ACF இராணுவ பாதுகாப்பு கோரவில்லை – உயர் இராணுவ அதிகாரி:

ACF இராணுவ பாதுகாப்பு கோரவில்லை – உயர் இராணுவ அதிகாரி:

http://www.globaltamilnews.net/tamil_news....d=2903&cat=

ஏ.சீ.எப். தொண்டு நிறுவனம் இராணுவப் பாதுகாப்பை கோரியிருக்கவில்லை என மூதூர் தன்னார்வ தொண்டு ஊழியர்கள் படுகொலை தொடர்பான ஜனாதிபதி ஆணைக்குழுவிற்கு சாட்சியமளித்த உயர் இராணுவ அதிகாரி குறிப்பிட்டுள்ளார்.

மூதூர் பிரதேசத்தில் தன்னார்வ தொண்டு ஊழியர்கள் படுகொலை செய்யப்பட்டுள்ளதாக அரசாங்க அதிபர் வழங்கிய தகவல்களை அடுத்து படையினரை சம்பவ இடத்திற்கு அனுப்பி வைத்ததாக திருகோணமலை இராணுவ கமாண்டர் சாட்சியமளித்துள்ளார்.

சடலங்களை பார்வையிட்ட சில பொதுமக்கள் அரசாங்க அதிபருக்கு அறிவித்துள்ளதாகவும், பின்னர் இரண்டரை மணித்தியாலங்களுக்கு பின்னர் தமது படையினர் அங்கு சென்றதாகவும் அவர் குறிப்பிட்டுள்ளார்.

ஆகஸ்ட் மாதம் 6ம் திகதிக்கு பின்னரே இராணுவத்தினர் மூதூர் நகரிற்கு சென்றதாக சாட்சி தெரிவித்துள்ளார்.

ஆகஸ்ட் மாதம் 2 – 4ம், 5ம் திகதிகளில் தமிழீழ விடுதலைப் புலிகளின் மூதூரில் நிலை கொண்டிருந்ததாக அவர் சுட்டிக்காட்டியுள்ளார்.

விடுதலைப் புலிகள் மூதூர் பிரதேசத்திலிருந்து தீவிர ஆட்டிலறி தாக்குதல்களை படையினர் மீது மேற்கொண்தாக அவர் மேலும் குறிப்பிட்டுள்ளார்.

எனினும், 4ம் திகதி மாலை முதல் மூதூரில் விடுதலைப் புலிகளின் நடமாட்டம் குறிப்பிடத்தக்களவு குறைவடைந்திருந்ததாக அவர் ஒப்புக் கொண்டுள்ளார்.

மூதூர் துறைமுகப் பகுதியை கைப்பற்றுவதே தமது முதன்மை நோக்கமாக காணப்பட்டதாக இராணுவக் கமாண்டர் மேலும் தெரிவித்துள்ளார்.

போர்நிறுத்தக் கண்காணிப்புக்குழுவின் தலைவர் உல்ப் வெல்கின்சன் தன்னையோ அல்லது தனது அதிகாரிகளையோ தொடர்பு கொண்டு தகவல்களை பெற்றுக்கொள்ளவில்லை என அவர் குறிப்பிட்டுள்ளார்.

ஏ.சீ.எப் நிறுவனத்தினால் 17 தன்னார்வ தொண்டு ஊழியர்களுக்கு பாதுகாப்பளிக்குமாறு கோரிக்கை விடுக்கப்பட்டதாக தெரிவிக்கப்படும் தகவல்களில் உண்மையில்லை என அவர் தெரிவித்துள்ளார்.

அவ்வாறான எந்தவொரு கோரிக்கையும் இராணுவத்தினரிடம் முன்வைக்கப்படவில்லை என அவர் சுட்டிக்காட்டியுள்ளார்.

இதேவேளை, குறித்த தொண்டு ஊழியர்களின் பாதுகாப்பு வழங்குமாறு உயர் பாதுகாப்பு அதிகாரிகளிடம் கோரிக்கை விடுத்ததாக ஏ.சீ.எப். நிறுவனம் சாட்சியமளித்திருந்தமை குறிப்பிடத்தக்கது.

சிரேஸ்ட காவற்துறை அத்தியட்சகர் நிமால் சமரக்கோன் தலைமையில் நடைபெற்ற பாதுகாப்பு கூட்டத்தின் போது இந்த சம்பவம் குறித்து தகவல்கள் வெளியிடப்படாமை ஆச்சரியமளிப்பதாக அவர் மேலும் தெரிவித்துள்ளார்.