‘மலையே வரினும் தளராதிருங்கள்’ நாங்கள் இருக்கின்றோம்!!

‘மலையே வரினும் தளராதிருங்கள்’ நாங்கள் இருக்கின்றோம்!!

தமிழன் இல்லாத நாடில்லை. தமிழனுக்கென்றொரு நாடும் இல்லை. இவ்வரியின் ஆழத்தில் வேரூன்றி நிற்கும் எம் மக்களின் உரிமைக்குரலை அறியாதவர் உலகத்தில் எவரும் இல்லை. ஆனால் ஒவ்வொருவரும் தமது சொந்த நலன்களுக்காக எம்மைப் புறக்கணித்தே வருகிறார்கள்.

அதைவிடக் கொடுமையானது சொந்த நாட்டிலேயே உரிமைகள் மறுக்கப்பட்டு அடிமைகள் போல் வாய் பேசா ஊமைகள் போல் எம்மக்கள் வாழ்கிறார்கள். அனைவராலும் உச்சரிக்கப்பட்ட வடக்கு – கிழக்கு தமிழரின் தாயகப் பிரதேசம் என்ற நிலைமை எழுத்தில் கூட வர மறுக்கப்படுவதாக மறைக்கப்படுவது மிகவும் வேதனையான விடயம். யுத்தம் முடிந்தததாக கூறிவரும் இலங்கை அரசு பாதுகாப்பிற்கென மீண்டும் மீண்டும் செலவுகளை அதிகரித்த வண்ணமேயுள்ளது.

யாழ்ப்பாணத்தின் தற்போதைய நிலைமையோ மிகமிக மோசம். தளர்த்தப்பட்ட வீதித்தடைகள், அகற்றப்பட்ட காவலரண்கள் எல்லாம் இப்போது புதிது புதிதாக சீமேந்துக் கற்களால் உறுதியாக எழுப்பப்பட்டு வர்ணங்கள் பூசப்பட்டு காட்சியளிக்கிறது.இது படையினரின் யாழ்ப்பாண பாதுகாப்புநிலைத் தன்மை நீடிப்பதையே குறித்துக் காட்டுவதாக அமைகின்றது. யுத்தம் முடிந்ததெனக் கூறிக்கொள்ளும் இலங்கை அரசாங்கம் ஏன் இவற்றைச் செய்து வருகின்றது என புரியாமல் மக்கள் விழிபிதுங்கி நிற்கிறார்கள். சமூகவிரோதச் செயல்கள், படுகொலைகள் என்பனவற்றைக் கட்டுப்படுத்துவதற்காகவே இந்த நடவடிக்கை எனக் கூறிக் கொள்கிறது அரசாங்கம். ஆனால் அதன் உண்மைத் தன்மை எதுவென்றால் 200 மீற்றர் தூரத்திற்கு ஒரு தடவை மூலைமுடுக்கெல்லாம் சோதனை நடத்தும் படையினரின் செயற்பாடுகளைக் கொண்டே அரசு கூறாமல் நாமாகவே அதுபற்றித் தெரிந்து கொள்ளலாம்.

இவைகளைப்பற்றி யாரும் யாரிடமும் கதைப்பதில்லை. பேச்சுச் சுதந்திரம், ஊடக சுதந்திரம் உள்ளது என்பது வெறும் பெயரளவில் மட்டுமே. யாழ்ப்பாண ஊடகவியலாளர்களும் சரி பத்திரிகையாளரும் சரி உயிருக்கு பயந்தே வாழவேண்டிய நிலைமை. அண்மையில் நடந்த வலிகாமம் வலயக்கல்விப் பணிப்பாளர் கொலை இதற்கு மிகச்சிறந்த எடுத்துக்காட்டு ஆகும். பாடசாலைகளில் சிங்களக்கொடி, சிங்களத் தேசிய கீதம் பாடக்கூடாது எனப் பேசியவரைச் சுட்டார்கள். அவர்தான் கல்விப்பணிப்பாளர்.

அரசியல்வாதிகள் சிலரும் அரச அதிகாரிகள் சிலரும் சரி அரசாங்கத்தால் ஆட்டி வைக்கும் மின்சாரப் பொம்மைகளாகவே காணப்படுகிறார்கள். புலிகளின் செயற்பாடுகள் இன்னும் யாழ்ப்பாணத்தில் குறையவில்லை என்று சொல்கிறார் தாடி அமைச்சர் டக்ளஸ் தேவானந்தா.

தமிழ் இனத்தின் மானத்தையே அடகு வைத்து பேசுமளவிற்கு வளர்ந்திருக்கும் அரச அதிகாரிகளும், அரசியல்வாதிகளும் மின்சாரப் பொம்மைகளே. இங்கு எதுவும் வாய் திறந்து பேச முடியாது. யாரைப் பார்த்தாலும் சந்தேகப்படவேண்டிய சூழ்நிலை. இந்த நிலையில் யாழ்ப்பாணத்தில் நெருக்கப்பட்ட அரசின் கொடுமைகள் இருந்து கொண்டே இருக்கிறது. தமிழரின் உரிமைகள் பறிபோகாமல் உரிமைக்காக கிளர்ந்து எழுவதற்கு மிகவும் சிரமமான காரியமாக இருந்தாலும் இலைமறை காயாக இருந்து எமது இனத்திற்காக உயிரைக் கூட மதிக்காமல் செயற்பட்டுக் கொண்டிருப்பவர்கள் பலர்.

இவ்வேளையில் இவர்களுக்கும் இவர்களது செயற்பாட்டிற்கும் உந்துசக்தியாகவும் தோள் கொடுக்கும் பெரும் பலமாகவும் புலம்பெயர் தமிழ் உறவுகள் இருக்கவேண்டுமென உரிமையுடன் கேட்கிறோம்.புலம்பெயர் எம் உறவுகளே! உங்களது பலம்தான் எமது இனத்தின் மாபெரும் பலமாக இருக்கிறது. ‘மலையே வரினும் தளராதிருங்கள்’ நாங்கள் இருக்கின்றோம் என்றும் உங்கள் வழியில்தான். எம்மினம் உரிமையுடன் தலைநிமிர்ந்து வாழ்வதா? அல்லது அடிமைகளாக இப்படியே மாண்டு சாவதா? என்பது எம்கைகளில்தான். புரிந்துகொண்டு உறுதியுடன் உழைக்க தலைவன் காட்டிய பாதையில் பயணிப்போம்.

நன்றி.

காவலன்

தமிழீழம்

நன்றி - தமிழ்நாதம்