பொண்டிங் படை' மகத்தான சாதனையை நெருங்குகிறது தடுத்து நிறுத்த முயல்வார்களா?

[nunavilan]

பொண்டிங் படை' மகத்தான சாதனையை நெருங்குகிறது தடுத்து நிறுத்த முயல்வார்களா

[01 - January - 2008] [Font Size - A - A - A]

இந்திய வீரர்கள்டெஸ்ட் போட்டிகளிலும் உலக சம்பியன் அவுஸ்திரேலியாவின் ஆதிக்கத்தை அசைக்க முடியவில்லை. இந்தியாவுக்கு எதிரான மெல்போர்ன் டெஸ்ட் வென்ற உற்சாகத்தில் இருக்கும் `பொண்டிங் படை' மகத்தான சாதனையை நெருங்குகிறது. நாளை 2 ஆம் திகதி சிட்னியில் தொடங்கும் இரண்டாவது போட்டியில் அசத்தினால், தொடர்ந்து 16 டெஸ்களில் வென்ற ஸ்ரீவோவின் சாதனையை சமன் செய்யலாம். இந்தச் சாதனைக்கு இந்திய வீரர்கள் முட்டுக் கட்டை போடுவார்களா? ஷேன் வோர்ன் (708 விக்.), மெக்ராத் (563 விக்.), ஜஸ்ரின் லாங்கார் (7,696 ஓட்டங்கள்), டேமியன் மார்ட்டின் (4,406 ஓட்டங்கள்) போன்ற அனுபவ வீரர்கள் அடுத்தடுத்து ஓய்வு பெற அவுஸ்திரேலிய அணியின் நிலைமை குறித்து கேள்வி எழுப்பப்பட்டது. பிரட்லீ, மிட்சல் ஜான்சன், ஸ்ரூவர்ட் கிளார்க், ஷோன் ரைற் போன்ற `வேகங்கள்' டெஸ்டில் சாதிப்பது கடினம் என்று விமர்சிக்கப்பட்டது. ஸ்ரூவர்ட் மெக்கில் காயமடைய 36 வயதான பிராட் ஹொக் சுழற்பந்து வீச்சாளராக அணியில் இடம்பிடித்தார்.

இவர்களை இந்திய வீரர்கள் எளிதில் சமாளிப்பார்கள் என்று எதிர்ப்பாக்கப்பட்டது. ஆனால், மெல்போர்ன் டெஸ்டில் எல்லாமே தலைகீழாக மாறியது. முதல் இனிங்ஸில் டிராவிட்டை மிரட்டிய ஜான்சன் தொடர்ந்து 5 `மெய்டன்கள்' வீசினார். பின்னர் இரண்டாவது இனிங்சில் பின் வரிசை வீரர்களின் விக்கெட்டை சுலபமாக கைப்பற்றினார். .

மெக்ராத் போல் துல்லியமாக பந்து வீசி ஸ்ருவர்ட் கிளார்க் தூள் கிளப்பினார். முதல் இனிங்சில் டிராவிட், சச்சின், யுவராஜ் என முன்னணி வீரர்களை வெளியேற்றிய இவர் 15 ஓவரில் 28 ஓட்டங்களைக் கொடுத்து 4 விக்கெட் கைப்பற்றினார்.

பிரட் லீ பற்றி அதிகம் சொல்லத் தேவையில்லை. அணியின் பந்துவீச்சை வழிநடத்திச் சென்ற இவர் தேவையான நேரத்தில் திருப்புமுனை ஏற்படுத்திக் கொடுத்தார். சுழற்பந்து வீச்சில் பிராட் ஹொக் அசத்தினார். கங்குலி, யுவராஜ் சிங் போன்றவர்களது விக்கெட்டுகளை சாய்த்து திறமையை நிரூபித்தார்.

துடுப்பாட்டத்தை எடுத்துக்கொண்டால் வழக்கம் போல் ஹைடன் அசத்தினார். லாங்கர் இல்லாத குறையை தொடக்க வீரர் பில் ஜாக்ஸ் போக்கினார். எதிர்கால கப்டனாக வர்ணிக்கப்படும் மைக்கேல் கிளார்க் கலக்கினார். இரண்டாவது இனிங்சில் 73 ஓட்டங்களை விளாசினார். சைமண்ட்ஸ் நிலைமைக்கு ஏற்ப விளையாடினார். கப்டன் ரிக்கிபொண்டிங் துடுப்பாட்டத்தில் சோபிக்காத போதும் சிறப்பான முறையில் அணியை வழிநடத்தினார். சரியான நேரத்தில் `டிக்ளேர்' செய்து இந்திய அணிக்கு கடும் நெருக்கடியைக் கொடுத்தார்.

இப்படி ஒவ்வொருவரும் பொறுப்புணர்ந்து செயல்பட்டனர். தங்களது வெற்றிப் பாரம்பரியம் தொடர வேண்டும் என்ற உறுதி மற்றும் வீரர்களின் அர்ப்பணிப்பு உணர்வு போன்றவையே அவுஸ்திரேலியாவின் வெற்றிநடைக்கும் முக்கிய காரணம்.

மெல்போர்ன் வெற்றியைத் தொடர்ந்து சிட்னியிலும் சாதிக்கத் தயாராகிறார். பொண்டிங் இங்கு சாதித்தால் தொடர்ந்து 16 ஆவது டெஸ்டில் வென்று முன்னாள் கப்டன் ஸ்ரீவோவின் சாதனையை சமன் செய்யலாம். ஸ்ரிவோ 1999 அக்டோபர் முதல் 2001 பெப்ரவரி வரையிலான காலத்தில் தொடர்ந்து 16 வெற்றிகளைப் பெற்றார். பின்னர் இந்தியாவுக்கு எதிரான கொல்கத்தா டெஸ்ட் போட்டியில் இவரது தலைமையிலான அணி தோல்வியடைந்தது. இதேபோன்றதொரு அதிர்ச்சியை இந்திய அணி மீண்டும் கொடுக்குமா என்ற ஆவல் ரசிகர்கள் மத்தியில் எழுந்துள்ளது.

சிட்னி ஆடுகளம் பொதுவாக சுழற்பந்து வீச்சுக்குக் கை கொடுக்கும். கும்பிளே, ஹர்பஜன் அசத்தினால், அவுஸ்திரேலிய அணிக்கு இம்முறை நெருக்கடி கொடுக்கலாம். 2001 கோல்கத்தா போட்டியில் இலட்சுமண் 281 ஓட்டங்கள் எடுத்து சாதித்தார். இத்தகைய ஆட்டத்தை இவர் மீண்டும் வெளிப்படுத்தினால் நிச்சயமாக பதிலடி கொடுக்கலாம்.

அன்று பந்து வீச்சில் கலக்கிய ஹர்பஜன் இம்முறையும் விஸ்வரூபம் எடுக்க வேண்டும். அடுத்த சவாலுக்கு ஆயத்தமாக மிகக் குறுகிய கால அவகாசம் மட்டுமே இருப்பது இந்தியாவுக்கு பாதகமான விடயம். ஆனாலும், சர்வதேச கிரிக்கெட்டில் வீரர்கள் எத்தகைய சூழ்நிலையையும் சமாளிக்கத் தயாராக இருக்க வேண்டும். தங்களுக்கு சாதகமான களத்தில் இந்திய அணி எழுச்சி பெறுவது மிகவும் அவசியம்.

சிட்னி டெஸ்ட் வாய்ப்பு குறித்து பொண்டிங் கூறுகையில்;

" சமீப காலமாக டெஸ்ட் போட்டிகளில் அருமையாக விளையாடி வருகிறோம். துடுப்பாட்ட வீரர்கள் நம்பிக்கை தருகின்றனர். எதிரணியின் 20 விக்கெட்டுகளை வீழ்த்தக் கூடிய வல்லமை பெற்ற பந்து வீச்சாளர்கள் உள்ளனர். தொடர்ந்து 15 ஆவது டெஸ்ட் வெற்றியை மெல்போர்னில் பதிவு செய்தோம். அடுத்து சிட்னியிலும் சாதிக்கக் காத்திருக்கிறோம். இதற்கு வீரர்கள் அனைவரும் தயாராக இருக்கிறார்கள்" என்றார்.

thinakural.com