பங்களாதேஷ் தனது பிரஜைகளை இலங்கை செல்ல வேண்டாமென அறிவித்துள்ளது.

இலங்கையில் அதிகரித்திருக்கும் வன்முறைகள் காரணமாக இலங்கைக்குச் செல்வதைத் தவிர்க்குமாறு பங்களாதேஷ் தனது நாட்டுப் பிரஜைகளிடம் கோரிக்கை விடுத்துள்ளது.

விடுதலைப் புலிகளின் வான் தாக்குதல்களைத் தொடர்ந்து விமானச் சேவைகள் குறைவடைந்துள்ளமை மற்றும் தொடர்ச்சியாக இடம்பெற்று வரும் வன்முறைகளைக் கவனத்தில் கொண்டே பங்களாதேஷ் அரசாங்கம் இந்தக் கோரிக்கையை முன்வைத்துள்ளது.

கட்டுநாயக்க விமான நிலையம் மீது விடுதலைப் புலிகள் தொடர்ந்தும் தாக்குதல் நடத்தக் கூடிய அச்சுறுத்தல் காணப்படுவதால் முக்கியமான காரணங்கள் இருந்தால் அன்றி இலங்கைக்குச் செல்வதைத் தவிர்க்குமாறு பங்களாதேஷின் வெளிவிவகார அமைச்சு விடுத்துள்ள சுற்றுநிருபத்தில் குறிப்பிடப்பட்டுள்ளது. இந்தச் சுற்றுநிருபம் கடந்த மே பத்தாம் திகதி அனைத்து அமைச்சுக்களுக்கும் அனுப்பிவைக்கப் பட்டிருப்பதுடன், முக்கிய காரணங்கள் இருந்தால் மாத்திரமே இலங்கை விமான நிலையத்தைப் பயன்படுத்துமாறும் கோரப்பட்டுள்ளது.

கொழும்பு விமான நிலையத்தின் பாதுகாப்பு நடவடிக்கைகள் சீரடையும் வரை நீண்ட நேரம் விமான நிலையத்தில் தரித்துநிற்க வேண்டாமெனவும் பங்களாதேஷ் தனது நாட்டுப் பிரஜைகளிடம் கேட்டுள்ளது. இதேவேளை, அடுத்த மாதம் இலங்கையில் நடைபெறவிருக்கும் இலங்கை-பங்களாதேஷ் அணிகளுக்கு இடையிலான கிரிக்கட் சுற்றுப்போட்டிக்குப் போதியளவு பாதுகாப்பு வழங்கப்பட வேண்டுமென பங்களாதேஷ் கிரிக்கட் சபை கோரியுள்ளது.

தமது வீரர்களுக்குக் கூடுதல் பாதுகாப்பு வழங்கப்படுமென இலங்கை கிரிக்கட் சபை உறுதியளித்திருப்பதாக பங்களாதேஷ் கிரிக்கட் சபையின் நிறைவேற்று அதிகாரி மஹமடூர் ரஹ்மான் தெரிவித்துள்ளார். எமது வீரர்களின் இலங்கை விஜயத்தின் போது அரசியல் வாதிகளுக்கு வழங்கும் பாதுகாப்பு வழங்கப்படுமென உறுதிமொழி வழங்கப்பட்டுள்ளது என்றார் அவர்.

பங்களாதேஷில் தற்பொழுது இராணுவ ஆதரவுடனான இடைக்கால அரசாங்கம் ஆட்சி நடத்திவருகின்றது. பங்களாதேஷில் தொடர்ச்சியான வன்முறைகள் இடம்பெற்று வரும் நிலையில் இலங்கையில் வன்முறைகள் அதிகரித்திருப்பதால் அங்கு செல்லவேண்டாமென அந்த நாடு தனது பிரஜைகளுக்கு அறிவுறுத்தியுள்ளது.

கட்டுநாயக்க விமானப்படைத் தளம்மீது விடுதலைப் புலிகள் தாக்குதல் நடத்தியதைத் தொடர்ந்து இலங்கைக்குச் செல்ல வேண்டாமென பிரித்தானியா, ஜேர்மன் உள்ளிட்ட வெளிநாடுகளும் தமது நாட்டுப் பிரஜைகளுக்கு அறிவுறுத்தியிருந்தன.

அத்துடன், கட்டுநாயக்க விமானப்படைத்தளம் மீது தாக்குதல்கள் நடத்தப்பட்டதைத் தொடர்ந்து இரவு வேளைகளில் விமானநிலையம் மூடப்படுவதால் இலங்கைக்கு வரும் உல்லாசப் பயணிகளின் எண்ணிக்கை குறைவடைந்துள்ளது. இதனால் இலங்கையின் உல்லாசப் பயணத்துறைக்குப் பெரும் பின்னடைவு ஏற்பட்டிருப்பதாக நிபுணர்கள் கூறுகின்றனர்.

-Sankathi-

Edited June 5, 200718 yr by யாழ்வினோ

ஹீ ஹீ பங்களாதேஷே சொல்லிட்டா?