இலங்கைப் பிரச்சினை, தமிழகத்தில் ஏற்படுத்தியிருக்கும் கடும் எதிர்ப்புணர்வுக்கிடையே அகில இந்திய நேயர்களுக்கான ஒலிபரப்பு சேவையைத் தொடங்கியிருக்கிறது இலங்கை ஒலிபரப்புக் கூட்டுத்தாபனம். இலங்கைத் தமிழர்கள் மீதான தாக்குதலுக்கு தமிழகத்தில் கடும் எதிர்ப்பு நிலவிவருவதால், பதற்றத்தைத் தணிக்கும் இராஜதந்திரமாகவே வானொலி சேவை மீண்டும் தொடங்கப்பட்டிருப்பதாக கருதப்படுகிறது.

1925-ல் "கொழும்பு ரேடியோ' என்ற பெயரில் நிறுவப்பட்ட இந்நிலையம் 1972-ம் ஆண்டிலிருந்து "இலங்கை ஒலிபரப்புக் கூட்டுத்தாபனம்' என்ற பெயரில் ஏராளமான அலைவரிசைகளுடன் செயல்பட்டு வந்தது.

இதில், கடந்த கால் நூற்றாண்டாக மத்திய அலையில் ஒலிப்பரப்பாகிவந்த "கொழும்பு சர்வதேச நிலைய அலைவரிசை' கடந்த மே 31-ம் தேதியுடன் நிறுத்தப்பட்டது.

தென்னிந்திய வர்த்தகத்தைப் பிரதானமாகக்கொண்டு நடத்தப்பட்டுவந்த இந்த அலைவரிசை தமிழகத்தில் பரவலாக பண்பலை வானொலி நிலையங்கள் தொடங்கப்பட்டிருப்பதால் ஏற்பட்டுள்ள விளம்பர வருவாய் இழப்பு; கடும் நிதி நெருக்கடி காரணமாகவே நிறுத்தப்பட்டதாக அப்போது இலங்கை வானொலி நிலைய வட்டாரங்கள் தெரிவித்தன.

இனி, இலங்கை வானொலி அலைவரிசையை தமிழகத்தில் கேட்கவே முடியாது என்ற சூழல் ஏற்பட்டிருந்த நிலையில், ஓசைப்படாமல் கடந்த புதன்கிழமை முதல் மீண்டும் சேவையைத் தொடங்கியிருக்கிறது இலங்கை வானொலி நிலையம்.

பின்னணி என்ன?

இலங்கைத் தமிழர்கள் மீதான தாக்குதலுக்கு தமிழகத்தில் கடும் எதிர்ப்பு நிலவிவருவதால், பதற்றத்தைத் தணிக்கும் இராஜதந்திரமாகவே வானொலி சேவை மீண்டும் தொடங்கப்பட்டிருப்பதாக கருதப்படுகிறது.

இதை உறுதிபடுத்துவதுபோல இந்த அலைவரிசையின் பெயரும் மாற்றப்பட்டுள்ளது. ஏற்கெனவே, "கொழும்பு சர்வதேச நிலைய அலைவரிசை' என இருந்த பெயர் இப்போது "அகில இந்திய நேயர்களுக்கான ஒலிபரப்பு' என மாற்றப்பட்டுள்ளது.

ஏற்கெனவே, இரண்டு மணி நேரம் ஒலிபரப்பாகிவந்த இந்தச் சேவை இப்போது நான்கு மணி நேரமாக அதிகரிக்கப்பட்டுள்ளது.

தமிழகத்தின் "முக்கிய அரசியல்வாதிக'ளிடம் இதற்கென வாழ்த்துச் செய்திகள் பெறப்பட்டிருப்பதாகவும் விரைவில் அவை ஒலிபரப்பப்படும் என்றும் இலங்கை வானொலி நிலைய வட்டாரங்கள் தெரிவித்தன

இலங்கைப் போர் தொடர்பாக தமிழகத்தில் வெளியாகும் செய்திகள் இலங்கை அரசுக்கு கடும் நெருக்கடியை ஏற்படுத்தியிருக்கிறது.

இந்நிலையில், தன் தரப்பு செய்திகளை மக்களிடம் கொண்டுசெல்லும் ஊடகமாக வானொலியைப் பயன்படுத்திக்கொள்ள இலங்கை அரசு திட்டமிட்டிருப்பதாகத் தெரிகிறது.

இந்த அடிப்படையிலேயே மீண்டும் வானொலி ஒலிபரப்பை அந்நாட்டு அரசு தொடங்கியிருக்கிறது என்று கூறப்படுகிறது.

இதை உறுதிசெய்த இலங்கை வானொலி நிலைய வட்டாரங்கள் இப்போது பொழுதுபோக்கு நிகழ்ச்சிகள் மட்டுமே ஒலிபரப்பப்பட்டு வந்தாலும் விரைவிலேயே செய்தியும் ஒலிபரப்பப்படும் என்று தெரிவித்தன.

http://www.tamilwin.com/view.php?2e40QHbcb...dE2hr2cc0Fj0g3e

அதற்குப் பின்னணி நோக்கமெல்லாம் கிடையாது. உள்ள ஒரே நோக்கம் தமது அகிம்ஸாக் கொள்கையை தமிழ்நாட்டிலும் பரப்புவதுதான். கொஞ்சக் காலத்துக்குப் பிறகு மகிந்த தனது தம்பிமாரை புனித வெள்ளரசு மரக்கிளையோடு அங்கு அனுப்பினாலும் அனுப்புவார் பவுத்தம் பரப்புவதற்கு !!!!!