தமிழர்கள் தகுந்த காரணங்களுடன் தான் கொழும்பிலே வாழுகின்றார்கள் என்பதை அரசாங்கமும், பொலிஸாரும் புரிந்துகொள்ள வேண்டும் : மனோகணேசன்

தமிழர்கள் தகுந்த காரணங்களுடன் தான் கொழும்பிலே வாழுகின்றார்கள் என்பதை அரசாங்கமும், பொலிஸாரும் புரிந்துகொள்ள வேண்டும் : மனோகணேசன் Written by Ellalan - Jun 04, 2007 at 11:19 AM

கொழும்பில் தகுந்த காரண மில்லாமல் நடமாடும் பிற மாகாணங்களைச் சேர்ந்த தமிழர்கள் விரட்டப்பட்டு அவர்களது சொந்த இடங்களுக்கு அனுப்பி வைக்கப்படுவார்கள் என்ற பொலிஸ் மா அதிபரின் கருத்து தவறானதாகும். வடகிழக்கில் ஒரு பாரிய யுத்தம் நடைபெறுகின்றது. அதே போல் மலையகத்தில் வறுமை தலைவிரித்தாடுகின்றது.

இந்த காரணங்களால்தான் வடகிழக்கையும், மலையகத்தையும் சார்ந்த தமிழர்கள் பாதுகாப்பையும், தொழில் வாய்ப்புகளையும் தேடி கொழும்பிற்கு வருகின்றார்கள். இங்கே எந்த ஒரு தமிழரும் காரணமில்லாமல் பொழுது போக்குவதாக நான் நினைக்கவில்லை என மேலக மக்கள் முன்னணி தலைவரும் நாடாளுமன்ற உறுப்பினருமான மனோ கணேசன் தெரிவித்துள்ளார்.

பொலிஸ் மா அதிபரின் கருத்து மற்றும் விடுதிகளில் தங்கியுள்ள தமிழர்கள் வெளியேற்றப்படுவது தொடர்பில் அவர் மேலும் தெரிவித்துள்ளதாவது, தமிழர்களை வெளியேற்றச் சொல்லவில்லை என்று புறக் கோட்டை பொலிஸ் பொறுப்பதிகாரி விளக்கம் கொடுத்துள்ளார். அதேவேளை சில மணித்தியாலத்திற்குள் விடுதி வாழ் தமிழர்களை வெளியேற்ற வேண்டும் என்று தெரிவித்துள்ளார்.

இது பொலிஸ் திணைக்களத்திற்குள் நிலவும் முரண்பாட்டை காட்டுகின்றது. இலங்கையின் தலைநகரத்தில் காரணங்களுடன் மாத்திரம் இல்லாமல் காரணங்களே இல்லாமலும் கூட வாழ்வதற்கான உரிமை தமிழ் மக்களுக்கு உண்டு. அதே போல் வன்முறையாளர்களை தேடிக்கண்டுபிடித்து கைது செய்வதற்கு தேவையான சட்ட அதிகாரங்கள் பொலிஸாருக்கு உண்டு.

இந்நிலையில் வெளிமாகாண தமிழர்கள் என்ற ஒரே காரணத்தினால் அவர்கள் திரட்டப்பட்டு பேருந்துகளில் ஏற்றப்பட்டு அனுப்பி வைக்கப்படுவதை அனுமதிக்க முடியாது. வட, கிழக்கு மாகாணம் தென்னிலங்கையிலிருந்து பிரித்து தனியொரு நாடாக அறிவிக்கப்பட்டு விட்டதா, இங்கிருந்து அங்கு செல்வதற்கும் அங்கிருந்து இங்குவருவதற்கும் விசா தேவைப்படுகின்றதா எனவும் வினவவிரும்புகின்றேன். கொழும்பு வாழ் விடுதி தமிழர்கள் தொடர்பில் அடுத்த வாரம் நாடாளுமன்ற மட்டத்தில் விவாதிப்போம்.

ஏற்கனவே ஐக்கிய தேசியக் கட்சி, தமிழ்த் தேசியக்கூட்டமைப்பு ஆகியவற்றுடன் உரையாடி உள்ளேன். விடுதிகளில் வாழும் வடகிழக்கையும், மலையகத்தையும் சேர்ந்த தமிழர்கள் தகுந்த காரணங்களுடன் தான் கொழும்பிலே வாழுகின்றார்கள் என்பதை அரசாங்கமும், பொலிஸாரும் புரிந்துகொள்ள வேண்டும்.

சங்கதி