தமிழக மீனவர்களின் உதவியை நாடுகின்றது இலங்கைக் கடற்படை

நெடுந்தீவுக் கடற்பரப்பில் கடற்புலிகளுக்கும் இலங்கை கடற்படையினருக்கும் இடையே கடந்த வாரம் மூண்ட கடற் சமரில் காணாமல் போன படையினரின் சடலங்கைளத் தேடும் பணிக்கு தமிழக மீனவர்களின் உதவி கோரப்பட்டிருக்கின்றது.

காணமற்போன கடற்படையினர் உயிரிழந்திருக்கலாம் எனத் தெரிவிக்கபடும் நிலையில் அவர்களின் சடலங்களை தேடும் பணியில் உதவிட தமிழக மீனவர்களின் உதவியை நாடியுள்ளதாக தமிழக செயதித்தாள்கள் செய்தி வெளியிட்டுள்ளன.

இராமேஸ்வரத்திலிருந்து புறப்பட்டுச் சென்று இந்திய இலங்கை எல்லையில் நேற்று முன்தினம் மீன் பிடித்தக் கொண்டிருந்த வேளை தமிழக மீனவர்களை அணுகிய கடற்படையினர் அந்தப் பகுதியில் ஏதேனும் உடல்கள் மிதந்து கொண்டிருந்தால் அது பற்றி தகவல் தெரிவிக்குமாறு கேட்டுக் கொண்டனர் எனத் தெரிவிக்கப்படுகின்றது.

கரைக்குத் திரும்பிய மீனவர்கள் தங்களிடம் இலங்கைக் கடற்படையினர் மிகவும் பரிவுடன் இந்த உதவியை கோரினர் எனத் தெரிவித்தனர்.

இராமேஸ்வரத்தில் செய்தியாளர்களிடம் பேசிய சேசு என்ற மீனவர், இந்த முறை இலங்கை கடற்படையினர் நட்புடன் பழகினர் என்றும், தங்களைத் தாக்கவில்லை என்றும் குறிப்பிட்டார். நெடுந்தீவுப் பகுதியில் இடம் பெற்ற மோதலைத் தொடர்ந்து அந்தப் பகுதியில் மீன் பிடிக்கச் செல்லாமல் இருந்த இராமேஸ்வரம் மீனவர்கள் நான்கு நாள் இடைவெளிக்குப் பின்னர் நேற்று முன்தினம் அங்கு மீண்டும் மீன் பிடிக்கச் சென்றனர்.

இந்த மோதலின் போது கடற்படையினரைச் சேர்ந்த 20 சிப்பாய்கள் காணாமற் போயினர் எனத் தெரிவிக்கப்படுகிறது.

இதனிடையே, இராமேஸ்வரம் கடலோரப் பகுதியில் இனம் தெரியாத நபரின் சடலம் கரை ஒதுங்கியிருப்பதாக அதிகாரிகள் தகவல் தெரிவித்துள்ளனர்.

நன்றி சுடர் ஒளி