மன்னாரில் பலவந்தமாக தமிழர்கள் வெளியேற்றப்பட்டனர்: நிமல்கா பெர்னாண்டோ குற்றச்சாட்டு

மன்னாரில் பலவந்தமாக தமிழர்கள் வெளியேற்றப்பட்டனர்: நிமல்கா பெர்னாண்டோ குற்றச்சாட்டு

மன்னாரில் பலவந்தமாக தமிழர்களை சிறிலங்கா இராணுவம் வெளியேற்றி, உள்ளக இடம்பெயர்ந்தோர்-களாக்கியது என்று சிறிலங்காவின் மனித உரிமைகள் செயற்பாட்டாளர் நிமல்கா பெர்னாண்டோ குற்றம்சாட்டியுள்ளார்.

கொழும்பு ஆங்கில ஊடகம் ஒன்றுக்கு அவர் அளித்த நேர்காணலில் கூறியுள்ளதாவது:

சிறிலங்காவின் மனித உரிமைகள் விவகாரங்களுக்கான அமைச்சரின் அழைப்பின் பேரில் அரசாங்கத்தின் ஆலோசனைக் குழுவில் நாங்கள் இடம்பெற்றோம். இந்த நாட்டில் நிகழ்கின்ற மனித உரிமை மீறல்களானது மக்களினது நாளாந்த வாழ்க்கையைப் பாதித்து வருகிறது.

சிறிலங்காவில் இதுவரை தடுத்து வைக்கப்பட்டோரின் பட்டியலை சேகரிக்க வேண்டும் என்று அமைச்சர் மகிந்த சமரசிங்கவை நாங்கள் கேட்டுக்கொண்டோம். ஆனால் அந்நடவடிக்கை மேற்கொள்ளப்படவில்லை. நாங்கள் பதவி விலகியமைக்கு அது ஒரு காரணம்.

ஜெனீவாவுக்கு நாங்கள் சென்றபோது நாங்கள் அமைதியாகத்தான் இருக்க வேண்டியிருந்தது. ஜெனீவாவில் உள்ள சிறிலங்காவின் சிறப்புப் பிரதிநிதி, எமது குழுவில் உள்ள சுனில் அபேயசேகர பேசுவதற்கு வாய்ப்பளிக்க மறுத்துவிட்டார். அவர் போதுமான அனுபவம் பெற்றிருக்கவில்லை என்றும் கூறினார். அரசாங்கத்தின் ஆலோசனைக் குழுவில் இடம்பெற்றிருந்த பொதுமக்களின் பிரதிநிதிகளுக்கு மரியாதை அளிக்கப்படவில்லை. யார் அரசாங்கத்தினால் கைது செய்யப்பட்டாலும் அதுவித சட்ட நடைமுறைகளோ அல்லது தடுத்து வைக்கப்படும்போது பின்பற்ற வேண்டிய முறைகளோ கடைபிடிக்க மாட்டார்கள். அதேபோல் நாங்கள் சாட்சிகளின் பாதுகாப்பு குறித்தும் வலியுறுத்தினோம். ஆனால் அதுவும் மேற்கொள்ளப்படவில்லை. ஆகையாலும் நாங்கள் விலக நேரிட்டது.

அரசாங்கத்துக்கு நாங்கள் பரிந்துரையளிதோம். ஆனால் பரிந்துரைகளுக்கும் அரசாங்கம் நடைமுறைப்படுத்துவதற்கும் பாரிய இடைவெளி உள்ளது. உதாரணமாக, தமிழர்கள் தங்களது சொந்தத் தாய்மொழியில் காவல்துறையிடம் முறைப்பாடு அளிக்க ஏற்பாடு செய்ய வேண்டும் என்று பரிந்துரைத்தோம். ஆனால் அது நடைபெறவில்லை.

நாங்கள் 25 ஆண்டுகாலமாக மனித உரிமைகள் களத்தில் இருக்கிறோம். ஆனால் அப்போதும் இப்போதும் சூழ்நிலைகள் மாறிவிடவில்லை. நாங்கள் அரசாங்கத்துக்கு எதிராக செயற்படவில்லை.

சிறிலங்கா அரச தலைவர் மகிந்த ராஜபக்ச, ஜெனீவாவில் லூய்ஸ் ஆர்பரைச் சந்தித்தபோது சிறிலங்காவுக்கு வருகை தருமாறு அழைப்பு விடுத்திருந்தார். அதனடிப்படையில்தான் லூய்ஸ் ஆர்பர், சிறிலங்காவுக்கு வருகை தந்தார். சிலர் கூறுவது போல் வேறு நோக்கங்களுக்காக அவர் இங்கு வரவில்லை.

சிறிலங்காவில் மனித உரிமைகளைக் கண்காணிக்க பல்வேறு அமைப்புக்கள், கண்காணிப்புக் குழுக்கள் உள்ளன. அரசாங்கமும் கூட ஆணையங்களை அமைத்திருக்கிறது.

ஆனால் ஒவ்வொரு ஆணையத்தின் புள்ளி விபரப்படியும் காணாமல் போனோரின் எண்ணிக்கை வேறுபடுகிறது. ஆகையால் மனித உரிமை மீறல்கள் தொடர்பில் ஒரு அனைத்துலக கண்காணிப்பு ஆணையம் அமைக்கப்படுவது சிறந்தது.

1980-களில் நிகழ்ந்த காணாமல் போதல் மற்றும் கடத்தல்களுக்காக மனித உரிமைகள் ஆணையம் அமைக்கப்பட்டது. இருந்தபோதும் தற்போது மனித உரிமை மீறல்களை விசாரிப்பதில் நம்பகத்தன்மையை அது இழந்துவிட்டது.

சிறிலங்காவின் மனித உரிமைகளைப் பற்றிக்கூற வேண்டுமெனில் அண்மையில் மன்னாரில் நிகழ்ந்ததைக் கூறலாம்.

மன்னாருக்கு அண்மையில் நாம் சென்றிருந்தோம். சிறிலங்கா இராணுவத்தினர் பலவந்தமாக வீடுகளிலிருந்து தம்மை வெளியேற்றியதாக உள்ளக இடம்பெயர்ந்தோர் குற்றம்சாட்டியிருந்தனர். உண்மையில் சிறிலங்கா இராணுவத்தினரால் ஒரு விடுதலைப் புலி போராளி கூட பிடித்து வைக்கப்படாத நிலையில்- அங்கு மோதல் எதுவுமே நடைபெறாத நிலையில் பெருந்தொகையான ஆர்ட்டிலறி எறிகணை வீச்சுக்கள் நடந்து கொண்டிருந்தன.

வட பகுதியில் பாதுகாப்புக் கோரி மனித உரிமைகள் ஆணையத்தில் சரணடைகின்ற நிலைமை உள்ளது.

வடக்கிலும் கிழக்கிலும் காணாமல் போதல்களும், கடத்தல்களும் தொடர்கின்றன. தென்னிலங்கையினர் இத்தகையவற்றால் பாதிக்கப்படவில்லை. இருப்பினும் வடக்கு - கிழக்கில் என்ன நடக்கிறது என்பதை அவர்களும் அறிய வேண்டும் என்றார் நிமல்கா பெர்னாண்டோ.

http://www.puthinam.com/