கறுப்புச் சந்தையில் நுழைவுச் சீட்டைப் பெற்று கிரிக்கெட் இறுதிப்போட்டியை பார்த்த அமைச்சர்கள்!

கறுப்புச் சந்தையில் நுழைவுச் சீட்டைப் பெற்று கிரிக்கெட் இறுதிப்போட்டியை பார்த்த அமைச்சர்கள்!

வியாழன், 14 ஏப்ரல் 2011 10:55

உலகக்கிண்ணக் கிரிக்கட் இறுதிப் போட்டியைக் கண்டுகளிக்க மும்பை சென்றிருந்த இலங்கையின் அமைச்சர்கள் பலர் கறுப்புச் சந்தையில்தான் நுழைவுச்சீட்டை வாங்கினர் என விளையாட்டுத்துறை அமைச்சர் மகிந்தானந்த அளுத்கமகே தெரிவித்துள்ளார்.

இறுதிப் போட்டியைக் கண்டுகளிக்க மும்பை சென்றிருந்த இலங்கையின் அரசியல் பிரமுகர்கள் முறையற்ற விதத்தில் நடத்தப்பட்டனர் இதுகுறித்து அனைத்துலக கிரிக்கட் சபையிடம் முறைப்பாடு செய்யவுள்ளதாக விளையாட்டுத்துறை அமைச்சர் தெரிவித்துள்ளார்.

மும்பைக்குச் சென்றிருந்த 20 இற்கும் அதிகமான அமைச்சர்கள் இந்திய கிரிக்கட் சபையினால் தொந்தரவிற்கு உள்ளாக்கப்பட்டனர்.

எமது மனக்குறை இந்திய அரசாங்கத்தின் மீது அல்ல. உலகக்கிண்ணக் கிரிக்கட் போட்டியை நடத்திய இணை நாடு ஒன்றின் விளையாட்டுத்துறை அமைச்சராக இருந்தபோதும் இறுதிப்போட்டியைக் காண நானும் நுழைவுச்சீட்டை வாங்க வேண்டியிருந்தது.

மலேசிய ஜனாதிபதி இலங்கைக்கு பயணம் மேற்கொண்டிருந்த போது, அவருடன் வந்த 25 பேருக்கும் முக்கிய பிரமுகர்களின் பகுதியில் ஆசனத்தை ஒதுக்கிக் கொடுத்து அனைத்து வசதிகளையும் வழங்கினோம்.

ஆனால் ஜனாதிபதியுடன் சென்றவர்களுக்கு அதிக ஆசனங்களைக் கேட்டிருந்தபோதும், 10 ஆசனங்களையே வழங்கியிருந்தனர். பல அமைச்சர்கள் கறுப்புச்சந்தையில் தான் நுழைவுச்சீட்டை வாங்கினர்.

மும்பையில் அனைத்து இலங்கை அமைச்சர்களுமே முக்கிய பிரமுகர்கள் அமரும் பகுதிக்கு வெளியே அமர நிர்ப்பந்திக்கப்பட்டனர்.

பல பாதுகாப்புச் சோதனைகள் முடியும்வரை வன்காடே மைதானத்துக்கு வெளியே இலங்கை அமைச்சர்கள் பல மணி நேரமாக வெயிலில் காய வேண்டியிருந்தது. அவர்கள் உடற்பரிசோதனைகளுக்கும் உள்ளாக்கப்பட்டனர்.

நானும் கூட சோதனையிடப்பட்டேன். முக்கிய பிரமுகர்கள் இலங்கைக்கு வந்தபோது அவர்கள் சோதனையிடப்படவில்லை. அவர்களை நாம் மரியாதையுடன் நடத்தினோம்.

இந்திய துடுப்பாட்டச் சபை எம்மை நடத்திய விதம் குறித்த நான் மகிழ்ச்சியடையவில்லை. இதுபற்றி அனைத்துலக கிரிக்கட் சபையிடம் முறையிடவுள்ளேன் என்று அவர் மேலும் தெரிவித்துள்ளார்.

tamilenn.