கடற்கண்காணிப்பு, பாதுகாப்பு தொடரவேண்டும்: மன்னார் பயணத்தின்போது கடற்படைத் தளபதி

நாட்டின் கடற்கரைப் பிராந்தியத்தில் தொடர்ந்தும் கண்காணிப்பு நடவடிக்கைகளை மேற்கொள்ள வேண்டிய அவசியத்தையும், கடலில் சுற்றுக்காவல் நடவடிக்கைகளைத் தொடர வேண்டியதன் தேவையையும் சிறிலங்காவின் புதிய கடற்படைத் தளபதி திசாரா சமரசிங்க வலியுறுத்தியிருக்கின்றார்.

மன்னார் பகுதியில் புதிதாக அமைக்கப்பட்டுள்ள கடற்படையின் வடமேற்கு கட்டளைத் தலைமையகத்துக்குப் பயணம் ஒன்றை முதல் தடவையாக மேற்கொண்டிருந்த கடற்படைத் தளபதி, அங்கு கடற்படை அதிகாரிகளுடன் கருத்துப் பரிமாறியபோதே இவ்வாறு தெரிவித்தார்.

கடந்த காலத்தில் விடுதலைப் புலிகளின் செயற்பாடுகள் பெருமளவுக்குக் காணப்பட்ட மன்னார் கடற்பகுதியின் பாதுகாப்பு தொடர்பாகக் கருத்து வெளியிட்ட அவர், இந்தப் பகுதியில் தொடர்ந்தும் கடலோரக் கண்காணிப்பு நடவடிக்கைகளை மேற்கொள்ளப்பட வேண்டியதன் அவசியத்தை வலியுறுத்தினார்.

மன்னார் பகுதியில் கடற்படையினர் தொடர்ந்தும் விழிப்பாக இருக்க வேண்டியதன் அவசியம் தொடர்பாகவும், குடிமக்களிள் விடயங்கள் தொடர்பாகவும் மூத்த கடற்படை அதிகாரிகளுடன் விரிவான பேச்சுக்களை கடற்படைத் தளபதி மேற்கொண்டார்.

இந்தப் பயணத்தின்போது புதிதாகப் புனரமைக்கப்பட்ட எழுவான்குளம் - முருங்கன் வீதியையும் பார்வையிட்ட கடற்படைத் தளபதி, இந்தப் பணிகளை கடற்படையினர் சிறப்பான முறையில் மேற்கொண்டிருப்பதையிட்டு பாராட்டுதல்களையும் தெரிவித்தார்.

புதினம்