தமிழர்களைக் கொன்று குவிக்கும் சிங்கள அரசுக்கு உதவாதே! -மறுமலர்ச்சி தி.மு.க. நாடாளுமன்ற உறுப்பினர் டாக்டர் கிருஷ்ணன் அவர்கள் நாடாளுமன்றத்தில் ஆற்றிய உரை

தமிழர்களைக் கொன்று குவிக்கும் சிங்கள அரசுக்கு உதவாதே!

மறுமலர்ச்சி தி.மு.க. நாடாளுமன்ற உறுப்பினர் டாக்டர் கிருஷ்ணன் அவர்கள் நாடாளுமன்றத்தில் ஆற்றிய உரை:

ஒரு வரைமுறை எதுவும் இல்லாமல், எண்ணற்ற ஈழத்தமிழர்களும், தமிழக மீனவர்களும் கொல்லப்படுவதை இந்திய அரசின் கவனத்துக்குக் கொண்டு வருகிறேன். இந்தியக் கடல் எல்லையிலும், சர்வதேசக் கடல் எல்லையிலும் மீன்பிடிக்கின்ற இந்திய மீனவர்களை, இலங்கை கடல் எல்லைக்கு இழுத்துச் சென்று, அவர்களை மிருகத்தனமாக தாக்கிக் கொல்கின்றனர்.

கடந்த வாரம், இந்திய மீனவர்கள் மீன் பிடிப்பதற்கு உரிமை உள்ள கச்சத் தீவு கடல் பகுதியில் ஒரு தாக்குதலை நடத்தி உள்ளனர். உலகெங்கும் கடைப்பிடிக்கப்பட்டு வருகிற நெறிமுறைகளுக்கு எதிராக, பன்னாட்டுக் கடல் எல்லையில், இலங்கைக் கடற்படையினர் கண்ணிவெடிகளைப் புதைத்து உள்ளனர். இது நம்முடைய மீனவர்களுக்கு மட்டும் அல்ல, அவ்வழியாகப் பயணிக்கின்ற அனைவருக்குமே அச்சுறுத்தல் ஆகும். இலங்கையின் வடபகுதியில், உணவும், மருந்துகளும் இன்றித் தவிக்கின்ற தமிழ் மக்களுக்கு, உணவும், மருந்துகளும் கொண்டு செல்வதை இந்திய அரசு தடுத்துவிட்டது. நல்லெண்ணம் கொண்டோரால் வழங்கப்பட்டு இருக்கின்ற உணவும், மருந்துகளும், ஈழத்தமிழ் மக்களுக்குப் போய்ச் சேருவதற்கு, இந்திய அரசு ஆவன செய்ய வேண்டும்.

பத்து நாள்களுக்கு முன்பு, இலங்கையின் தமிழ் நாடாளுமன்ற உறுப்பினர் சிவநேசன் படுகொலை செய்யப்பட்டார். இதுவரையிலும், நான்கு தமிழ் நாடாளுமன்ற உறுப்பினர்கள், படுகொலை செய்யப்பட்டு உள்ளனர். இந்தக் கொலைகளை இந்திய அரசு இதுவரையிலும் கண்டிக்கவில்லை.

இந்தியாவிடம் இராணுவ உதவிளைப் பெறுவதற்காக, இலங்கையின் இராணுவத் தளபதி சரத் பொன்சேகா இந்தியாவுக்கு வந்தார். தமிழர்களைக் கொன்று குவித்த, குருதி தோய்ந்த கைகளுக்குச் சொந்தக்காரரான இவருக்கு, இந்திய அரசு சிவப்புக் கம்பளம் விரித்துக்கொடுத்த வரவேற்பு, தமிழர்களின் உள்ளத்தில் மாறாத வடுவை ஏற்படுத்தி இருக்கிறது. "இந்தியாவின் துணையுடன் தமிழ்ப் போராளிகளைக் கொன்று ஒழிப்போம்' என்று கொக்கரித்து உள்ளார். அவரது இந்தக் கருத்துக்கு, இந்திய அரசு இன்றுவரையிலும் மறுப்பு எதுவும் தெரிவிக்கவில்லை.

எனவே, இந்திய அரசு இலங்கைக்கு வழங்கிய ரேடார்களை உடனடியாகத் திரும்பப் பெற வேண்டும் என்றும், எவ்வித ஆயுத உதவிகளையும் வழங்கக்கூடாது என்றும், இலங்கையில் வாழுகின்ற தமிழ் மக்களைப் பாதுகாக்க நடவடிக்கை மேற்கொள்ள வேண்டும் என்றும், இந்திய அரசை நான் வலியுறுத்துகிறேன்.

-தென் செய்தி