கிறிஸ்மஸ் தினத்தில் பாலன் பிறப்பை கொண்டாடும் நிலையில் தமது பாலகர்களை தாம் தேடி வருவதாக தெரிவித்து காணாமல் ஆக்கப்பட்டோரின் உறவுகள் வவுனியாவில் போராட்டம் ஒன்றினை மேற்கொண்டனர்.

வவுனியா, ஏ9 வீதியில் வீதி அபிவிருத்தி அதிகார சபைக்கு முன்னால் 1040 ஆவது நாளாக சுழற்சி முறையில் போராட்டத்தில் ஈடுபட்டு வரும் காணாமல் ஆக்கப்பட்டோரின் உறவுகளால் தமது போராட்ட கொட்டகை முன்பாக குறித்த ஆர்ப்பாட்டம் மேற்கொள்ளப்பட்டது.

ஆர்ப்பாட்டத்தில் ஈடுபட்ட காணாமல் ஆக்கப்பட்டோரின் உறவுகள் கூட்டமைப்பின் தலைவர் இரா.சம்மந்தன் அவர்களின் படத்தை நத்தார் தாத்தா வேடமணிந்து,  நாத்தார் வாழ்த்துக்கள்- அடுத்த நத்தாருக்குள் தீர்வு என வாசகத்தையும் பொறித்து ஏந்தியிருந்தனர். 

மேலும், ' துப்பாக்கிகளை காட்டி கைகளை உயர்த்திப் பிடிக்கச் சொல்லி கூட்டிச் சென்ற அண்ணா எங்கே, பச்சை உடையில் இரும்பு கம்பியால் தாக்கி வீதியில் இழுத்துச் செல்லப்பட்ட அப்பா எங்கே, கோத்தா மாமா எங்கே ஆசை மாமா, மைத்திரி மாமா வந்தீங்க பொறுப்பு கூறாமல் சென்றீங்க' என எழுதப்பட்ட சுலோக அட்டைகளை தங்கியவாறும் அமெரிக்கா மற்றும் ஐரோப்பிய ஒன்றியத்தின் கொடிகளுடனும் ஆர்ப்பாட்டத்தில் ஈடுபட்டனர்.

இதன்போது, எல்லோரும் பாலன் பிறப்பு நாளை கொண்டாடும் இந்த வேளையில் தாம் பிறந்து தொலைத்த தமது பிள்ளைகளுக்காக 10 வருடங்களாக போராடி வருகின்றோம். எங்களுக்கு எப்போது விடிவு கிடைக்கும் என கண்ணீர்மல்க ஆர்ப்பாட்டத்தில் ஈடுபட்ட தாய்மார் கருத்து தெரிவித்தனர். 

https://www.virakesari.lk/article/71776

 

காணாமல்போனோரின் உறவுகளை சந்திக்கவுள்ளார் டக்ளஸ்

யுத்தம் இடம்பெற்ற காலப் பகுதியில் காணாமல் போனோரின் உறவுகளை சந்தித்து கலந்துரையாடி அவர்களின் எதிர்பார்ப்புக்கள் தொடர்பாக அரசாங்கத்தின் கவனத்திற்கு கொண்டு செல்வதற்கு கடற்றொழில் மற்றும் நீரக வள மூலங்கள் அமைச்சர் டக்ளஸ் தேவானந்தா தீர்மானித்துள்ளார்.

அந்தவகையில் முல்லைத்தீவு மாவட்டடத்தில் காணாமல்போனோரின் உறவினர்களுடனான சந்திப்பு எதிர்வரும் 27 ஆம் திகதி முல்லைத்தீவு மாவட்டத்திலும், 29 ஆம் திகதி கிளிநொச்சி மாவட்டத்திலும் நடைபெறவுள்ளது.

அதேபோன்று எதிர்வரும் 31 ஆம் திகதி காலை யாழ்ப்பாண மாவட்டத்தில் காணாமல்போனோரின் உறவினர்களை சந்திக்கவுள்ள கௌரவ அமைச்சர், அன்றைய தினமே நண்பகல் வவுனியாவுக்கும் விஜயம் செய்யவுள்ளார்.

யுத்தம் இடம்பெற்ற காலப் பகுதியில் காணாமல் போனோரின் நிலமைகளை அறியத் தருமாறு கடந்த ஆட்சிக் காலத்தில் காணாமல்போனோரின் உறவினர்களினால் வடக்கு கிழக்கு பிரதேசங்களில் போராட்டங்கள் முன்னெடுக்கப்பட்டிருந்தன.

எனினும் கடந்த அரசாங்கத்திற்கு ஒத்துழைப்பு வழங்கிய தமிழ் கட்சிகள் போராட்டத்தில் ஈடுபட்ட உறவினர்களின் கோரிக்கைகளை சந்தித்து அவர்களை எதிர்பார்ப்புக்களை அறிந்து கொள்ளாமல் புறக்கணித்திருந்த நிலையில் அவர்களை அமைச்சர் டக்ளஸ் தேவானந்தா சந்தித்து கலந்துரையாடவுள்ளமை குறிப்பிடத்தக்கது. 

https://www.virakesari.lk/article/71765