ஈரானின் அமைதியான அணுக்கொள்கைக்கு இலங்கை ஆதரவு

சர்வதேச அணுவாயுதக் கொள்கைகளுக்கு அமைவாகவும், சர்வதேச அணுசக்தி அதிகாரசபையின் கண்காணிப்பின் கீழும் ஈரானினால் மேற்கொள்ளப்படும் அணுவளச் செயற்பாடுகளுக்கு இலங்கை ஆதரவு தெரிவித்துள்ளது.

ஈரான் ஜனாதிபதி முஹமட் அஹமட் நஜாட்டின் இலங்கை விஜயம் தொடர்பாக இரண்டு நாடுகளும் கூட்டாக வெளியிட்டுள்ள அறிக்கையில் இந்த விடயம் குறிப்பிடப்பட்டுள்ளது.

உலகின் பலம் பொருந்திய நாடுகள் தமது அணுவாயுதங்களை அழிக்க வேண்டும் எனவும், இதன் மூலம் உலக மக்களுக்கு நன்மை கிடைக்கும் எனவும் அந்த அறிக்கையில் தெரிவிக்கப்பட்டுள்ளது.

பயங்கரவாதத்தை கண்டிப்பதாகவும், பயங்கரவாதத்தை இல்லாதொழிக்க சர்வதேச சமூகத்தின் ஒத்துழைப்பு அவசியம் எனவும் இரு நாட்டு தலைவர்களும் வலியுறுத்தியுள்ளனர்.

இலங்கையின் பௌதீக ஒருமைப்பாட்டை கருத்திற் கொண்டு மேற்கொள்ளப்படும் நடவடிக்கைகளுக்கு பூரண ஒத்துழைப்பு அளிப்பதாக ஈரான் ஜனாதிபதி தெரிவித்துள்ளார்.

மேலும், பயங்கரவாதத்தை இல்லாதொழிக்க அரசாங்கம் முன்னெடுக்கும் அனைத்து நடவடிக்கைகள் குறித்து ஈரான் அரசாங்கம் பாராட்டு தெரிவிப்பதாக அவர் குறிப்பிட்டுள்ளார்.

இரு நாடுகளுக்கும் இடையில் நிலவும் பொருளாதார, தொழில்நுட்ப, வர்த்தக மற்றும் கலாச்சார உறவுகள் வெகுவாக வளர்ச்சியடைந்துள்ளதாக ஈரான் ஜனாதிபதி தெரிவித்துள்ளார்.

பலஸ்தீனம், லெபனான் மற்றும் ஈராக்கில் நிலவும் சூழ்நிலை தொடர்பாகவும் இரு நாட்டுத் தலைவர்களும் கலந்துரையாடியுள்ளதாக வெளியிடப்பட்டுள்ள அறிக்கையில் தெரிவிக்கப்பட்டுள்ளது.