ஜே.ஆர் பாணியில் கருத்துக் கணிப்பு? - ஜனாதிபதி ஆலோசனை

பாராளுமன்றத்தைக் கலைத்து பொதுத்தேர்தலொன்றை நடத்தாமல், பாராளுமன்றத்தின் ஆயுட்காலத்தை மேலும்

6 வருடங்களுக்கு நீடிப்பதற்கான கருத்துக்கணிப்பொன்றை நடத்துவது பற்றி ஜனாதிபதி மஹிந்த ராஜபக்ஸ தலைமையிலான அரசாங்கம் ஆலோசித்து வருவதாகத் தகவல்கள் வெளியாகியுள்ளன.

1977ஆம் ஆண்டு பாராளுமன்றத்தில் பெரும்பான்மையுடன் ஆட்சிக்கு வந்த முன்னாள் ஜனாதிபதி ஜே.ஆர்ஜெயவர்த்தன தலைமையிலான அரசாங்கம், 1983ஆம் ஆண்டு பொதுத் தேர்தலை நடத்தாமல் கருத்துக் கணிப்பை நடத்தி 1989ஆம் ஆண்டுவரை பாராளுமன்றத்தின் ஆட்சிக்காலத்தை அதிகரித்திருந்தது.

ஜே.ஆர்.ஜெயவர்த்தனவின் பாணியில் 2010ஆம் ஆண்டுக்கு முன்னர் கருத்துக் கணிப்பொன்றை நடத்தி 2004ஆம்ஆண்டு ஆட்சிக்கு வந்த அரசாங்கத்தை மேலும் ஆறு வருடங்களுக்கு நீடிப்பது பற்றி மஹிந்த ராஜபக்ஷ தலைமையிலான அரசாங்கம் தீவிரமாக ஆலோசித்து வருவதாகத் தகவல்கள் வெளியாகியுள்ளன.

அதேநேரம், கருத்துக் கணிப்புபொன்றுக்குச் செல்வதற்கு முன்னர் கலைக்கப்படாமலிருக்கும் 5 மாகாணசபைகளைக் கலைத்து அவற்றுக்கான தேர்தலை நடத்தி அரசாங்கத்துக்கு மக்கள் மத்தியிலிருக்கும் ஆதரவை அறிந்துகொள்வது பற்றியும் அரசாங்கம் ஆலோசித்து வருவதாகத் தெரியவருகிறது. இதன்மூலம் அரசாங்கத்தின் மீது மக்கள் வைத்திருக்கும் நம்பிக்கையை அளவிட்டுக்கொள்ளலாம் என ஆளும் கட்சியின் சில தலைவர்கள் கருதுவதாகத் தெரிகின்றது. அதன் பின்னர் தேசிய கருத்துக் கணிப்பொன்றை நடத்துவது சிறந்தது என அவர்கள் கூறியுள்ளதாகத் தகவல்கள் வெளியாகியுள்ளன.

அரசாங்கத்தின் இந்த நடவடிக்கைகள் பிரதான எதிர்க்கட்சியான ஐக்கிய தேசியக் கட்சியை விழிப்புறச் செய்துள்ளது. அரசாங்கத்தின் முன்னேற்பாடுகளைத் தொடர்ந்தே பொதுத் தேர்தலொன்றுக்கு அனைவரும் தயாராக இருக்கவேண்டுமென கடந்த வாரம் சிறிகொத்தாவில் நடைபெற்ற ஐக்கிய தேசியக் கட்சியின் நிறைவேற்றுக் குழுக் கூட்டத்தில் அக்கட்சியின் தலைவர் ரணில் விக்ரமசிங்க அழைப்புவிடுத்திருந்தார். அதேநேரம், ஏனைய எதிர்க்கட்சிகளை ஒன்றிணைத்து கூட்டணியொன்றை அமைப்பதில் முனைப்புக்காட்டிவரும் ஐக்கிய தேசியக் கட்சி, மக்கள் மத்தியில் அரசாங்கத்துக்கு எதிரான பிரச்சாரங்களை முன்னெடுப்பதற்கு இணைந்து செயற்படத் தீர்மானித்துள்ளது.

எனினும், ஐக்கிய தேசியக் கட்சி முன்னெடுத்த பல போராட்டங்கள் பிசுபிசுத்துப்போயுள்ள நிலையில் அரசாங்கத்தைத் தோற்கடிப்பதற்கான புதிய வழிமுறைகள் பற்றியும் அந்தக் கட்சி தீவிரமாக ஆராய்ந்து வருகிறது. எரிபொருள் விலையேற்றத்துக்கான மோட்hர் வாகன ஒலி எழுப்பல் போராட்டம், விலைவாசி அதிகரிப்புக்கு எதிரான போராட்டம் மாற்று வரவுசெலவுத்திட்டம் போன்றவை போதியளவு மக்கள் கவனத்தை ஈர்க்கவில்லை.

இவ்வாறானதொரு நிலையில் கருத்துக்கணிப்பொன்றை அரசாங்கம் நடத்துமாயின் அது அரசாங்கத்துக்கு மாத்திரமன்றி, அது எதிர்க்கட்சிக்குப் பாரிய சவாலாக அமையும் என எதிர்பார்க்கப்படுகிறது.

http://www.tamilskynews.com/index.php?opti...0&Itemid=53