மேற்கிந்தியாவிற்கு எதிரான 2 ஆவது டெஸ்ட் போட்டியில் இங்கிலாந்து அணி இனிங்ஸ் மற்றும் 283 ரன்கள் வித்தியாசத்தில் வெற்றிபெற்றது.

இங்கிலாந்து - மேற்கிந்திய கிரிக்கெட் அணிகளிடையிலான 2 ஆவது டெஸ்ட் போட்டி ஹெடிங்லீயில் நடந்தது. இங்கிலாந்து அணி முதல் இனிங்ஸில் 7 விக்கெட் இழப்புக்கு 570 ரன்கள் குவித்து `டிக்ளேர்' செய்தது. இதைத் தொடர்ந்து தனது முதல் இனிங்ஸை விளையாடிய மேற்கிந்திய அணி 146 ஓட்டங்களுக்கு சுருண்டு `பொலோ-ஒன்' ஆனது.

இதையடுத்து, 2 ஆவது இனிங்சையும் தொடர்ந்து ஆடிய மேற்கிந்திய அணி 2 ஆம் நாள் முடிவில் 2 விக்கெட்டுகள் இழப்புக்கு 22 ஓட்டம் எடுத்திருந்தது. 3 ஆம் நாள் ஆட்டம் மழை காரணமாக நடைபெறவில்லை.

இந்த நிலையில் நேற்று முன்தினம் 4 ஆம் நாள் ஆட்டத்திலும் மழை குறுக்கீடு இருந்தது. மழையால் 3 முறை ஆட்டம் நிறுத்தப்பட்டது. இருப்பினும், மழை அவ்வப்போது பெய்து நின்றுவிட்டதால் போட்டி தொடர்ந்து நடத்தப்பட்டது.

மேற்கிந்திய அணி வீரர்கள் முதல் இனிங்ஸைப் போலவே விக்கெட்டுகளை மளமளவென இழந்தனர். பிராவோ மட்டும் போராடி அதிகமாக 52 ஓட்டங்கள் எடுத்தார்.

காயம் காரணமாக கப்டன் சர்வான் இந்த இனிங்ஸிலும் ஆடவில்லை. முடிவில் மேற்கிந்திய அணி 2 ஆவது இனிங்ஸில் 141 ஓட்டங்களுக்கு ஆட்டமிழந்தது. இதனால் இங்கிலாந்து அணி இனிங்ஸ் மற்றும் 283 ஓட்ட வித்தியாசத்தில் வெற்றிபெற்றது. டெஸ்டில் இங்கிலாந்துக்கு கிடைத்த 3 ஆவது மிகப்பெரிய வெற்றியாகும்.

மேற்கிந்திய அணி டெஸ்டில் சந்தித்த மோசமான தோல்வி இதுவாகும். இதற்கு முன்பு 1957 ஆம் ஆண்டு இதே இங்கிலாந்துக்கு எதிராக இனிங்ஸ் மற்றும் 237 ஓட்டங்கள் வித்தியாசத்தில் தோற்றதே பெரிய தோல்வியாக இருந்தது. இப்போது அதைவிட மோசமாகத் தோற்றிருக்கிறது.

இரட்டைச் சதம் அடித்த இங்கிலாந்தின் பீற்றர்சன் ஆட்ட நாயகன் விருது பெற்றார். மேற்கிந்தியா வீழ்ச்சிக்கு இங்கிலாந்து வேகப்பந்து வீச்சாளர் சைட்பொட்டம் முக்கிய காரணமாக இருந்தார். இவர் முதல் இனிங்ஸில் 4 விக்கெட்டுகளும் 2 ஆவது இனிங்சில் 4 விக்கெட்டுகளும் வீழ்த்தினார். 6 ஆண்டுகளுக்குப் பின் மீண்டும் அணியில் சேர்க்கப்பட்ட சைட்பொட்டம் முதல் போட்டியிலேயே தனது திறமையை நிரூபித்திருக்கிறார்.

இந்த வெற்றியின் மூலம் 4 டெஸ்ட் கொண்ட தொடரில் இங்கிலாந்து அணி 1-0 என்று முன்னிலை வகிக்கிறது. 3 ஆவது டெஸ்ட் போட்டி எதிர்வரும் 7 ஆம் திகதி மான்செஸ்டரில் தொடங்குகிறது.

-thinakkural.com-

மேற்கிந்தியாவுடனான 2 ஆவது டெஸ்ட் இங்கிலாந்து அணிக்கு வெற்றி வாய்ப்பு

[29 - May - 2007]

இங்கிலாந்து- மேற்கிந்திய அணிகளுக்கிடையிலான 2 ஆவது டெஸ்டில் இங்கிலாந்து அணி இனிங்ஸால் வெற்றிபெறும் வாய்ப்புள்ளது.

இங்கிலாந்து - மேற்கிந்திய அணிகளிடையே 2 ஆவது டெஸ்ட் போட்டி ஹெடிங்லீயில் நடந்து வருகிறது. இதில் முதல் இனிங்ஸில் இங்கிலாந்து அணி 7 விக்கெட்டுகள் இழப்புக்கு 570 ஓட்டங்கள் குவித்து `டிக்ளேர்' செய்தது. அடுத்து தனது முதல் இனிங்ஸை விளையாடிய மேற்கிந்திய அணி 146 ஓட்டங்களுக்கு சுருண்டு `பொலோ- ஒன்' ஆனது.

தொடர்ந்து 2 ஆவது இனிங்ஸையும் ஆடிய மேற்கிந்திய அணி 2 ஆம் நாள் ஆட்ட நேர முடிவில் 2 விக்கெட்டுகள் இழப்புக்கு 22 ஓட்டங்கள் எடுத்திருந்தது. இனிங்ஸ் தோல்வியை தவிர்க்க மேற்கிந்திய அணி 402 ஓட்டங்கள் எடுக்கவேண்டிய இக்கட்டான நிலையில், நேற்று முன்தினம் 3 ஆவது நாள் ஆட்டம் மழையால் பாதிக்கப்பட்டது.

தொடர்ந்து மழைத் தூறல் விழுந்துகொண்டேயிருந்தது. இதனால் தேநீர் இடைவேளைவரை ஆட்டம் தொடங்கவில்லை. இருப்பினும் இன்னும் 2 நாள் ஆட்டம் மீதமிருப்பதால் இந்த டெஸ்டில் இங்கிலாந்து அணி வெற்றிபெற பிரகாசமான வாய்ப்புள்ளது.

-thinakkural.com-