நிதி மற்றும் ஏனைய நிர்வாகக் சீர்கேடுகளினால் சிறிலங்கன் எயார் லைன்ஸ், சிறிலங்கா ரெலிகொம் ஆகிய நிறுவனங்கள் மூடப்படும் அபாயம் தோன்றியுள்ளதாக ஐ.தே.க.வின் மேல் மாகாண சபை உறுப்பினர் நிரோஷன் பாதுக்க தெரிவித்தார்.

2008ஆம் ஆண்டில் 7367 மில்லியனை சிறிலங்கா ரெலிகொம் நிறுவனம் இலாபமாக ஈட்டியது. கடந்த வருடத்தின் முதல் 6 மாதங்களில் 1363 மில்லியன் ரூபாவை வருமானமாக பெற்றுக் கொண்ட போதிலும் இவ்வாண்டில் 1817 மில்லியன் ரூபா நஷ்டம் ஏற்பட்டுள்ளதாகவும் தெரிவித்தார்.

ஐக்கிய தேசியக் கட்சியின் செய்தியாளர் மாநாடு எதிர்க்கட்சித் தலைவர் அலுவலகத்தில் நடைபெற்றபோதே நிரோஷன் பாதுக்க மேற்கண்டவாறு கூறினார். இவர் இங்கு தொடர்ந்தும் உரையாற்றுகையில், தற்போதைய அரசாங்கம் தேசிய சொத்துக்களை பாதுகாப்பதாகக் கூறிக் கொண்டு அவற்றைச் சூறையாடி வருகின்றது. இலங்கையின் தேசிய விமான சேவையான சிறிலங்கன் நிறுவனம் பாரியளவில் நஷ்டத்தை எதிர்கொள்ள வேண்டிய நிலை தோன்றியுள்ளது.

இதற்கு காரணம் நஷ்டம் காரணமாக இடை நிறுத்தப்பட்டு மீண்டும் ஆரம்பிக்கப்பட்டுள்ள மிஹின் லங்கா விமான சேவையை கொண்டு நடத்த சிறிலங்கன் நிறுவனத்தை பயன்படுத்துகின்றமையாகும்.

அதேபோன்றே இலங்கையின் மற்றொரு சொத்தான சிறிலங்கா ரெலிகொம் நிறுவனம் பாரியளவிலான வீழ்ச்சியினைக் கண்டு வருகின்றது. இதற்குக் காரணம் ரெலிகொம் நிறுவனத்தின் துணை நிறுவனமான மொபிடெல் நிர்வாகத்தினரின் வீண் விரயங்களாகும்.

மொபிடெல் நிறுவனம் எவ்விதமான சட்டரீதியான நிதி நிர்வாகத்தையும் கடைப்பிடிப்பதாகத் தெரியவரவில்லை. அண்மையில் இலங்கை கிக்கெட் அணிக்கு வழங்கப்பட்ட அனுசரணை உட்பட விளம்பரங்களுக்காக பயன்படுத்தப்பட்ட நிதிகளில் இருந்து அது நிரூபணமாகின்றது.

டென்ஸ்போர்ட் நிறுவனத்திற்கு மொபிடெல் விளம்பரத்திற்காக 171 மில்லியன், அவர்களுக்கு அண்மையில் வழங்கப்பட்ட இரவு விருந்துபசாரத்திற்காக 40 இலட்சம் ரூபா மற்றும் இலங்கை பாகிஸ்தான் அணிகளுக்கான இரவு நேர விருந்துபசாரத்திற்கு 40 இலட்சம் ரூபா என கடந்த மூன்று மாதத்தில் மாத்திரம் மொபிடெல் நிறுவனம் 742 மில்லியன் ரூபாவினை செலவழித்துள்ளது.

மாதம் ஒன்றிற்கு பொதுமக்களிடமிருந்து 700 மில்லியனுக்கு அதிகமான தொகையை வரியாகப் பெற்றுக் கொண்டுள்ள போதிலும் அண்மையில் அமெரிக்க வங்கியொன்றில் இருந்து 100 மில்லியன் அமெரிக்க டொலர்களை ரெலிகொம் நிறுவனம் கடனாக பெற்றுக் கொண்டுள்ளது.

அரசாங்கம் தமக்குத் தேவையானவர்களை அரச நிறுவனங்களின் உயர் பதவிகளில் அமர்த்தியமையால் அரசிற்குச் சொந்தமான பாரிய நிறுவனங்கள் நெருக்கடிக்குள் சிக்கியுள்ளன என்றார்.

நஷ்டத்தில், செல்லும் சிறிலங்கா எயார் லைன்ஸ், டெலிகொம் - மூடப்படும் அபாயம்?

சந்தோசம்.