கோவையில் மன உறுதியால் கொரோனாவை வென்ற 95 வயது முதியவர்

கோவை:

கோவை மாவட்டத்தில் கொரோனா தொற்றின் 2-வது அலை வேகமாக பரவி வருகிறது.

இந்த தொற்றுக்கு சிறியவர்கள் முதல் முதியவர்கள் வரை அனைவருமே பாதிக்கப்பட்டு மருத்துவமனையில் அனுமதிக்கப்பட்டு சிகிச்சை பெற்று வருகின்றனர். இந்த தொற்றால் கடந்த சில நாட்களாக உயிரிழப்பும் அதிகரித்த வண்ணமே உள்ளது. குறிப்பாக இளைஞர்கள் பலர் தொற்றுக்கு பலியாகும் சம்பவம் அதிகமாக உள்ளது.

மேலும் சிலர் தொற்றுக்கு பயந்து தற்கொலை செய்து கொள்ளும் சம்பவங்களும் ஆங்காங்கே நிகழ்கின்றன. இந்த நிலையில் கோவையில் 95 வயது முதியவர் ஒருவர் தொற்று பாதிப்பில் இருந்து மீண்டு வந்து அனைவருக்கும் புதிய நம்பிக்கையை கொடுத்துள்ளார்.

கோவை தொண்டாமுத்தூர் பகுதியை சேர்ந்தவர் பழனிசாமி(வயது95). இவர் ஓய்வுபெற்ற தலைமை ஆசிரியர். தற்போது விவசாயம் செய்து வருகிறார்.

மேலும் தனக்கு உரிய அனைத்து பணிகளையும் அவரே செய்து கொள்கிறார். யாரையும் எதிர்பார்ப்பதில்லை.

சமீபத்தில் இவருக்கு உடல் நலக்குறைவு ஏற்பட்டது. இதையடுத்து அவரது மகன் தந்தையை செல்வபுரத்தில் உள்ள தனியார் ஆஸ்பத்திரியில் சேர்த்தார்.

அங்கு அவருக்கு மேற்கொள்ளப்பட்ட கொரோனா பரிசோதனையில் தொற்று இருப்பது உறுதியானது. தொடர்ந்து அவரை தனிப்பிரிவில் அனுமதித்து டாக்டர்கள் தீவிர சிகிச்சை அளித்து வந்தனர்.

இளம் வயதினர் பலரும் இந்த நோயால் உயிரிழந்து வரும் நிலையில் முதியவர் துவண்டு போகாமல் தனக்கு வழங்கப்பட்ட அனைத்து சிகிச்சையும் ஏற்றக்கொண்டு, டாக்டர்கள், செவிலியர்களுக்கு முழு ஒத்துழைப்பு வழங்கினார். இதன் பலனாகவும், அவரது மன தைரியத்தாலும் தற்போது தொற்றில் இருந்து மீண்டு பூரண குணமடைந்துள்ளார்.

மருத்துவமனையில் இருந்து வீட்டிற்கு திரும்பிய அவரை டாக்டர்கள், செவிலியர்கள் கை தட்டி வாழ்த்து தெரிவித்து அனுப்பி வைத்தனர். மன தைரியம் இருந்தால் எந்த நோயையும் வென்று எடுக்கலாம் என பழனிசாமி இளம் தலைமுறையினருக்கு தெரிவித்துள்ளார்.

https://www.maalaimalar.com/news/topnews/2021/05/22125954/2664241/Tamil-News-95-year-old-man-recover-from-coronavirus.vpf