நூற்றுக்கணக்கில் இந்திய வம்சாவளித் தமிழர்கள் சிறிலங்காவில் திடீர் கைது- தனி முகாமில் அடைக்க மகிந்த உத்தரவு- உறவுகளின் கதறலைக் கேட்கவும் மகிந்த மறுப்பு!

கொத்துக் கொத்தாக ஈழத் தமிழர்கள் கொழும்பில் கைதான சம்பவத்துக்குத் தன் கடும் கண்டனத்தை வெளியிட்டிருக்கும் ம.தி.மு.கவின் பொதுச் செயலரும், ஈழத்தமிழர் ஆர்வலருமான வைகோ, இது விடயத்தில் இந்திய மத்திய அரசு உடன் தலையிட்டு, அல்லற்படும் தமிழர்களைக் காப்பாற்ற வேண்டும் எனக் கோரிக்கை விடுத்துள்ளார்.

இது தொடர்பில் சென்னையில் அறிக்கையொன்றை வெளியிட்டிருக்கும் வைகோ அதில் கூறியிருப்பவை வருமாறு:

நவம்பர் 30ஆம் திகதி முதல் டிசம்பர் 2ஆம் திகதி மாலை வரை கொழும்பில் ஈழத் தமிழர்கள் ஆயிரக்கணக்கானோர் கைது செய்யப்பட்டுள்ளனர்.

ஏற்கனவே, கொழும்பு நகரில் வாழும் தமிழர்கள் வெளியேற வேண்டும் என அரசு உத்தரவு போட்டபோது அதனை எதிர்க்காது சர்வதேச சமுதாயம் பின்வாங்கியது.

அதன் பின்னர் ஈழச் சகோதர, சகோதரிகள் எவ்வித முகாந்திரமும் இல்லாமல் கைது செய்யப்பட்டமை கடும் கண்டனத்துக்கு உரியது. ஞாயிற்றுக்கிழமை மாலை வரை இந்தக் கைது நடவடிக்கைகள் தொடர்ந்தன எனத் தகவல்கள் கிடைத்திருக்கின்றன. மேலும் இந்த நடவடிக்கை தொடரலாம் என்ற அச்சமும் ஏற்பட்டுள்ளது.

ஏற்கனவே,இந்தியா ஏராளமான ஆயுதங்களை இலங்கைக்கு தாராளமாக வழங்கியுள்ளது. இதனைப் பயன்படுத்தி அங்குள்ள தமிழர்கள் கொடூரமாகக் கொல்லப்படுவதை மத்திய அரசு பார்த்துக் கொண்டு மௌனம் காக்கின்றது.

அப்பாவித் தமிழர்களைக் கைது செய்ததன் மூலம் இனப் படுகொலை செய்யும் சிங்கள அரசின் முகத்திரை கிழிக்கப்பட்டு விட்டது.

கொழும்பு நகரில் ஆயிரக்கணக்கான தமிழர்கள் கைது செய்யப்பட்டுள்ளமை கடும் கண்டனத்துக்குரியது. இது விடயத்தில் இந்திய அரசு தலையிட்டு கைது செய்யப்பட்ட ஈழத் தமிழர்களை உடன் விடுவிக்க உரிய நடவடிக்கைகளைத் துரிதமாக மேற்கொள்ள வேண்டும். எனக் குறிப்பிட்டுள்ளார்.