இந்து ஆலயத்துக்குள் புகுந்து அடாவடித்தனம் கண்டித்து மட்டக்களப்பில் பூரண ஹர்த்தால் இயல்பு நிலை முற்றாக பாதிப்பு

இந்து ஆலயத்துக்குள் புகுந்து அடாவடித்தனம் கண்டித்து மட்டக்களப்பில் பூரண ஹர்த்தால் இயல்பு நிலை முற்றாக பாதிப்பு

1/17/2008 9:47:12 PM

வீரகேசரி இணையம் - ஆரையம்பதி கடற்கரை வீதியிலுள்ள பழம் பெருமை வாய்ந்த ஸ்ரீ நரசிம்மர் ஆலயத்துக்குள் புகுந்த குழுவினர் மேற்கொண்ட அடாவடித்தனத்தை கண்டித்தும், ஆரையம்பதி திருநீற்றுக் கேணியில் தமிழர் வீடொன்றின் மீது மேற்கொள்ளப்பட்ட தாக்குதலுக்கு எதிர்ப்பு தெரிவித்தும் மட்டக்களப்பில் இன்று பூரண ஹர்த்தால் அனுஷ்டிக்கப்பட்டது.

தமிழ் மக்கள் ஒன்றினைந்து விடுத்த அழைப்பினை ஏற்று நடைபெற்ற ஹர்த்தாலினால் மட்டக்களப்பு பொதுமக்களின் இயல்பு வாழ்க்கை ஸ்தம்பிதமடைந்திருந்தது. ஹர்த்தால் காரணமாக மட்டக்களப்பு நகரில் சுற்றுப்புறங்களிலும் கடைகள் அடைத்தும் மூடப்பட்டிருந்தன. வங்கிகள், பாடசாலைகள், மட்டக்களப்பு கல்லூரி, பிரதேச செயலக தபால் நிலையம் உட்பட சகல நிறுவனங்களும் இயங்கவில்லை. பஸ் சேவை, தனியார் போக்குவரத்து சேவை, ஆட்டோ சேவை என்பனவும் இடம்பெறவில்லை. மட்டக்களப்பு போதனாவைத்தியசாலைக்கும் மக்களின் வரவு மிகவும் குறைவாகவே காணப்பட்டது. நோயாளர்களை பார்வையிட மோட்டார் சைக்கில், சைக்கில்களிலேயே மக்கள் வைத்தியசாøலக்கு வருகை தந்தனர்.

நகருக்குள் அனைத்து எரிபொருள் நிரப்பு நிலையங்களும் முற்றாகவே மூடப்பட்டிருந்தன. இதனால் எரிபொருள் இன்றி வாகனங்கள் இடைவழியில் நின்றதையும் காணமுடிந்தது. மட்டக்களப்பு மாநகரசபையின் பொதுச் சந்தையும் முற்றாகவே செயலிழந்து காணப்பட்டது. நீதிமன்ற அமர்வுகளும் நேற்று நடைபெறவில்லை. மாவட்ட தேர்தல் அலுவலகமும் இயங்கவில்லை. ஹர்த்தாலினால் மட்டக்களப்பு மாவட்டத்தின் இயல்பு நிலை முற்றாக பாதிக்கப்பட்டிருந்தது.

கடந்த சனிக்கிழமை கர்பாலா கிராமத்தில் மேற்கொள்ளப்பட்ட துப்பாக்கிச் சூட்டினையடுத்து ஆரையம்பதி ஸ்ரீ நரசிம்மர் ஆலயத்துக்குள் புகுந்த குழுவினர் விக்கிரகங்களை சேதப்படுத்தியதுடன் மாடொன்றையும் ஆலயத்துக்குள் வெட்டி இரத்தத்தை தெளித்துள்ளனர். நேற்று (இன்று) 18 ஆம் திகதி ஆலயத்தின் கும்பாபிஷேகம் நடைபெறவிருந்த வேளையில் இச்சம்பவம் இடம்பெற்றிருந்தது. அதனைவிட ஆரையம்பதி திருநீற்றுக் கேணியில் வீடொன்றுக்குள் புகுந்த குழுவினர் அங்கிருந்த தாயையும், மகனையும் வெட்டியும் அடித்து காயப்படுத்தியிருந்தனர். இச்சம்பவங்களை கண்டித்தே நேற்று ஹர்த்தால் அனுஷ்டிக்கப்பட்டுள்ளது