளார், ஆனால் மேற்கத்திய நாடுகளுக்கு அவர் ஹீரோ ஆகிவிட்டார்'' என்று அவர் கூறினார்.

Image caption மறு சீராய்வு மனு தள்ளுபடி செய்யப்பட்ட பின்னர், ஊடகங்களிடம் பேசும் அசியா பீபியின் வழங்கறிஞர்.

சல்மான் டசீரை கொலை செய்த முன்னாள் மெய்காப்பாளர் மும்தாஜ் காத்ரி தரப்பில் ஆஜரானவர் சவுத்ரி. மத துவேஷ சட்டமானது ``நல்ல விஷயம்'', உண்மையில் பெருங்கூட்டத்தினரின் நியாயத்துக்கு ``கடும் எதிர்ப்பானது'' என்று அவர் கூறுகிறார்.

''முன்னாள் ஆளுநர் மீது (மத துவேஷ) காவல் துறையில் புகார் கொடுக்க அணுகியிருக்கிறார் மும்தாஜ் காத்ரி. ஆனால் அவருடைய புகார் ஏற்கப்படவில்லை.''

''சட்டம் தன் கடமையைச் செய்திருந்தால், அவர் துப்பாக்கியை கையில் எடுத்திருக்க வேண்டிய கட்டாயம் ஏற்பட்டிருக்காது,'' என்றும் அவர் கூறினார்.

ஆசியாவின் விஷயத்தில், சட்டம் தன் கடமையைச் செய்தது. நாட்டின் மிக உயரிய நீதிமன்றம் வரை சென்றது. அந்தப் பெண்மணியைத் தண்டிப்பதற்குப் எதிராக, போதிய ஆதாரங்கள் இல்லை என்று நீதிமன்றம் கூறியபோதிலும், போராட்டங்கள் வெடித்தன.

Image caption அசியா பீபியின் கணவர் ஆஷிக் மசிக் (இடது), மகள்கள் ஈசா (நடுவில்) மற்றும் இஷாம் (வலது)

அக்டோபர் 31ஆம் தேதி அளித்த வரலாற்று முக்கியத்துவம் வாய்ந்த தீர்ப்பில் நீதிபதிகள் பின்வருமாறு எழுதினர்:

``குற்றஞ்சாட்டப்பட்டவரின் ஆசியா என்ற பெயர் அரபி மொழியில் 'பாவம் நிறைந்தவர்' என்று அர்த்தமாவது எதிர்மறையாக உள்ளது. இருந்தாலும் இப்போதைய சூழ்நிலையில் அவர், ஷேக்பியரின் கிங் லியரில் கூறியபடி 'பாவம் செய்ததைவிட அதிக பாவக் குற்றச்சாட்டுக்கு ஆளானவராக' இருப்பதைப் போலத் தெரிகிறது.

இப்போதும் ஆசியாவின் விடுதலை குறித்து உச்ச நீதிமன்றத்தின் தீர்ப்பை மறுஆய்வு செய்வதற்கு அரசு ஒப்புக்கொண்டது. போராட்டக்காரர்களை கலைந்து போகச் செய்ய வேண்டும் என்று அவர்கள் விரும்பினர். ஆனால், தெஹ்ரிக்-இ- லப்பாய்க் கட்சியினரை பாகிஸ்தான் ஒடுக்கியது.

டி.எல்.பி கட்சியின் ஆவேசமான தலைவர் காதிம் ஹுசேன் ரிஸ்வியை காவல் துறையினர் கைது செய்தனர்.

Image caption காரி சலிம் (இடது) மற்றும் அவரது வழங்கறிஞர் குலாம் முஸ்தபா சௌத்ரி (வலது)

ஆசியாவின் குடும்பத்தினர் சுமார் மூன்று மாத காலம் ரகசிய இடத்தில் தங்கவைக்கப்பட்டனர்; அவரை நீதிமன்றம் விடுதலை செய்தது, ஆனால் அவர் விடுதலை பெறவில்லை.

இறுதியாக மறு ஆய்வு மனுவை உச்ச நீதிமன்றம் ஜனவரி 29 ஆம் தேதி விசாரணைக்கு எடுத்துக் கொண்டது. சில மணி நேரங்கள் விசாரணை நடைபெற்றது. பீபியின் வழக்கில் புகார்தாரரான குவாரி சலீம் தரப்பில் வழக்கறிஞராக குலாம் முஸ்தபா சவுத்ரி ஆஜரானார்.

அசியாவை விடுதலை செய்த தீர்ப்பில் எந்தத் தவறையும் அவரால் சுட்டிக்காட்ட முடியாமல் போனது. மனுவை நிராகரித்த நீதிமன்றம், ஆசியாவை விடுதலை செய்யும் முந்தைய தீர்ப்பை உறுதி செய்தது.