இலங்கைக்கு ஏழு மில்லியன் பவுண்ட்ஸ்

ஆயுத உதவியை பிரிட்டன் வழங்குகிறது. அதைப்பற்றி எவரும் கூச்சலிடவில்லையே என்கிறார் சுரேஷ்

கொழும்பு, மே 9

இலங்கைக்கு ஏழு மில்லியன் பவுண்ட்ஸ் பெறுமதி வாய்ந்த ஆயுதங்கள் மற்றும் யுத்த தளபாடங்கள் போன்றவற்றை வழங்க பிரிட்டிஷ் நாடாளுமன்றில் தீர்மானம் எடுக்கப்பட்டுள்ளதாக தமிழ்த்தேசியக் கூட்டமைப்பின் நாடாளுமன்ற உறுப்பினர் சுரேஷ் பிரேமச்சந்திரன் நேற்று நாடாளுமன்றத்தில் தெரிவித்தார்.

இலங்கைப் பிரச்சினைபற்றி ஆராய்வது தொடர்பாக பிரிட் டிஷ் நாடாளுமன்றம் தீர்மானம் எடுத்தமைபற்றி நேற்று நாடாளு மன்றத்தில் சபை ஒத்திவைப்புவேளை இடம்பெற்ற பிரேரணை விவாதத்தில் கலந்துகொண்டு உரையாற்றிய அவர் மேலும் கூறியதாவது:

இலங்கைப் பிரச்சினையை ஆராய்வதற்கு பிரிட்டன் நாடாளு மன்றம் தீர்மானம் ஒன்றை எடுத்துள்ளது. இது இலங்கையின் இறை மையை மீறும் செயல் என்று சில நாடாளுமன்ற உறுப்பினர்கள் சொல்கின்றனர். ஆனால் இந்தியா, சீனா விற்கு ஆயுதங்களைக் கொள்வனவு செய்ய இலங்கை முயலும்போது இவர்கள் மௌன மாகவுள்ளனர். சமாதானத்தைப் பற்றி இந் நாடுகள் பேசினால் அது இறைமையை மீறும் செயல் என்று கூக்குரலிடுகின்றனர்.

இலங்கைப்பிரச்சினையில் தலையிடுவதெனத் தீர்மானம்எடுக்கப்பட்ட அதே பிரிட்டிஷ் நாடாளுமன்றத்தில் 7 மில்லியன் பவுண்ட்ஸ் பெறுமதிவாய்ந்த ஆயுதங்களை இலங்கைக்கு வழங்குவதெனவும் தீர்மானம் எடுக்கப் பட்டுள்ளது. இதைப்பற்றி யாரும் பேசவில்லை. இங்கு உரையாற்றிய நாடாளுமன்ற உறுப்பினர்களில் எவரேனும் இதுபற்றிப் பேசவில்லை. இந்த ஆயுதங்கள் தமிழர்களைக் கொல்வதற்காகப் பயன்படுத்தப்படும் என்பதற்காகவே இவர்கள் இதுபற்றிப் பேசவில்லை.

உண்மையில் தமிழர்களின் இறைமைதான் இந்த சிங்கள அரசால் மீறப்பட்டுள்ளது. தமிழ்த்தரப்பு அமைதியை வேண்டி பல ஒப்பந்தங்களை சிங்களத் தலைவர்களுடன் செய்தது. அத்தனை ஒப்பந்தங்களையும் சிங்களத் தலைவர்களே கிழித்தெறிந்தனர்.

நிபுணர் குழுவின் அறிக்கை நிராகரிப்பு

அமைதி முயற்சியின் ஒரு கட்டமாக தீர்வுத்திட்டத்தைத் தயாரிக்க அரசு ஒரு நிபுணர்கள் குழுவை அமைத்தது. அந்தக்குழு ஆராய்ந்து முன்வைத்த தீர்வு யோசனையை அரசு நிராகரித்துள்ளது. இப்போது ஸ்ரீலங்கா சுதந்திரக்கட்சி புதிய யோசனையை முன்வைத்துள்ளது. அது பரிசீலனைக்குக் கூட தகுதியில்லாதது. தமிழர்களுக்கு சிங்களத் தலைவர்கள் எதனையும் தரமாட்டார்கள் என்பது உறுதியாகிறது.

இந்த நாட்டில் மனித உரிமை மீறல்கள் என்றும் இல்லாதவாறு அதிகரித்துள்ளன. அதைப்பற்றி சர்வதேச நாடுகள் கேட்டால் சிங்கள அரசியல்வாதிகளுக்குக் கோபம் வருகிறது. அவர்கள் இன்னும் சிங்கள மேலாண்மையுடன் தாமே இந்த நாட்டை ஆளவேண்டும் என்று முற்படுவதே இதற்குக் காரணம். இந்த மனநிலையில் இருந்து சிங்களத் தலைவர்கள் விடுபடவேண்டும். இல்லையேல் பிரச்சினையைத் தீர்க்க முடியாது.

அரசு தமிழர்களை அழித்துக்கொண்டிருக்கிறது. நாம் சிங்களவருடன் சேர்ந்து வாழ வேண்டும் என்று முயற்சித்த போதும் அரசு அதனைக் குழப்பி தமிழர்களை அழித்துக்கொண்டிருக்கிறது. 50 களில் இருந்து தமிழர்கள் அரசின் உதவியுடன் கொன்று குவிக்கப்பட்டனர். இன்று தமிழ் மக்களை பட்டினியால் கொலை செய்கிறது இந்த அரசு. இதன் மாற்றமாகவே தமிழர்களின் போராட்டங்கள் தொடங்கின. "சொட்கண்ணுடனும்', கைத்துப்பாக்கியுடன் தொடங்கிய இப்போராட்டம் கடற்படை, தரைப்படை, 10 விமானங்கள் கொண்ட விமானப்படை ஆகியவற்றை உள்ளடக்கி விரிவடைந்துள்ளது பலமடைந்துள்ளது. இந்த நிலைக்கு அரசுதான் காரணம்.

தமிழர்களின் நியாயமான போராட்டத்தை அரசு அப்போதே விளங்கியிருந்தால் பிரச்சினையை அப்போதே தீர்த்திருக்கலாம். தமிழர்கள் இந்தப் பிரச்சினைகளை அனுபவிக்க பிரிட்டனே முக்கிய காரணம். இப்போதாவது பிரிட்டன் இலங்கை அரசின் மீது கவனம் செலுத்துவதையிட்டு நாம் மகிழ்ச்சியடைகிறோம்.

தமிழர்களின் பிரச்சினைக்குத் ஈடான தீர்வுத் திட்டத்தை அரசு முன்வைக்கா விட்டால் தமிழீழமே தீர்வாக அமையும். அதை யாராலும் தடுக்க முடியாது என்றார்

உதயன்

என்ன கவுக்கப்போறாங்கள் போல இருக்கு?

அரசியல்....அங்கொரு கதை.இங்கொரு கதை...