நிவாரண கிராமத்தில் தங்கியுள்ள மக்கள்.

இடம் பெயர்ந்த மக்களின் மீள்குடியேற்றம் தாமதமடைவதினால் செட்டிகுளம் நிவாரண கிராமத்தில் தங்கியுள்ள மக்கள் பல்வேறு கஸ்டங்களை அனுபவிக்கின்றனர்.

தற்போது கடும் வெய்யில் காலம் இந்த தற்காலிக கூடாரங்களில் பல்லாயிரக் கணக்கானவர்கள் வசிக்கின்றனர். கூடாரங்கள் பழுதடைந்த நிலையில் பொலித்தீன் விரிப்புக்கள் கூடாரங்களுக்கு மேல் விரிக்கப்பட்டுள்ளது. இதில் வசிப்பது என்பதுமிகவும் கஸ்டமானகாரியமாகும். பொதுத்தேர்தல் பிரச்சாரத்திற்கு வாக்கு கேட்டு செல்லும் வன்னி வேட்பாளர்களும் இதனை அவதானித்து வந்துள்ளனர்.

வன்னிப்பிரதேசத்திலிருந்து இடம்பெயர்ந்த மக்களில் இன்னமும் 70 ஆயிரம் பேர் நிவாரண கிராமங்களில் வசிக்கின்றனர். ஆரம்பத்தில் மூன்று இலட்சம் மக்கள் பலத்த சிரமங்களுக்கு மத்தியில் தங்கியிருந்தபோதிலும், நிவாரண கிராமங்கள் திறந்து விடப்பட்ட பின்னர் அனேகர் வெளியேறிவிட்டனர். ஒரு தொகுதியினர் தமது பழைய இருப்பிடங்களுக்கு திருப்பி சென்றுவிட்டதாக அதிகாரிகள் தெரிவிக்கின்றனர்.

முல்லைத்தீவு மற்றும் கிளிநொச்சி மாவட்ட மக்களே பெருமளவிலானவர்கள் இன்னமும் நிவாரண கிராமங்களில் தங்கியுள்ளனர். அவர்களும் தமது பழைய இடங்களுக்குசெல்ல ஆவலாகவே உள்ளனர். 'கூடாரங்களுக்குள் வசிக்கமுடியாத வெப்பம்.. என்ன செய்வது எல்லாம் எங்களுடைய தலை விதி' என அவர்கள் கூறுகின்றனர். தமது மீள்குடியேற்ற விடயத்தை அரசு துரிதப்படுத்தவேண்டும் எனவும் அவர்கள் கோரிக்கைவிடுகின்றனர்.

வன்னியிலிருந்து இடம்பெயர்ந்த மக்களுக்காக அமைக்கப்பட்ட நிவாரண கிராமங்களில் இறுதியாக அமைக்கப்பட்டது. வலயம் நான்கு நிவாரண கிராமம் தாழ்வான கூடாரங்களிலேயே மக்கள் வசிக்கின்றனர். இந்த கூடாரங்கள் யூஎன்எச்சிஆர் அமைப்பினரால் ஏற்படுத்தப்பட்டவையாகும். கூடாரங்கள் மூன்று மாதத்திற்கே தகுதியானவை என உறுதிப்படுத்தப்படுகின்றது. ஆனால் கடந்த மே மாதம் மாதம் முதல் இடம்பெயர்ந்த மக்கள் கூடாரங்களில் தங்கியுள்ளனர். மேலும் தொடர்ச்சியாக தங்கவைக்க கூடிய நிலையில் கூடாரங்கள் இல்லை என்பதினையும் அதிகாரிகள் குறிப்பிடுகின்றனர். நிவாரண கிராமங்களில் மிகவும் மோசமான வசதி குறைந்தது வலயம் நான்கு என நிவாரண பணியாளர்கள் தெரிவிக்கின்றனர்.

இடம்பெயர்ந்தவர்கள் விரைவில் தமது பழைய இருப்பிடங்களில் குடியமர்த்தப்படுவார்கள் என அரசு கூறிவருகின்றது. இந்த நிலையில் பொதுத் தேர்தல் வந்துள்ளது. அரசியல்வாதிகள் அனைவருமே தேர்தல் பிரச்சாரங்கள் மற்றும் விரும்பு வாக்கு தேடும் பணியில் ஈடுபட்டுள்ளனர். இடம் பெயர்ந்த மக்கள் பற்றி எந்த சிந்தனையும் எவருக்குமே இல்லை. தேர்தலில் பின்னர்தான் மீள்குடியேற்றம் அனைத்து வசதிகளும் ஏற்படுத்தி கொடுக்கப்படும் என உறுதி மொழி தெரிவிக்கப்படுகின்றது. ஆனாலும் மக்கள் பல்வேறு அசௌகரியங்களை எதிர்நோக்குகின்றனர். மீள்குடியேற்றம் துரிதப்படுத்துவதே இடம்பெயர்ந்த மக்களின் நீண்டகால கனவு கண்ணிவெடி அகற்றல் தாமதமடைவதினால் மீள்குடியேற்ற விடயங்களிலும் தாமதம் ஏற்பட்டுள்ளது என மீள்குடியேற்ற அமைச்சு தெரிவிக்கின்றது.

எது எப்படியிருந்தாலும் கூட இடம்பெயர்ந்து நிவாரண கிராமங்களில் வசிக்கும் மக்களுடைய வாக்குகளை கவரும் விதத்தில் பல்வேறு உறுதி மொழிகள் தேர்தல் பிரச்சார கூட்டங்களில் தெரிவிக்கப்பட்டுவருகின்றது.

[படங்கள் இணைப்பு]

மேற்கில் அக்கரையான் முதல் ஆனைவிழுந்தான் வரை, கிழக்கில் முத்தையன்கட்டு, புதுக்குடியிருப்பு, முல்லைத்தீவு போன்ற பெரும்பகுதிகளுக்கு மக்கள் அனுமதிக்கப்படும் போது தான், செட்டிக்குள முகாம்களில் உள்ள மீதமுள்ள பெரும்பாலான மக்கள் வெளியேற முடியும்.

தமிழ் அரசியல்வாதிகள் யாரும் இதுபற்றி எந்த முயற்சியும் செய்யவில்லை.

ஒருசில இந்து, கிறிஸ்தவ அமைப்புக்கள் மட்டும் இதில் ஆர்வம் காட்டி வருகின்றன.

Edited March 21, 201015 yr by Aasaan