காங்கிரஸின் சமரச முயற்சி தோல்வி - அதிமுகவுடன் பாமக சேருவது உறுதியானது

டெல்லி: பாமகவை தக்க வைத்துக் கொள்ள காங்கிரஸ் கட்சி மேற்கொண்ட கடைசிக் கட்ட முயற்சியும் தோல்வியில் முடிந்தது. இதனால் பாமக, அதிமுக கூட்டணி ஏற்படுவது கிட்டத்தட்ட உறுதியாகி விட்டது.

திமுகவுக்கும், பாமகவுக்கும் இடையே ஆரம்பித்த சாதாரண வார்த்தைப் போர் பெரும் விரிசலாகி தற்போது இரு கட்சிகளும் மீண்டும் கூட்டணியில் சேர முடியாத அளவுக்கு இறுகிப் போய் விட்டது.

கட்சித் தலைவர்கள் மட்டத்தில் மீண்டும் அணி சேர்ந்து லோக்சபா தேர்தலை சந்திக்கலாம் என்ற விருப்பம் இருந்தாலும் கூட கட்சித் தொண்டர்கள் மத்தியில் அத்தகைய இணக்கமான போக்கு இல்லை.

இதுதான், டாக்டர் ராமதாஸ், திமுகவுடன் மீண்டும் கூட்டணி சேருவதற்கு தயக்கம் காட்ட முக்கிய காரணமாக கூறப்படுகிறது.

நடந்ததை மறந்து பாமகவை மீண்டும் அணியில் தக்க வைத்துக் கொள்ள திமுக பச்சைக் கொடி காட்டிய பிறகும் கூட பாமக தரப்பில் தயக்கம் அகலவில்லை. மாறாக, அதிமுக அணியில் சேர வேண்டும் என கட்சிக்குள் குரல் எழும்பவே அந்த வாய்ப்பையும் பரிசீலிக்க ஆரம்பித்ததது பாமக.

பாமகவுக்கு சாதகமாக அதிமுக நடந்து கொள்ளவே இப்போது அதிமுக அணிக்கு பாமக வருவது கிட்டத்தட்ட உறுதியாகி விட்டது.

பாமகவை சமாதானப்படுத்த காங்கிரஸ் தலைவர்கள் தங்கபாலு, சுதர்சனம் ஆகியோர் கடுமையாக முயன்றனர். அதேபோல, விடுதலைச் சிறுத்தைகள் தலைவர் திருமாவளவனும், ராமதாஸை சமாதானப்படுத்த அவரை பலமுறை நேரில் பார்த்துப் பேசினார். அப்படியும் அவர் சமாதானம் ஆகவில்லை.

இந்த நிலையில், கடைசிக் கட்ட முயற்சியாக நேற்று டெல்லியில் மத்திய அமைச்சர் அன்புமணி ராமதாஸை, காங்கிரஸ் கட்சி பேச்சுவார்த்தைக்கு அழைத்தது.

சோனியா காந்தியின் அரசியல் ஆலோசகர் அகமது படேல், டாக்டர் அன்புமணியை பேச்சுவார்த்தைக்கு அழைத்திருந்தார்.

பேச்சுவார்த்தையின்போது டாக்டர் அன்புமணியுடன், அவரது மாமனாரும், முன்னாள் தமிழக காங்கிரஸ் தலைவருமான கிருஷ்ணசாமி, மாநிலத் தலைவர் தங்கபாலு ஆகியோரும் உடன் இருந்தனர்.

இந்தக் கூட்டத்தில் அன்புமணி ராமதாஸ், தனது கட்சியின் நிலையை காங்கிரஸுக்கு உறுதியாகவும், தெளிவாகவும் விளக்கியுள்ளார்.

அன்புமணி கூறுகையில், எங்களுக்கு காங்கிரஸுடன் கூட்டணி சேருவதில் எந்தவித ஆட்சேபனையும், தயக்கமும், யோசனையும் இல்லை.

ஆனால் இரு கட்சிகளையும் (திமுக, பாமக) சேர்ந்த தொண்டர்கள் மத்தியில் முன்பு போல இணக்கமான, நட்புறவு இல்லை. கடந்த காலத்தில் நடந்த கசப்பான அனுபவங்களை மறக்க இரு கட்சித் தொண்டர்களும் தயாராக இல்லை.

இந்த நிலையில் நாம் அணி சேர்ந்தால் அதனால் பலன்களுக்குப் பதில் பாதகங்களே அதிகமாக இருக்கும் என்று எடுத்துக் கூறியுள்ளார் அன்புமணி.

அன்புமணியின் வாதத்தை மறுதலித்து சமாதானப்படுத்த காங்கிரஸ் தலைவர்களால் முடியவில்லை என்று கூறப்படுகிறது.

கிட்டத்தட்ட முக்கால் மணி நேரம் இந்த சந்திப்பு நடந்துள்ளது. இறுதியில் எந்தவித முடிவும் ஏற்படாததால் பேச்சுவார்த்தை தோல்வியில் முடிந்தது.

வேட்பாளர்கள் - ராமதாஸ் தீவிரம்

காங்கிரஸ் மேற்கொண்ட இறுதி முயற்சியும் தோல்வியில் முடிந்து விட்டதால், பாமக தனது அடுத்த கட்ட வேலைகளில் தீவிரமாகியுள்ளது.

தற்போது தைலாபுரம் தோட்டத்தில் டாக்டர் ராமதாஸ் தங்களது கட்சி போட்டியிடப் போகும் தொகுதிகளின் நிர்வாகிகளை அழைத்து தீவிர ஆலோசனை நடத்தி வருகிறாராம்.

வேட்பாளர்களாக யாரை நிறுத்தலாம் என்பது குறித்தும் அவர் ஆலோசனை நடத்தி வருகிறார்.

கடைசியாக தெரிந்த தகவலின்படி பாமக, புதுச்சேரி, ஆரணி, கள்ளக்குறிச்சி, சிதம்பரம், தர்மபுரம், காஞ்சிபுரம், அரக்கோணம் ஆகிய தொகுதிகளில் போட்டியிடும் எனத் தெரிகிறது. இதுதவிர ஒரு ராஜ்யசபா சீட்டையும் பாமகவுக்கு அதிமுக தருகிறது.

இன்று அல்லது நாளை அன்புமணி, வேலு விலகல்

திமுக கூட்டணியில் பாமக இல்லை என்பது கிட்டத்தட்ட முடிவாகி விட்டதால், இன்று அல்லது நாளை மத்திய அமைச்சர் பதவிகளை அன்புமணி ராமதாஸும், வேலுவும் ராஜினாமா செய்யவுள்ளனர்.

நாளை காலை 11 மணிக்கு சென்னை அருகே உள்ள வானகரத்தில் ஸ்ரீவாரி வெங்கடாசலபதி திருமண மண்டபத்தில் பாமக பொதுக்குழு கூட்டம் நடைபெறுகிறது.

இக்கூட்டத்தில் கூட்டணிக்கு ஒப்புதல் பெறப்படுகிறது. இதையடுத்து டாக்டர் ராமதாஸ், தனது கட்சியின் முடிவை செய்தியாளர்களுக்கு அறிவிப்பார். அதன் பின்னர் அவர் போயஸ் தோட்டம் சென்று ஜெயலலிதாவை சந்திக்கிறார் என பாமக வட்டாரங்களில் கூறப்படுகிறது.

நன்றி தற்ஸ் தமிழ்