பலாலிவிமான நிலையத்தை சூழவுள்ள தமது காணிகளை மீட்க சங்கம் அமைப்பு

பலாலி விமான நிலையச் சூழலில் குடியமர்ந்திருந்த மக்கள் மீண்டும் அங்கு தம்மைக் குடியமர அனுமதிக்குமாறு கோரியுள்ளதுடன் இந்த நடவடிக்கைகளை முன்னெடுக்க சங்கம் ஒன்றினையும் நிறுவியுள்ளனர். மல்லாகம் மகா வித்தியாலயத்தில் கடந்த சனிக்கிழமை கூடிய அந்தப் பிரதேச மக்கள் தமக்கு நஷ்டஈடு வழங்கி மீளக்குடியமர அனுமதிக்குமாறு கோரும் தீர்மானம் ஒன்றையும் நிறைவேற்றியுள்ளனர். மயிலிட்டி வடக்கு, மயிலிட்டி தெற்கு, பலாலி மேற்கு, வசாவிளான் ஆகிய கிராமங்களைச் சேர்ந்தவர்கள் இக்கூட்டத்தில் கலந்து கொண்டனர். தமது பிரதேசத்தைச் சேர்ந்த வளம் மிக்க காணிகளை சுவீகரிக்க எடுக்கும் நடவடிக்கைகளைக் கைவிட்டு, தமது நிலங்களைத் தங்களிடம் ஒப்படைக்குமாறு கூடியிருந்த மக்கள் கோஷம் எழுப்பினர்.

தொடர்ந்து "பலாலி விமான நிலைய விஸ் தரிப்பினால் பாதிப்புறும் பகுதி மக்களின் ஒன்றியம்" என்ற அமைப்பு உருவாக்கப்பட்டுள்ளது. தாங்கள் இழந்த சொத்துக்களின் பெறுமதியையும் கடந்த 25 வருட கால தொழில்பாதிப்புக்கான நட்டத்தையும் அரசாங்கத்திடம் கோருவதுடன் போர் காலங்களிற்கு முன்பு விமானநிலையத்துக்கு அருகே குடியிருந்து வாழ்ந்தது போல் மீண்டும் எங்களைக் குடியமர்ந்து இருப்பதற்கு அனுமதிக்குமாறு ஜனாதிபதியையும், யாழ்.மாவட்ட நாடாளுமன்ற உறுப்பினர்கள் அனைவரையும், யாழ். அரசாங்க அதிபர், வலி.வடக்கு பிரதேச செயலர், ஐ.நா.சபை ஆகியோரிடம் கோருவதெனத் தீர்மானம் நிறைவேற்றப்பட்டது.

இந்தச் செயல்பாடுகள் அனைத்தையும் செயல்படுத்துவதற்கென ஓர் நிர்வாகமும் தெரிவுசெய்யப்பட்டது. சிதம்பரப்பிள்ளை நடராசா தலைவராகவும், நடராசா யோகராசா செயலாளராகவும், பொன்னர் சங்கரப்பிள்ளை பொருளாளராகவும், ஆ.சற்குணநாதன் உபதலைவராகவும், க.பாலசுப்பிரமணியம், சி.வல்லிபுரம், சி.ஐயாத்துரை, க.இலங்கைநாதன், க.இராசா, வ.தங்கவேல், சி.சுப்பிரமணியம் ஆகியோர் உறுப்பினர்களாகவும் தெரிவுசெய்யப்பட்டனர்.

இந்த நிர்வாகம் விமான நிலையத்தைச் சுற்றிவர உள்ள மக்களின் நலன்கருதி தேவையான முயற்சிகள் அனைத்தையும் துரிதமாக செயல்படுத்த உள்ளதாகவும் தெரிவிக்கப்பட்டுள்ளது.