வளைத்து போடுதல், அச்சுறுத்தல்,பணிய வைத்தல் - யாழில் நடைபெறுபவை - சிறிகாந்தா

மக்களை சுதந்திரமாக வாக்களிக்க விட்டால் எம்மை அமோகமான முறையில் வெற்றியீட்டச் செய்வார்கள். எனினும் அச்சுறுத்தல், அபகரிப்பு, வளைத்துப் போடுதல் மூலமாக மக்களைப் பணியவைக்கும் முயற்சிகளே மேற்கொள்ளப்படுகின்றன என்று தமிழ்த் தேசியக் கூட்டமைப்பு எம்.பியான என். சிறிகாந்தா தெவித்தார்.

மக்களின் தீர்ப்பை மாற்றியமைக்கும் முயற்சிகள் மேற்கொள்ளப்படுகின்றன. இது அரசாங்கத்தின் மீதான மக்களின் நம்பிக்கையை இல்லாது செய்யும் என்பதுடன் ஜனநாயக விரோதச் செயற்பாடுமாகும் என்றும் அவர் சொன்னார்.

பாராளுமன்றத்தில் நேற்று நடைபெற்ற அவசரகாலச் சட்டத்தை மேலும் ஒரு மாதத்திற்கு நீடிப்பதற்கான பிரேரணை மீதான விவாதத்தில் கலந்து கொண்டு உரையாற்றும் போதே அவர் மேற்கண்டவாறு தெரிவித்தார்.

அவர் தொடர்ந்து உரையாற்றுகையில் யாழ், வவுனியா மாநகர, நகரசபைத் தேர்தல், அங்கு நடைபெறும் உண்மையான விடயங்களை வெளிக்கொணர வேண்டும்.

யுத்தம் முடிவடைந்து அதன் தாக்கங்களின் கொடூரங்களில் மக்கள் வாழ்ந்து கொண்டிருக்கின்றனர். மக்கள் அவர்களின் விருப்பத்திற்கு மாறாகத் தடுத்து வைக்கப்பட்டுள்ள நிலையில், அவர்கள் தேர்தலைக் கோரவில்லை.

அவசரத் தேவைக்காக மக்கள் மீது தேர்தல் திணிக்கப்பட்டுள்ளது. தோழமை தமிழ்க் கட்சிகளையும் இணைத்துக் கொண்டு அரச இயந்திரத்தைப் பயன்படுத்தி வெற்றிக்காக அரச தரப்பினர் உழைக்கின்றனர். இது எமக்கு ஏமாற்றத்தைத் தருகின்றது.

யுத்தம் முடிவடைந்துள்ள நிலையில், பிரச்சினைக்குத் தீர்வு காண்பதற்கு முயற்சிகளை மேற்கொண்டு, வரலாற்று அரசியல் தீர்வைக் காணாது குறுகிய அரசியல் இலாபத்திற்காக தேர்தல் நடத்தப்படுகின்றது.

ஈ.பி.டி.பி. சொந்தச் சின்னத்தில் போட்டியிட விரும்பினாலும், நிலைமை தலைகீழாக மாறி அரசாங்கத்தின் பிரதான கட்சியின் சின்னத்தில் போட்டியிட வேண்டியுள்ளது என்பது மட்டுமல்லாது திட்டமிட்ட தேர்தல் என்பதை மக்கள் தெளிவாகப் புரிந்து வைத்துக் கொண்டுள்ளனர்.

யுத்தத்தில் ஏற்பட்ட இழப்புக்கள் தொடர்பில் சர்வதேசத்தில் குற்றஞ்சாட்டப்பட்டுள்ள நிலையில், தமிழர்கள் செறிந்து வாழும் பகுதியில் அரசாங்கம் தேர்தலில் வெற்றியீட்டினால் அரசாங்கத்திற்கு எதிரான குற்றச்சாட்டு நீங்கிவிடும் என்பதனால், சவாலை ஏற்றுக் கொண்டே கூட்டமைப்பு இரு தேர்தல்களிலும் போட்டியிடுகின்றது.

மீன்பிடித் தடை நீக்கப்பட்டுள்ளது என்று கூறப்பட்டாலும் அங்கொன்றும் நடந்ததில்லை. வாக்காளர் அட்டைகள் தபால் நிலையங்களிலும் இல்லை. இல்லாதவர்களின் வாக்காளர் அட்டைகள் ஈ.பி.டி.பி.யினால் பலவந்தமாக அபகரிக்கப்பட்டுள்ளன.

கட்சித் தலைவன் புகைப்படத்துடன் சுவரொட்டிகள், பதாகைகள் வைப்பது தேர்தல் சட்டத்தை மீறும் செயல் இல்லையா? படைத்தரப்பு வாகனத்தைப் பயன்படுத்துவது சட்டத்தை மீறும் செயல் இல்லையா?

வவுனியா பொலிஸ் அதிகாரிகள், சட்டத்தை அமுல்படுத்துவதற்கு துணிந்து, துடித்துக் கொண்டிருக்கின்ற நிலையில் அவர்களின் கைகள் கொஞ்சம் கொஞ்சமாக கட்டப்படுகின்றன.

என கூறினார் அவர்.

மேலதிக செய்திகளுக்கு....

Edited August 7, 200916 yr by forlov