அமெரிக்கர்களை ஏமாற்றிய பெளத்த துறவி : அதிர்ச்சியில் தேவாலய நிர்வாகம்

அமெரிக்கர்களை ஏமாற்றிய பெளத்த துறவி : அதிர்ச்சியில் தேவாலய நிர்வாகம்...

திங்கட்கிழமை, 31 ஜனவரி 2011 15:36

தியான வழிபாடு என்ற காரணங்களை கூறி பௌத்த துறவி ஒருவரே எமது மண்டபத்தை பதிவு செய்திருந்தார். எமக்கு தமிழ் மக்கள் தொலைபேசியில் தொடர்பு கொள்ளும் வரையிலும் அரசியல் நடவடிக்கைகள் அங்கு மேற்கொள்ளப்படுவது தெரியாது என எட்வேட் தேவாலய நிர்வாகம் தெரிவித்துள்ளது.

இது தொடர்பில் மேலும் தெரியவருவதாவது:

அமெரிக்காவின் பொஸ்ரன் நகரில் உள்ள எட்வேட் தேவாலய மண்டபத்தில் நேற்று (30) நடைபெற்ற நிகழ்வில் சிறீலங்கா இராணுவ அதிகாரியும், பிரதம போர்க்குற்றவாளிகளில் ஒருவருமான மேஜர் ஜெனரல் சவீந்திர சில்வா உரையாற்றியிருந்தார்.

சவீந்திர சில்வாவை சிறீலங்கா அரசு ஐக்கிய நாடுகள் சபைக்கான பிரதிநிதியாக நியமித்துள்ளது.

சில்வாவின் உரைக்கு எதிராக தமிழ் மக்கள் தமது எதிர்ப்பு போராட்டத்தை மேற்கொண்டிருந்தனர். சுபா சுந்தரலிங்கம் உட்பட பலர் அதில் கலந்துகொண்டிருந்தனர். மப்பிள்வூட் மற்றும் எல்ம் வீதி ஆகியவற்றில் போராட்டங்களை மேற்கொண்ட தமிழ் மக்கள் பதாதைகளையும் தங்கியிருந்தனர்.

சில்வாவின் கூட்டத்திற்கு மண்டபத்தை வழங்கிய தேவாலய நிர்வாகம் தவறு செய்துள்ளதாக சுந்தரலிங்கம் தெரிவித்துள்ளார். சிறீலங்காவில் இடம்பெற்ற போரில் மேற்கொள்ளப்பட்ட மனித உரிமை மீறல்களுக்கு சிறீலங்கா அரசே பொறுப்பானது.

வெள்ளைக் கொடியுடன் சரணடைந்தவர்களை சுட்டு கொல்லும்படி சில்வாவே உத்தரவிட்டவர் என சுந்தரலிங்கம் மேலும் தெரிவித்திருந்தார்.

தனது குற்றச்சாட்டுக்களை சில்வா மறுத்தபோதும் தமிழ் மக்கள் அதனை ஏற்றுக்கொள்ளவில்லை என தெரிவிக்கப்படுகின்றது.

அதேசமயம் தமது தேவாலயத்தின் மண்டபம் அரசியல் காரங்களுக்காக பெறப்பட்டுள்ளதை தாம் அறியவில்லை என தேவாலய நிர்வாகிகள் தெரிவித்துள்ளனர்.

தியானவழிபாடு என்ற காரணங்களை கூறி பௌத்த துறவி ஒருவரே மண்டபத்தை பதிவு செய்திருந்தார். அவர் முன்னரும் இவ்வாறு பதிவு செய்வதுண்டு. எமக்கு தமிழ் மக்கள் தொலைபேசியில் தொடர்புகொள்ளும் வரையிலும் அரசியல் நடவடிக்கைகள் அங்கு மேற்கொள்ளப்படுவது தெரியாது.

நேற்று முதல் எமக்கு 20 இற்கு மேற்பட்ட தொலைபேசி அழைப்புக்கள் வந்துள்ளன. சில்வா வருவது தெரிந்திருந்தால் நாம் அதனை அனுமதித்திருக்க மாட்டோம் என அவர்கள் மேலும் தெரிவித்துள்ளார்.

sangamam