புலிகளை பாதுகாப்பதாக அமையும் நோர்வேயின் புதிய சட்டமூலம்

அண்மையில் நோர்வேயில் அந்த நாட்டின் நீதி அமைச்சினால் பயங்கரவாத அமைப்புகளையும் செயற்பாடுகளையும் தடை செய்வதற்காகத் தயாரித்துள்ள பயங்கரவாத எதிர்ப்புச் சட்டமூலம் (Anti-Terrow Laws) சம்பந்தமாக ஷ்ரீலங்கா அரசும் ஐக்கிய அமெரிக்க அரசும் அவற்றின் எதிர்ப்பை நோர்வே அரசுக்குத் தெரிவித்துள்ளன. இதற்குக் காரணம் நோர்வே நீதி அமைச்சின் மேற்படி சட்டமூலத்தில் கூறப்பட்டிருக்கும் சட்டவிதிகளும் சட்ட நடைமுறைகளும் பயங்கரவாத அமைப்பு ஒன்றில் அங்கத்தவராக இருந்து செயற்படுவது நோர்வேயில் சட்டவிரோதமான செயற்பாடு அல்ல என்ற முறையில் தயாரிக்கப்பட்டுள்ளன எனவும் மேலும் அவ்வாறே பயங்கரவாத நடவடிக்கையில் குறித்த பயங்கரவாத அமைப்பின் உறுப்பினர் ஈடுபட்டார் என நீதி விசாரணையில் நிரூபிக்கப்பட்டால் அந்த நபருக்கு எதிராகத் தண்டப்பணம் செலுத்தும் தண்டனை மட்டுமே வழங்கக்கூடிய முறையில் குறித்த நோர்வே அரசின் புதிய பயங்கரவாதத் தடுப்புச் சட்டமூலம் தயாரிக்கப்பட்டுள்ளதாகவும் தெரிவிக்கப்பட்டுள்ளது.

இவ்வாறு மேற்படி நோர்வேயின் புதிய சட்டமூலம் பயங்கரவாத அமைப்புகளும் அவற்றின் உறுப்பினர்களும் செயற்படுவதை தடுக்கும் முறையிலோ அல்லது பயங்கரவாதத்தில் ஈடுபடும் நபர்களுக்கு கடும் தண்டனைகளை வழங்கும் முறையிலோ தயாரிக்கப்பட்டிருப்பதைச் சுட்டிக்காட்டியே ஷ்ரீலங்காவும் ஐக்கிய அமெரிக்காவும் குறித்த சட்டமூலத்துக்கு எதிர்ப்புத் தெரிவித்துள்ளதாகத் தெரியவந்துள்ளது. மேலும், நோர்வே நீதி அமைச்சு தயாரித்துள்ள இந்த சட்டமூலம் நோர்வேயில் வசிக்கும் புலிகள் இயக்கத்தினருக்கு அங்கு செயற்படுவதற்கு சட்டபூர்வமான அங்கீகாரத்தை அளிப்பதாக உள்ளது. அவ்வாறே புலிகள் இயக்கத்தினர் அங்கிருந்துகொண்டு எந்தவொரு பயங்கரவாத நடவடிக்கையையும் ஷ்ரீலங்கா அரசுக்கு எதிராக மேற்கொள்ளும் பட்சத்தில் அதற்காக அவர்கள் கைதுசெய்யப்பட்டு நீதி விசாரணைக்கு உட்படுத்தப்பட்டு அவர்களின் பயங்கரவாத நடவடிக்கை நிரூபிக்கப்பட்டாலும் அந்தக் குற்றத்திற்காகத் தண்டப்பணத்தை மட்டுமே செலுத்திவிட்டு அவர் விடுதலையாவதற்கு மேற்படி நோர்வேயின் புதிய பயங்கரவாதத் தடுப்பு சட்டமூலத்திற்கேற்ப சந்தர்ப்பம் இருப்பதாகவும் ஷ்ரீலங்கா அரசின் பாதுகாப்புத்துறை உயர்மட்டத் தகவல் வட்டாரங்கள் திவயினவுக்கு சுட்டிக்காட்டியுள்ளன.

இந்த வகையில், நோர்வே அரசின் புதிய பயங்கரவாதத் தடுப்புச் சட்டமூலம் பயங்கரவாத அமைப்புகளையும் செயற்பாடுகளையும் தடுக்கும் முறையில் அமையாமல் புலிகள் இயக்கத்தையும் அதன் உறுப்பினர்களையும் பாதுகாப்பதும் ஊக்குவிப்பதுமாகவே அமைந்துள்ளது சம்பந்தமாக ஷ்ரீலங்கா அரசு நோர்வேயிலிருக்கும் ஷ்ரீலங்காத் தூதுவர் அசல வீரக்கோனிடமிருந்து விளக்க அறிக்கையைக் கோர நடவடிக்கை எடுத்துள்ளதாகவும் குறித்த உயர்மட்ட பாதுகாப்புத் தகவல் வட்டாரங்கள் கூறியுள்ளன.

திவயின:23-09-2007

http://www.thinakkural.com/

சிறீ லங்காவின் உள்நாட்டு விவகாரங்களில் வெளிநாடுகள் தலையிடுவது தவிர்க்கப் படவேண்டும் என்று விரும்புபவர்கள், நோர்வேயின் உள்நாட்டு விவகாரங்களிலும் தமது தலையைக் கொடுக்காது இருப்பது நல்லது.