தமிழர்களை கொத்தடிமைகளாக்குவதற்கு போர் வெற்றியை அரசு பயன்படுத்தப்போகின்றதா?: மனோ கணேசன் கேள்வி

தமிழ் மக்களை அதிகாரமற்ற கொத்தடிமைகளாக்குவதற்காகவா அரசு போர் வெற்றியைப் பயன்படுத்தப்போகின்றது எனக் கேள்வி எழுப்பியிருக்கும் ஜனநாயக மக்கள் முன்னணியின் தலைவர் மனோ கணேசன், இடம்பெயர்ந்தவர்களுக்கான முகாம்களில் உள்ள தமிழர்கள் விலங்குகளை விடவும் கேவலமான நிலையில் நடத்தப்படுவதாகவும் குற்றம் சாட்டினார்.

கொழும்பில் நேற்று செவ்வாய்க்கிழமை மங்கள சமரவீரவுடன் இணைந்து நடத்திய ஊடகவியலாளர் மாநாட்டில் கலந்துகொண்டு உரையாற்றியபோதே மனோ கணேசன் இவ்வாறு தெரிவித்தார்.

சிறிலங்கா சுதந்திரக் கட்சியின் மக்கள் பிரிவு தலைமை அலுவலகத்தில் நேற்று நடைபெற்ற ஊடகவியலாளர் மாநாட்டில் உரையாற்றிய அவர் மேலும் தெரிவித்ததாவது:

"நலன்புரி நிலையங்களில் உள்ளவர்கள் பாரிய அவலங்களை எதிர்நோக்கியவாறு தவிக்கின்றனர். அங்கு விலங்குகளைவிட கேவலமான நிலையில் அவர்கள் உள்ளனர். இன்று போர் முடிவடைந்துள்ள நிலையில் அரசியல் தீர்வுத் திட்டம் ஒன்று அவசியமாகும்.

13 ஆவது திருத்தத்துக்கு மேலாகச் செல்லப்போவதாக இந்தியாவிடம் அரச தலைவர் சொல்கின்றார். அரசுடன் இணைந்துள்ள விமல் வீரவன்ச மற்றும் சம்பிக்க ரணவக்க போன்றவர்களுக்கு வேறொன்று கூறப்படுகின்றது. அரசியல் தீர்வு ஒன்றை அரசு முன்வைக்கும் போது கட்சி பேதங்களுக்கு அப்பால் சென்று ஆதரவளிக்க நாம் தயாராகவுள்ளோம்.

அரசாங்கத்தில் உள்ள சிலர் 13 ஆவது திருத்தத்தை நடைமுறைப்படுத்துவது தொடர்பான இயக்கம் ஒன்றை தொடங்கினர். இருந்த போதிலும், இப்போது அது நிறுத்தப்பட்டுள்ளது. தமிழ் மக்களை அதிகாரம் அற்ற கொத்தடிமைகளாக்குவதற்காகவா போர் வெற்றியை அரசு பயன்படுத்தப் போகின்றது எனக் கேள்வி எழுப்ப விரும்புகின்றோம்.

அரசியல் தீர்வைப் பொறுத்தவரையில் 13 ஆவது திருத்தத்தை நடைமுறைப்படுத்த வேண்டும். அதாவது எமது அரசியலமைப்பில் இனநெருக்கடிக்குத் தீர்வைக் கூறக்கூடிய விதமாக 13 ஆவது திருத்தம் மட்டுமே இப்போதைய நிலையில் இருப்பதால் அதனை நடைமுறைப்படுத்துவது தீர்வுக்கான ஆரம்பமாக அமையும்."

இவ்வாறு மனோ கணேசன் தெரிவித்தார்.

புதினம்