அறிவியல் வெல்லும்; அதன் பிறகு கொரோனா அடிபணிந்து விடும்!

கொரோனா வைரஸ் ஆபத்தானதாக இருந்தாலும் இது குறித்த விழிப்புணர்வு மற்றும் தடுப்பு நடவடிக்ைககள் மூலம் பாதுகாப்புப் பெறலாம் என்கின்றனர் மருத்துவ விஞ்ஞானிகள் தும்மும் போதும், இருமும் போதும் உடலிலிருந்து ‘கொரோனா’ வைரஸ் வெளியேறுவதால், ஏற்கனவே வைரஸ் தொற்று ஏற்பட்ட நபர் முகக்கவசம் அணிவது கட்டாயம் ஆகும். அதன் மூலம் ‘கொரோனா’ வைரஸ் உடலிலிருந்து வெளியேறுவதைத் தடுக்க முடியும்.

அதேவேளையில், ஆரோக்கியமாக இருக்கும் நபர்கள் முகக் கவசம் அணிவது கட்டாயமல்ல என்கிறார்கள் மருத்துவ அறிஞர்கள். ஏற்கனவே ‘கொரோனா’ வைரஸ் தொற்றால் பாதிக்கப்பட்டிருக்கும் நபர்களைக் கவனித்துக் கொள்ளும் பணியை மேற்கொள்பவர்கள் தங்களைக் காத்துக் கொள்வதற்காக முகக்கவசம் அணிந்து கொள்ள வேண்டும்.

கண்கள், மூக்கு, வாய் ஆகிய பகுதிகளை கைகளால் அடிக்கடி தொடக் கூடாது. கைகளை சவர்க்காரம் அல்லது கை சுத்திகரிப்பான் (ஹேண்ட் சனிடைஸர்) உதவியுடன் அடிக்கடி கழுவ வேண்டும். குறைந்தபட்சம் 15 முதல் 20 விநாடிகள் வரை சவர்க்காரத்தைப் பயன்படுத்தி கைகளை நன்கு கழுவுவது அவசியம் என்று சுகாதார நிபுணர்கள் அறிவுறுத்துகின்றனர்.

காய்ச்சல், இருமல் உள்ளிட்டவை ஏற்பட்டால் உரிய மருத்துவரின் ஆலோசனையைப் பெற வேண்டும். அவ்வாறான சூழலில் மற்றவர்களுடன் தொடர்பு கொள்வதைத் தவிர்த்து, தனிமைப்படுத்திக் கொள்ள வேண்டும்.

தற்போதைய சூழலில் ‘கொரோனா’ வைரஸை அழிப்பதற்கான நேரடி மருந்துகள் உலகில் எங்கும் தயாரிக்கப்படவில்லை. ‘அன்டிபேயாடிக்ஸ்’ எனப்படும் நோய் எதர்ப்பு மருந்துகள் உடலில் நோயை ஏற்படுத்தும் பக்டீரியாக்களை அழிக்கவல்லவை. ஆனால், வைரஸுக்கு எதிராக அவை செயல்படாது.

‘கொரோனா’ வைரஸைத் தாக்கி அழிக்கவல்ல மருந்துகளையும், அந்த வைரஸை எதிர்கொள்வதற்கான வலிமையை மனித நோய் எதிர்ப்பு மண்டலத்துக்கு அளிக்கவல்ல மருந்துகளையும் தயாரிக்கும் பணியில் பல நாடுகளைச் சோ்ந்த ஆராய்ச்சியாளர்கள் ஈடுபட்டு வருகின்றனர். வைரஸுக்கு எதிராக மருந்துகளை உருவாக்குவதற்கான முதல் பணி அந்த வைரஸைத் தனிமைப்படுத்துவது. இந்தியா, ஜப்பான், தாய்லாந்து, அமெரிக்கா, சீனா ஆகிய நாடுகள் மட்டுமே ‘கொரோனா’ வைரஸைத் தனிமைப்படுத்தும் சோதனையில் வெற்றியடைந்துள்ளன. மருந்துகள் தயாரிப்பதற்கு வசதியாக ஆய்வகச் சூழலில் ‘கொரோனா’ வைரஸை உருவாக்கும் நடைமுறையில் அவுஸ்திரேலியாவைச் சேர்ந்த ஆராய்ச்சியாளர்கள் குழு வெற்றியடைந்துள்ளது.

‘கொரோனா’ வைரஸை எதிர்கொள்வதற்கான மருந்துகள் தயாரிக்கப்பட்ட பிறகு அவை எலி முதலான விலங்குகளில் பரிசோதிக்கப்படும். பல்வேறு கட்ட சோதனைகளுக்குப் பிறகு ‘கொரோனா’ வைரஸைத் தடுப்பதற்கான மருந்து மனிதர்கள் மீதான பயன்பாட்டுக்கு அனுமதிக்கப்படும்.

எவ்வாறாயினும் இன்னும் இரண்டு ஆண்டுகளில் ‘கொரோனா’ வைரஸுக்கான தடுப்பு மருந்து தயாரிக்கப்பட்டு விடும் என்று கூறுகிறார்கள் மருத்துவ விஞ்ஞானிகள். சிலவேளை ஒரு ஆண்டில் தடுப்பு மருந்து தயாரிக்கப்பட்டு விடும் என்ற நம்பிக்ைகயும் மருத்துவர்களுக்கு உண்டு. எதற்கும் நம்பிக்ைகயுடன் காத்திருப்போம். அறிவியல் வெல்லும். அதன் பிறகு கொரோனா மனித குலத்துக்கு அடிபணிந்து விடும்.

-சுரேந்தா ரவி

https://www.thinakaran.lk/2020/03/16/கட்டுரைகள்/49619/அறிவியல்-வெல்லும்-அதன்-பிறகு-கொரோனா-அடிபணிந்து-விடும்