கிழக்கின் இனரீதியான வன்முறைகளுடன் முஸ்லிம் காங்கிரஸை தொடர்புபடுத்த சிலர் முயற்சி-ஹக்கீம் குற்றச்சாட்டு

ஏற்பட்டுள்ள இனரீதியான வன்முறைகளுடன் தொடர்புபடுத்தி முஸ்லிம் காங்கிரஸ் மீது வீண்பழி சுமத்துவதற்கு அரசாங்கத்துக்கு சார்புடைய சில சக்திகள் முயன்று வருவதாக ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் குற்றஞ்சாட்டினார்.

இதை நோக்காகக் கொண்டு காங்கிரஸின் பிரதேச தலைவர்களின் மீது வன்முறைகள் கட்டவிழ்ந்து விடப்பட்டுள்ளதாகவும் அவர் சுட்டிக்காட்டினார்.

கிழக்கு மாகாணத்தில் இடம்பெறும் வன்முறைச் சம்பவங்கள் தொடர்பில் தெளிவுபடுத்தும் ஊடகவியலாளர் மாநாடொன்று நேற்று பகல் ஸ்ரீலங்கா முஸ்லிம் காங்கிரஸ் தலைமையகமான தாருசலாமில் நடைபெற்றது. அதில் கலந்துகொண்டு கருத்து தெரிவித்த ரவூப் ஹக்கீம் மேலும் கூறியதாவது:

அண்மையில் நடந்து முடிந்த கிழக்கு மாகாண சபை தேர்தல் தினத்தில் இடம்பெற்ற மோசமான வன்முறைச் சம்பவங்களின் தொடர்ச்சியாக எமது கட்சியின் ஆதரவாளர்கள் மற்றும் பிரதேச தலைவர்களின் மீது அரசாங்கத்தின் ஆதரவாளர்கள், அமைச்சர்கள் தாக்குதல் நடத்தி வருகின்றனர்.

கொலை மற்றும் கடத்தல் சம்பவங்கள் காரணமாக ஏறாவூர், காத்தான்குடி பிரதேசங்களில் பதற்றமான சூழ்நிலை ஏற்பட்டுள்ளது. அங்கு எதிர்ப்பை வெளிப்படுத்தும் நோக்கில் ஹர்த்தால், கடையடைப்பு என்பனவும் மேற்கொள்ளப்பட்டுள்ளது. இந்நிலையில், வன்முறைகளுக்கு முடிவுகட்டி பிரதேசத்தில் அமைதியை ஏற்படுத்துவதற்கு புதிய முதலமைச்சருக்கு பூரண ஒத்துழைப்பை வழங்கியிருந்தோம்.

எனினும், இனரீதியான வன்முறைகளை ஸ்ரீலங்கா முஸ்லிம் காங்கிரஸ் தூண்டிவிடுவதாக எம்மீது வீண்பழி சுமத்தி பிரச்சினையை திசை திருப்பி சில சக்திகள் முயற்சித்து வருவதாக எமக்கு தகவல்கள் கிடைத்துள்ளன.

இதனை நோக்காகக் கொண்டு எமது பிரதேச தலைவர்கள் மீதும், ஆதரவாளர்கள் மீதும் வன்முறைகள் கட்டவிழ்ந்து விடப்பட்டுள்ளன. எமது பிரதேச தலைவர்களை கைது செய்வதற்கான சூழ்ச்சிகலும் இடம்பெறுகின்றன.

இதன் ஒரு பகுதியாகவே அட்டாளைச்சேனை பிரதேசசபை தலைவர் மசூர் சின்னலெப்பை மீது தாக்குதல் நடத்தப்பட்டுள்ளது. கடத்திச் செல்லப்பட்ட எமது இரு ஆதரவாளர்கள் மோசமாக தாக்கப்பட்டு காயமடைந்த நிலையில் பொலிஸாரினால் மீட்கப்பட்டுள்ளனர். தமிழ் முஸ்லிம் விவகாரத்தில் பிரச்சினைக்கு பேச்சுவார்த்தை மூலம் இருதரப்பினரது இணக்கத்துடன் தீர்வுகாணப்பட வேண்டும் என ஸ்ரீலங்கா முஸ்லிம் காங்கிரஸ் ஆரம்பத்திலிருந்தே வலியுறுத்தி வருகின்றது.

தமிழ் முஸ்லிம் பிரச்சினையை ஸ்ரீலங்கா முஸ்லிம் காங்கிரஸ் மிகவும் பொறுமையாகவும் பக்குவமாகவும் கையாண்டு வருகின்றது. இந்த நிலையில், கிழக்கில் ஏற்பட்டுள்ள இனரீதியான வன்முறைகளுடன் தொடர்புபடுத்தி எம்மீது வீண்பழி சுமத்த முயலும் சக்திகள் மீது கடுமையான அரசியல் நடவடிக்கை எடுக்கப்படும். ஸ்ரீலங்கா முஸ்லிம் காங்கிரஸ் இரு இனங்களின் ஒற்றுமைக்காகவும் பிரதேசத்தின் அமைதிக்காகவும் தொடர்ந்தும் பாடுபடும்.

வீரகேசரி நாளேடு