குற்றம் எதுவும் செய்யாமலேயே பதவி நீக்க தீர்மானத்தை எதிர்கொண்டுள்ளேன் – ட்ரம்ப்!

குற்றம் எதுவும் செய்யாமலேயே தான் பதவி நீக்க தீர்மானத்தை எதிர்கொண்டுள்ளதாக அமெரிக்க ஜனாதிபதி டொனால்ட் ட்ரம்ப் தெரிவித்துள்ளார்.

அமெரிக்க நாடாளுமன்றத்தின் பிரதிநிதிகள் சபையில் முன்வைக்கப்பட்டிருந்த குற்றப்பிரேரணை மீதான வாக்கெடுப்பில் டொனால்ட் ட்ரம்ப் தோல்வியடைந்துள்ளார்.

ட்ரம்ப் மீது ஜனநாயகக் கட்சி கண்டன தீர்மானம் கொண்டு வந்தது. இந்த தீர்மானத்தின் மீது நாடாளுமன்றத்தின் பிரதிநிதிகள் சபையில் 14 மணித்தியாலங்கள் விவாதம் நடைபெற்றுள்ளது.

இதனைத் தொடர்ந்து இடம்பெற்ற வாக்கெடுப்பில் டிரம்ப்பை பதவி நீக்கக்கோரும் தீர்மானத்திற்கு ஆதரவாக 230 பேரும், எதிராக 194 பேரும் வாக்களித்துள்ளனர்.

பிரதிநிதிகள் சபையில் நிறைவேற்றப்பட்டுள்ள குறித்த தீர்மானம் செனட் சபையில் விவாதத்திற்கு அனுப்பி வைக்கப்படவுள்ளது.

இந்தநிலையில் இதுகுறித்து மிச்சிகன் பகுதியில் இடம்பெற்ற தேர்தல் பரப்புரைக் கூட்டத்தில் கருத்து வெளியிடும் போதே ட்ரம்ப் இவ்வாறு குறிப்பிட்டுள்ளார்.

ஜனாதிபதி தேர்தலில் தான் வெற்றி பெற கூடாது என்பதற்காக ஜனநாயக கட்சியினர் செய்த சூழ்ச்சி தான் தன் மீதான பதவி நீக்க தீர்மானம் எனவும் ட்ரம்ப் கூறியுள்ளார்.

மக்கள் அவர்களுக்கு தகுந்த பாடம் கற்பிப்பர் என கூறிய ட்ரம்ப், எந்த குற்றமும் செய்யாமல் பதவி நீக்க தீர்மானத்தை எதிர்கொள்ளும் முதல் ஜனாதிபதி தாமே எனவும் தெரிவித்துள்ளார்.

பதவி நீக்க நடவடிக்கைக்கான மாண்பையே ஜனநாயக கட்சியினர் சீர்குலைத்துவிட்டதாகவும் ட்ரம்ப் இதன்போது குற்றம் சுமத்தியுள்ளார்.

http://athavannews.com/குற்றம்-எதுவும்-செய்யாமல/

செனட்டிலும் தீர்மானம் நிறைவேறினால், டிரம்பின் பதவி பறிபோகும்

 

அமெரிக்க ஜனாதிபதி டொனால்ட்  ட்ரம்புக்கு எதிராக அமெரிக்க பாராளுமன்ற பிரதிநிதிகள் சபையில் கொண்டுவரப்பட்ட குற்றவியல் பிரேரணை நிறைவேற்றப்பட்டுள்ளது.

அமெரிக்க ஜனாதிபதி டொனால்ட் டிரம்ப்பை பதவி நீக்கும் தீர்மானம் அடுத்த ஆண்டு ஜனாதிபதித் தேர்தல் நடக்க உள்ள நிலையில் நிறைவேற்றப்பட்டுள்ளது.  இத்தேர்தலில் டொனால் ட்ரம்ப் மீண்டும் போட்டியிடவுள்ளார்.

அமெரிக்காவில் ஜனாதிபதி ட்ரம்ப் தன் சொந்த அரசியல் ஆதாயத்திற்காக அதிகாரத்தைத் தவறாகப் பயன்படுத்தியதாக பல்வேறு குற்றச்சாட்டுக்கள் எழுந்துள்ளன. குறிப்பாக எதிர்க் கட்சியின் ஜனாதிபதி வேட்பாளர் ஜோ பிடனுக்கு எதிராக உக்ரைன் நாட்டில் சதித் திட்டம் தீட்டுவதாகவும், உக்ரைன் ஜனாதிபதியிடம் பிடனுக்கு எதிராக சதி செய்ய பேரம் பேசியதாகவும் குற்றச்சாட்டு முன்வைக்கப்பட்டுள்ளது.

இதையடுத்து ட்ரம்ப் மீதான குற்றச்சாட்டை விசாரிக்க, கடந்த சில நாட்களுக்கு முன் பிரதிநிதிகள் சபை அனுமதியளித்திருந்தது. அதன்படி விசாரணை நடத்தப்பட்டது. விசாரணை முடிந்துள்ள நிலையில், ட்ரம்பை பதவி நீக்கம் செய்வது தொடர்பாக நேற்று அமெரிக்க பாராளுமன்றத்தின் பிரதிநிதிகள் சபையில் தீர்மானம் தாக்கல் செய்யப்பட்டது.

பிரதிநிதிகள் சபையில் ஜனாதிபதி ட்ரம்ப்பை பதவி நீக்கக் கோரும் முதல் தீர்மானம் நிறைவேறியது. இதேபோல் பாராளுமன்ற நடவடிக்கைகளை தடுத்தார் என்ற ட்ரம்புக்கு எதிரான 2 வது தீர்மானமும் நிறைவேறியது.

எனவே, அங்கு ட்ரம்பை பதவி நீக்கம் செய்ய வேண்டுமென்றால் 66 செனட் உறுப்பினர்களின் பலம் தேவை. இதனால் அங்கு ட்ரம்புக்கு எதிரான தீர்மானம் நிறைவேறுவது சந்தேகம் எனவும் ட்ரம்பின் ஜனாதிபதிப் பதவிக்கு உடனடியாக சிக்கல் இல்லை எனவும் கூறப்பட்டது.

எதிர்க் கட்சியான ஜனநாயகக் கட்சி கொண்டு வந்த இந்த தீர்மானத்தின் மீது சுமார் 14 மணி நேரம் விவாதம் நடந்தது. விவாதத்தின் முடிவில் தீர்மானம் மீது வாக்கெடுப்பு நடத்தப்பட்டுள்ளது. இதில், தீர்மானத்திற்கு ஆதரவாக 229 உறுப்பினர்கள் வாக்களித்தனர். 194 உறுப்பினர்கள் மட்டும் தீர்மானத்தை எதிர்த்து வாக்களித்துள்ளனர்.

பிரதிநிதிகள் சபையில் நிறைவேற்றப்பட்ட தீர்மானம் இனி செனட் சபையில் தாக்கல் செய்யப்பட்டு, வாக்கெடுப்பு நடத்தப்படும்.

கண்டனத் தீர்மானம் செனட் சபையிலும்  நிறைவேறினால் மட்டுமே, ஜனாதிபதி டிரம்பை பதவியில் இருந்து நீக்க முடியும். ஆனால் 100 இடங்களைக் கொண்ட செனட்டில் டிரம்பின் குடியரசுக் கட்சிக்கு 53 எம்.பி.க்களுடன் பெரும்பான்மை உள்ளதால், அவரது பதவி தப்ப வாய்ப்புகள் அதிகம்  என்பது குறிப்பிடத்தக்கது.

http://www.dailyceylon.com/194024/