எமக்கு விடிவு கிடைக்கும் வரை எழுச்சிப் போராட்டங்களை தொடருங்கள்: இந்திய தமிழர்களிடம் கிழக்கு பல்கலைக்கழக மாணவர்கள் வேண்டுகோள்

எமக்கு விடிவு கிடைக்கும் வரை எழுச்சிப் போராட்டங்களை தொடருங்கள்: இந்திய தமிழர்களிடம் கிழக்கு பல்கலைக்கழக மாணவர்கள் வேண்டுகோள்

[வெள்ளிக்கிழமை, 07 நவம்பர் 2008, 01:32 பி.ப ஈழம்] [தாயக செய்தியாளர்]

ஈழத் தமிழர்களுக்கு சுதந்திரமானதும் நீதியானதுமான வாழ்வு கிடைக்கும் வரையில் உங்கள் எழுச்சிப் போராட்டங்கள் தொடரவேண்டும் என்று இந்தியா வாழ் தமிழ் உறவுகளிடம் கிழக்கு பல்கலைக்கழக மாணவர்கள் வேண்டுகோள் விடுத்துள்ளனர்.

இது தொடர்பில் கிழக்கு பல்கலைக்கழக மாணவர்கள் இன்று வெள்ளிக்கிழமை விடுத்துள்ள அறிக்கையில் தெரிவித்திருப்பதாவது:

ஆயுதமுனையில் பயணக் கைதிகளாக அகப்பட்டுள்ள சிக்கித் தவிக்கும் கிழக்கு வாழ் தமிழ் பேசும் மக்கள் சார்பில் கிழக்குப் பல்கலைக்கழக மாணவர்களாகிய நாம் இந்திய உறவுகளுக்கு விடுக்கும் உரிமையுடன் கூடிய வேண்டுகோள் இது.

பெரும் முனைப்போடு தமிழின அழிப்பினை மேற்கொண்டு வரும் பேரினவாத சிங்கள அரசின் சதித்திட்டத்திற்கு இரையாக்கப்படுகின்ற தமிழ் மக்களுக்கு ஆதரவாக இந்தியத் தமிழர்கள் கிளர்ந்தெழுந்துள்ள இந்நிலையில், அங்கு வாழும் அனைத்து மாணவர் சமூகங்களுக்கும், அரசியல் தலைவர்கள், புத்திஜீவிகள், நடிகர் சங்கங்கள்; அதனோடு சினிமாத்துறை சார்ந்த சங்கங்கள், ஊடகத்துறையினர், வர்த்தகர் சங்கங்கள் மற்றும் பொது அமைப்பினர் என எங்களுக்காக குரல் கொடுத்து வருகின்ற மற்றும் அகிம்சை போராட்டங்களை நடத்தி வருகின்ற அனைவருக்கும் கிழக்குப் பல்கலைக்கழக மாணவர்களின் சார்பில் நன்றியினை தெரிவித்துக்கொள்வதோடு, உரிமையுடன் சில உதவிகளையும் இத்தால் உங்களிடம் வேண்டி நிற்கின்றோம்.

மூன்று தசாப்தங்களுக்கு மேலாக தமிழின அழிப்பினை நோக்காகக்கொண்டு செயற்பட்டு வரும் சிங்கள பேரினவாத அரசு தமிழினத்திற்காக எந்த உரிமைகைளையும் வழங்கிடப்போவதில்லை என்பதே உண்மையும் வரலாறுமாகும்.

தமிழர்களின் கையில் இன்று திணிக்கப்பட்டுள்ள ஆயுதப்போராட்டத்தை பயங்கரவாதம் எனும் முத்திரையை குத்தி தமிழர்களின் உரிமைப்போராட்டத்தினை கொச்சைப்படுத்தியும், இன்று தமிழின அழிப்பை முழு மூச்சுடன் மேற்கொண்டு வரும் சிங்கள் அரசுக்கு எதிராக நீங்கள் மேற்கொள்ளும் ஆர்ப்பாட்டத்தினாலும் அதனை முன்னெடுக்க பல்வேறு வழிகளிலும் உதவி புரியும் எங்கள் உறவுகளின் பலத்தினாலும் ஈழத் தமிழர்களுக்கு சுதந்திரமானதும் நீதியானதுமான வாழ்வு கிடைக்கும் வரையில் உங்கள் எழுச்சிப் போராட்டங்கள் தொடரவேண்டும் என எங்கள் மக்களின் சார்பில் உங்களை வேண்டிநிற்கின்றோம் என்று அதில் மேலும் தெரிவிக்கப்பட்டுள்ளது.

புதினம்