சோனானிகம இராணுவ முகாம் சிப்பாய்களின் உணவில் சையனைட் கலப்பு - இரசாயனப் பகுப்பாய்வாளர்

தெய்யத்தகண்டிய சோனானிகம இராணுவ முகாமில் உள்ள படையினர் திடீரென சுகவீனமடைந்தமைக்கான காரணம் அவர்கள் உண்ட உணவில் சயனைட் கலந்திருந்தமையே என விசாரணைகளில் இருந்து தெரியவந்துள்ளது.

இதனை அரச இரசாயன பகுப்பாய்வாளர் உறுதிப்படுத்தியுள்ளதாக மூத்த காவற்துறை அதிகாரி ஒருவர் தெரிவித்துள்ளார். படையினர் உட்கொண்ட மீனில் அந்த சயனைட் கலந்திருந்ததாகவும் சமைப்பதற்கு முன்னர் அந்த மீனில் சயனைட் கலக்கப்பட்டிருந்தாகவும் ஆரம்ப விசாரணைகளில் தெரியவந்துள்ளது.

படையினர் உட்கொண்ட மீனில் சயனைட்டைக் கலந்தது யார் அது எங்கு கலக்கப்பட்டது என்பது குறித்த தகவல்கள் எதுவும் கண்டறியப்படவில்லை. இதனடிப்படையில் இந்த சம்பவம் குறித்து விசாரணை நடத்த விசேட ரகசிய காவற்துறைக் குழுவொன்று நியமிக்கப்பட்டுள்ளது.

இதற்கமைய இந்த சம்பவத்துடன் தொடர்புடையவர்களைக் கைதுசெய்ய முடியும் என காவற்துறையினர் தெரிவித்துள்ளனர். கடந்த 28 ஆம் திகதி சோனானிகல முகாமில் காலை உணவை உட்கொண்ட 276 படையினர் சுகவீனமடைந்து வைத்தியசாலையில் அனுமதிக்கப்பட்டனர்.

சுகவீனமடைந்தவர்கள் பயிற்சி பெறும் இராணுவ சிப்பாய்கள் எனவும் இவர்களில் 155 பேர் தொடர்ந்தும் சிகிச்சை பெற்று வருவதாக இராணுவப் பேச்சாளர் பிரகேடியர் உதயநாணயக்கார தெரிவித்தார். அத்துடன் 4 பேர் பயிற்சியாளர்கள் எனவும் அவர் கூறியுள்ளார்.

http://www.tamilskynews.com/index.php?opti...s&Itemid=50