உச்ச நீதிமன்றத்தினால் முன்மொழியப்பட்ட ஆலோசனைகளை 20 ஆவது திருத்தச் சட்டத்தினில் உள்ளடக்குவதற்கு சர்வஜன வாக்கெடுப்பொன்றினை நடத்துவதென்பது அவசியமற்றது - கல்வியமைச்சர் ஜி எல் பீரீஸ்

உச்ச நீதிமன்றத்தினால் முன்மொழியப்பட்ட ஆலோசனைகளை 20 ஆவது திருத்தச் சட்டத்தினில் உள்ளடக்குவதற்கு சர்வஜன வாக்கெடுப்பொன்றினை நடத்துவதென்பது அவசியமற்றது - கல்வியமைச்சர் ஜி எல் பீரீஸ்

20 ஆவது திருத்தச் சட்டவரைபில் உச்சநீதிமன்றத்தினால் முன்மொழியப்பட்ட பரிந்துரைகளைச் சேர்ப்பதுபற்றி பொதுமக்களிடம் சர்வஜன வாக்கெடுப்பு ஒன்றினை நடத்துவதற்கான சட்டத் தேவை எதுவும் இல்லையென்று கல்வியமைச்சர் ஜி எல் பீரீஸ் இன்று தெரிவித்திருக்கிறார்.

சிறிலங்கா பொதுஜன பெரமுனவின் வாராந்த பத்திரிக்கையாளர் மாநாட்டில் இதுபற்றிக் கருத்துத் தெரிவித்த பீரீஸ், இந்த சட்டவரைபிற்கான உச்சநீதிமன்றத் திருத்தங்களை அரசாங்கம் சபாநாயகர் ஊடாக இம்மாதம் 20 ஆம் திகதி பாராளுமன்றத்தில் முன்வைக்கும் என்று மேலும் தெரிவித்தார்.

"உச்ச நீதிமன்றம் தனது பரிந்துரைகளை முன்வைக்குமிடத்து, அரசாங்கம் அவற்றினை பாராளுமன்ற குழு அளவில் பரிசீலித்து தேவையான மாற்றங்களைச் செய்யும். ஆகவே சர்வஜன வாக்கெடுப்பு ஒன்றிற்கான சட்டத் தேவை இதில் இருக்காது. உச்சநீதிமன்றத்தின் பரிந்துரைகள் இறுதி வரைபில் உள்ளடக்கப்பட்டு பாராளுமன்றத்தில் மூன்றில் இரண்டு பெரும்பான்மையுடன் சட்டமாக்கப்படும்" என்றும் அவர் தெரிவித்தார்.

"இந்த வரைபு பாராளுமன்றத்தில் இரண்டாவது தடவையாக முன்வைக்கப்படும்பொழுது, கட்சித் தலைவர்களும், பாராளுமன்றக் குழுவும் இவ்வரைபு மீதான பாராளுமன்ற விவாதத்திற்கான திகதியையும், விவாதம் நடத்தப்படவேண்டிய கால எல்லையினையும் தீர்மானிக்கும்".

"அத்துடன், இவ்வரைபிற்கான பரிந்துரைகளை பாராளுமன்ற குழுக் கூட்டத்திலேயே பரிசீலித்து உள்வாங்கப்படுவதுபற்றி தீர்மானிக்கப்படும் என்பதை உச்சநீதிமன்றத்திற்கு நான் சட்டமா அதிபர் மூலம் ஏற்கனவே அறியத் தந்திருக்கிறோம். அரசினால் முன்வைக்கப்பட்டுள்ள வரைபிற்கு மேலதிகமான பரிந்துரைகளை உச்சநீதிமன்றம் வழங்கினால், அவற்றையும் இறுதிவரைபில் சேர்த்துக்கொள்வோம்" என்று அவர் மேலும் கூறினார்.

இந்த உத்தேச திருத்தச் சட்டம் குறித்து பாராளுமன்ற உறுப்பினர்கள் விஜயதாச ராஜபக்ஷ மற்றும் விமல் வீரவன்ஸ போன்றோரின் கரிசணைகள் பற்றி பத்திரிக்கையாளர்கள் வினவியபோது, "அரசின அத்தனை உறுப்பினர்களும் இந்த வரைபிற்கான தமது பூரண ஆதரவினைத் தந்திருக்கிறார்கள், ஆகவே இதை நிறைவேற்றுவது அனைவரினதும் கடமையென்று உணர்ந்து செயற்படுவார்கள்" என்றும் கூறினார். 

http://www.dailymirror.lk/top_story/No-need-of-referendum-when-govt-incorporates-SC-proposals-to-20A-GL/155-197740