நம்பிக்கைகள் சிதைவுற்று நாளை மீதான எதிர்பார்ப்புகளுடன் காத்திருக்கும் ஆயிரமாயிரம் பேருக்குள் இவனும் ஒருவன். நினைவறிந்த நாள் முதல் போரின் துயரமும் அழிவுகளும் இவனது மனதில் ஆளமான வடுக்களாய் பதிந்தவை. தானாக எல்லாவற்றையும் புரியத்தொடங்கிய பொழுதொன்றில் காணாமல் போனான். காலங்கள் சில கழிந்த பின்னர் போராளியாகி ஊருக்குள் வந்தான். நாளைய சந்ததி வாழ்வதற்காக தங்களை அர்ப்பணித்த பல்லாயிரம் பேரின் கனவுகளைச் சுமந்து கொண்டு களங்களில் காடுகளில் காப்பரண்களிலென இவனது காலம் இலட்சியக்கனவோடே கழிந்தது. களமொன்றில் காயமடைந்து இடுப்பின் கீழ் இயங்காது போனபோது கூட தான் இழந்தது பெரிதல்லவென்றே கர்வத்தோடிருந்தான். சுழல்சக்கர நாற்காலிக்குள் தனது இயல்பு ஒடுங்கிப்போனதில் கூட எதுவித கவலையும் இவனைப் பற்றவில்லை. வீடு செல்லும் விருப்பத்தையே இழந்து போயிருக்கும் இவன் வீட்டுக்குச் சென்றால் வீட்டில் உள்ளோருக்குத் தான் சுமையாகிவிடுவேனென்று அஞ்சுகிறான். அடைக்கலம் கொடுத்த நிறுவனம் இவர்களை அவரவர் இடங்களுக்கு செல்ல வேண்டுமென்பதை அடிக்கடி நினைவுபடுத்தும் நேரமெல்லாம் எப்படி எங்கே போவதெனத் தெரியாத நிலையில் இருக்கிறான் இவன். தானே தன்னைக்காவ முடியாதவன் தன்னை நம்புகிறான் தனக்கான சிறுதொழில் ஒன்றுக்கான உதவியை வேண்டுகிறான். சுயதொழில் உதவியால் தனது குடும்பத்தைத் தானே தாங்க விரும்பும் இந்த 30 வயதுக்காரனுக்கு ஒரு சிறுதொழிலுக்கான உதவி வேண்டும் உறவுகளே உங்களிடம் தான் மீண்டும் கேட்கிறோம்….இதோ…இவனது குரலிலிருந்து….

ஒலிப்பதிவினைக் கேட்க இணைப்பின் மேல் அழுத்தவும்.

Edited October 7, 201015 yr by shanthy

ஒரு சிறு அளவிலான கடை திறப்பதற்கு இந்தப்போராளிக்கு இலங்கைரூபா 50000ரூபா(ஐம்பதாயிரம் ரூபா) தேவைப்படுகிறது. ஒருவர் செய்ய முடியாது இவ்வுதவியை சிலர் இணைந்து செய்யலாம். இவ்வுதவி இந்த மனிதனை இவனது குடும்பத்தை வாழ வைக்க பேருதவியாக இருக்கும்.

இந்த உறவுக்கான கடை திறப்பதற்கு கட்டாரிலிருந்து றோஷன் அவர்கள் உதவியுள்ளார். அடுத்துவரும் நாட்களில் உரியவர் தனது வியாபாரத்தை ஆரம்பிக்கவுள்ளார். சகோதரர் றோஷன் அவர்களுக்கு எமது நன்றிகள்.