இனப்பிரச்சினைக்குத் தீர்வு காண்பதற்கு அமெரிக்கா தீவிரமாகச் செயலாற்றும் இணைத்தலைமை நாடுகளுடன் ஆராய்ந்துள்ளதாகத் தகவல்

இலங்கை இனப்பிரச்சினைக்கு தீர்வு காணும் நடவடிக்கைகளை ஊக்குவிக்கும் வகையில் இலங்கை அதிகாரிகள், நோர்வே தரப்பி னர், இணைத்தலைமை நாடுகளின் பிரதிநிதிகள் ஆகிய தரப்பு களுடன் நாம் இணைந்து தீவிரமாகச் செயலாற்றவுள்ளோம். எமது இந்தச் செய்தியை அவர்களுடன் பகிர்ந்து கொண்டிருக்கின்றோம்.

அமெரிக்காவின் அரசுத்துறைப் பேச்சாளர் ரொம் கஷே மேற்கண்டவாறு தெரிவித்தார்.

கடந்த புதன்கிழமை வாஷிங்டனில் நடைபெற்ற வாராந்தச் செய்தியாளர் சந்திப் பில் அவர் இத்தகவலை வெளியிட்டார்.

அப்போது அவர் மேலும் தெரிவித்ததாவது:

இலங்கையில் தற்போது அதிகரித்துவருகின்ற வன்செயல்கள் துரதிர்ஷ்டவசமானவை.

இலங்கை அரசும் விடுதலைப் புலிகள் அமைப்பும் மோதல்களைக் கைவிட்டு பிரச் சினைக்கு அரசியல் தீர்வுகாண வேண்டும் என்று நாங்கள் தொடர்ச்சியாக கேட்டுவந் துள்ளோம். நிச்சயமாக இலங்கை மக்களைப் பொறுத்தவரை அவர்களுக்கு அமைதி நிறைந்த ஒரு ஜனநாயக நாட்டில் வாழ்வதற்கான வாய்ப்புத்தரவேண்டும் என்று நாங்கள் விரும்புகின்றோம்.

ஆனால், அங்கு தற்போது நடக்கின்ற விடயங்களில் அதற்கான சூழ்நிலை தென்பட வில்லை. இந்தப் பிரச்சினைக்கு தீர்வுகாணும் நடவடிக்கைகளை ஊக்குவிக்கும் வகையில் நாம் இலங்கை அதிகாரிகளுடனும், நோர்வேத் தரப்பினருடனும் மற்றும் இணைத் தலைமை நாடுகளுடனும் இணைந்து தீவி ரமாகச் செயலாற்ற இருக்கிறோம்.

இந்த விடயம் தொடர்பாக எமது செய் தியை நாம் அவர்களுடன் பகிர்ந்து கொண்டி ருக்கிறோம்.

ஆயினும், இது ஒரு கடினமான நிலைமை. இலங்கை மக்களுக்காக ஒன்றிணைந்து அதி காரப் பகிர்வை ஏற்படுத்தி, அதன்மூலம்தான் சிறுபான்மை மக்களின் ஆதரவைப் பெறமுடியும். இந்தப் பிரச்சினையை ஒரு முடிவுக்குக் கொண்டுவர வேண்டிய கட மைப்பாடு அங்கிருக்கின்ற அனைத்துத் தரப்பினருக்கும் இருக்கின் றது என்றார்.

(அசி)

உதயன்

இந்த அமெரிக்க பருப்பு, வன்னிக் களத்தில் வேகுமா? இல்லையா? என்பதை சொல்லாமலே புரிந்துகொள்ளலாம். மக்களால் ஜனநாயக வழியில் தெரிவு செய்யப்பட்ட இறையாண்மையுள்ள இலங்கை அரசு, தம்மிடமிருந்து உதவி பெறுவதற்குரிய உரித்துக் கொண்டதென அமெரிக்க தத்துவம் கூறுகிறது.

ஆனாலும் மக்களால் தெரிவு செய்யப்பட்ட, தம்மால் பயங்கரவாத இயக்கமாக குறி சுடப்பட்ட 'ஹமாஸ்" இயக்கத்திற்கு அந்த உரிமையை வழங்க இந்த அமெரிக்க தத்துவம் மறுக்கிறது.

அமெரிக்காவின் 'சுயவிமர்சனம்" எப்போதுமே மயக்கமானதுதான். தன்னால் இறக்குமதி செய்யப்பட்ட ஜனநாயகத்தை மட்டுமே ஈராக்கில் அங்கீகரிக்கும்.

பெரும்பான்மை இன மக்களின் அரசியல் அபிலாஷைகளை 'ஜனநாயக" முறைமையின் ரிஷி மூலமாகக் கொண்டால், வட அயர்லாந்து பிரச்சினைக்குத் தீர்வுகாண அமெரிக்கா, பிரித்தானிய மத்தியஸ்தம் தேவைப்பட்டிருக்காது.

இலங்கைத் தமிழர்களுக்கு, சட்டபூர்வ நியாயப்பாடுகளுக்கு உட்பட்ட சோகங்கள் உண்டென்று அமெரிக்கா அங்கீகரிப்பதாக முன்னாள் தூதுவர் கூறுகிறார்.ஆயினும் போராடித்தான் அதைப் போக்க வேண்டுமென்கிற வழிமுறைகளையும் சிந்தனையையும் நிராகரிக்கிறார்.

ஏனெனில், ஆயுதப் போராட்டமும், சுயநிர்ணய உரிமைக் கோட்பாடும், அமெரிக்க தேச நலனிற்கு அச்சுறுத்தலாக அமைகிறதென்பதை பகிரங்கமாகக் கூற வேண்டிய நிர்ப்பந்தத்திற்கு உள்ளாகியுள்ளார். 'உனது துன்பங்களை நான் உணர்கின்றேன். உனக்கான உரிமைகளையும் அங்கீகரிக்கிறேன். ஆனாலும் போராடாதே. எனது தேசிய பாதுகாப்பிற்கு அப்போராட்டம் ஆபத்தாக அமையும்." இதுதான் அமெரிக்கத் தத்துவம்.