மட்டக்களப்பில் அகதிமுகாம் மீது கைக்குண்டுத் தாக்குதல்: 10 பேர் காயம்

மட்டக்களப்பில் அகதிமுகாம் மீது கைக்குண்டுத் தாக்குதல்: 10 பேர் காயம்

மட்டக்களப்பு மஞ்சந்தொடுவாய் அகதி முகாம்மீது அடையாளம் தெரியாத நபர் நடத்திய கைக்குண்டுத் தாக்குதல் சம்பவத்தில் 10 பேர் காயமடைந்துள்ளனர்.

இத்தகவலை மட்டக்களப்பு சிறிலங்கா காவல்துறையினர் தெரிவித்துள்ளனர்.

நேற்று முன்தினம் வியாழக்கிழமை இரவு 10.30 மணியளவில் இத்தாக்குதல் நடத்தப்பட்டுள்ளது.

இச்சம்பவத்தில் காயமடைந்த 4 பெண்கள் உட்பட 10 பேர் மட்டக்களப்பு மருத்துவமனையில் சிகிச்சை பெற்று வருகின்றனர்.

நேற்று முன்தினம் இரவு 10.30 மணியளவில் அகதி முகாமில் உள்ள குடும்பத்தினர் கூடாரத்தின் வெளிப்பகுதியில் இருந்து தொலைக்காட்சி நிகழ்ச்சிகளைப் பார்த்துக் கொண்டிருக்கும் வேளையில் அந்த இடத்தில் மறைந்து நின்றதாகக் கூறப்படும் அடையாளம் தெரியாத நபர் ஒருவர் இவர்களை இலக்கு வைத்து கைக்குண்டு ஒன்றினை வீசி விட்டு தப்பிச் சென்றதாக காவல்துறையினர் தெரிவித்தனர்.

இக்குண்டுத் தாக்குதலையடுத்து இந்த அகதி முகாமில் இருந்த மக்கள் பாதுகாப்புத் தேடி நாலாபுறமும் சிதறி ஓடினர்.

இச்சம்பவத்தில்

கணபதிப்பிள்ளை அரசரத்தினம்

வேலாயுதம் சேகர்

சின்னராசா சின்னத்தம்பி

சசிகரன் விஜயகுமாரி

சிவராசா நிர்மலா

சிவராசா சுதாகர்

பாக்கியராசா கலைமதி

தியாகராசா சிவராமன்

மயில்வாகனம் மாலினி

சபாபதி ரஜினிகாந் ஆகியோரே காயமடைந்தவர்களாவர்.

யார், என்ன காரணத்திற்காக இம்மக்கள் மீது கைக்குண்டினை வீசிவிட்டு தப்பிச் சென்றுள்ளனர் என்பது தொடர்பாக காத்தான்குடி காவல்துறையினர் விசாரணைகளை மேற்கொண்டு வருகின்றனர்.

http://www.eelampage.com/