அரசியல் கைதிகள் மீது யாழ் சிறைச்சாலையில் மேற்கொள்ளப்பட்ட தாக்குதல் சம்பவம் நீதித்துறையில் பெரும் அதிர்ச்சி‐ யாழில் இருந்து குளோபல் தமிழ்ச் செய்தியாளர்

அரசியல் கைதிகள் மீது யாழ் சிறைச்சாலையில் மேற்கொள்ளப்பட்ட தாக்குதல் சம்பவம் நீதித்துறையிடையே பெரும் அதிர்ச்சியை ஏற்படுத்தியிருக்கின்றது. யாழ்ப்பாணத்தில் அரசியல் கைதிகளாக உள்ள 8 பேர் மீது சிறைச்சாலை அதிகாரிகள் கடந்த 30ம் திகதி தாக்குதல் ஒன்றை நடத்தியதாக குற்றம் சாட்டப்பட்டுள்ளது. குறித்த சிறைச்சாலையின் ஒரு பக்கமாக உள்ள கம்பி ஒன்று கழற்றப்பட்டிருந்ததாகவும் இதனால் அங்கிருந்து இவர்கள் தப்பிச் செல்ல முற்பட்டதாகக் கூறி சுமார் 10க்கு மேற்பட்ட சிறைச்சாலை அதிகாரிகள் குறித்த 8 பேர் மீதும் பல மணி நேரமாக தாக்குதலை மேற்கொண்டுள்ளனர் என குளோபல் தமிழ்ச் செய்தியாளர் தெரிவித்துள்ளார்.

அவர்களில் இருவரது கை மற்றும் கால்கள் உடைந்துள்ளன. அவர்களது அந்தரங்க உறுப்புகளில் மிளகாய்த்தூள் தூவப்பட்டும் உள்ளன. சிறுநீருடன் இரத்தம் கலந்து செல்வது உள்ளிட்ட பல்வேறு நோய்த் தாக்கத்தினால் இவர்கள் பாதிக்கப்பட்டுள்ளனர் என ஜீ.ரீ.என்னிற்கு தெரியவந்துள்ளது

30 ம் திகதி இச்சம்பவம் இடம்பெற்றுள்ள போதிலும் இன்றுவரை இவர்கள் எவருமே வைத்திசாலையில் ஆஜர்ப்படுத்தப்படவில்லை. தொடர்ந்தும் இவர்கள் சிறைச்சாலையிலேயே அடைத்து வைக்கப்பட்டிருந்தனர். இந்த நிலையில் குறித்த அரசியல் கைதி ஒருவரின் உறவினர் ஒருவருக்குக் கிடைத்த தகவலினை அடுத்து இது தொடர்பாக யாழ்ப்பாண நீதிமன்றத்திற்கு தகவல் வழங்கப்பட்டதாக ஜீ.ரீ.என் செய்தியாளர் தெரிவிக்கிறார்.

இதனை அடுத்து யாழ்ப்பாண நீதிவான் திடீர் விஜயமாக சிறைச்சாலைக்கு நேரில் சென்று பார்வையிட்டுள்ளார். அவ்வேளையிலேயே கைதிகள் சித்திரவதைக்குள்ளாக்கப்பட்டமை குறித்த தகவல்கள் வெளியாகின. குறித்த 8 அரசியல் கைதிகளும் நீதிமன்ற உத்தரவை அடுத்து இன்று காலை யாழ் போதனா வைத்தியசாலையில் சிகிச்சைக்காக அனுமதிக்கப்பட்டுள்ளனர் என ஜீ.ரீ.என் செய்தியாளர் தெரிவிக்கிறார்.

ஏற்கனவே இதேபோன்று அண்மையில் அரசியல் கைதி ஒருவரை சிறைச்சாலை அதிகாரி ஒருவர் தாக்கிய சம்பவத்தை அடுத்து குறித்த அதிகாரி தற்போது தற்காலிக பணிநீக்கம் நீதிமன்றத்தினால் செய்யப்பட்டிருப்பதுடன் விசாரணைகளும் இடம்பெறுவது குறிப்பிடத்தக்கதாகும்.

globaltamilnews