பயங்கரவாத தடைச்சட்டத்தின் கீழான தடுப்புக்காவல் கைதிகளை அரசியல் கைதிகளாக நடத்த முடியாது: பிரதி அமைச்சர் புத்திரசிகாமணி

பயங்கரவாத தடைச் சட்டத்தின் கீழ் சிறிலங்காவில் உள்ள சிறைச்சாலைகளில் தடுத்து வைக்கப்பட்டுள்ள தமிழ்க் கைதிகள் தம்மை அரசியல் கைதிகளாக நடத்த வேண்டும் எனக் கோரிக்கை விடுத்துள்ள அதேவேளையில், இவர்கள் பல்வேறு பயங்கரவாத குற்றச்சாட்டுக்களில் தடுத்து வைக்கப்பட்டிருப்பதால் இவர்களை அரசியல் கைதிகளாக நடத்த முடியாது என நீதித்துறை பிரதி அமைச்சர் வி.புத்திரசிகாமணி திட்டவட்டமாக மறுத்துவிட்டார்.

வெலிக்கடை சிறைச்சாலையில் பயங்கரவாத தடைச் சட்டத்தின் கீழ் தடுத்துவைக்கப்பட்டுள்ள 266 கைதிகள் தம்மை விடுதலை செய்யுமாறு கோரி உண்ணாநிலைப் போராட்டம் ஒன்றை அண்மையில் நடத்தினார்கள்.

அதனைத் தொடர்ந்து அவர்கள் அரசிடம் கையளித்துள்ள மனுவில் தம்மை அரசியல் கைதிகளாக நடத்த வேண்டும் எனக் கோரியிருந்தார்கள்.

இது தொடர்பாக அரசு உடனடியாக சட்ட நடவடிக்கை எடுக்க வேண்டும் எனவும் தாம் உடனடியாக நீதிமன்றத்தில் நிறுத்தப்பட்டு விடுதலை செய்யப்பட வேண்டும் எனவும் அவர்கள் கோரியிருந்தார்கள்.

இவர்களில் பல இளைஞர்கள் கடந்த 15 வருட காலமாக விசாரணைகளோ குற்றச்சாட்டுக்களோ இல்லாமல் தடுத்துவைக்கப்பட்டுள்ளனர்.

இது தொடர்பாக பி.பி.சி.யின் சிங்கள சேவையான சந்தேசியவுக்கு கருத்து வெளியிட்ட நீதித்துறைப் பிரதி அமைச்சர் வி.புத்திரசிகாமணி, "இவர்கள் பல்வேறு பயங்கரவாதக் குற்றச்சாட்டுக்களில் சந்தேக நபர்களாகக் காணப்பட்டு தடுத்து வைக்கப்பட்டுள்ளார்கள். இவர்கள் தாம் அரசியல் கைதிகள் எனத் தெரிவித்தாலும் கூட எம்மால் அவர்களை அவ்வாறு நடத்த முடியாது" எனத் தெரிவித்தார்.

"ஆனால் ஜோர்ஜ் மாஸ்டர், தயா மாஸ்டர் ஆகியோர் பாதுகாப்பு படையினரிடம் சரணடைந்தவர்கள் என்பதால் அவர்கள் விடுதலை செய்யப்பட்டுள்ளார்கள்" எனவும் பிரதி அமைச்சர் புத்திரசிகாமணி விளக்கமளித்தார்.

இருந்தபோதிலும் இந்த தடுப்புக்காவல் கைதிகளின் கோரிக்கைகளை அரசு எதிர்காலத்தில் பரிசீலனை செய்யும் எனவும் பிரதி அமைச்சர் தெரிவித்தார்.

புதினம்