சம்பந்தர் காட்டிய கொடியும் அரசு காட்டிய கொடியும்!

வன்னி யுத்த களத்தில் இலங்கை இராணுவத்தினரால் பிடிக்கப்பட்ட ஒரு இளைஞன் சித்திரவதை செய்யப்பட்டு கொலை செய்யப்பட்ட பின்னர் புலிக்கொடியினால் போர்க்கப்பட்ட காட்சி போர்க்குற்ற ஆவணமாக வெளியானது. யாழ்ப்பாணத்தில் எதிர்க்கட்சிகள் நடத்திய மேதினக் கூட்டத்தில் தமிழத் தேசியக் கூட்டமைப்பின் தலைவர் சம்பந்தர் சிங்கக் கொடியை ஏந்திக் காட்டிய பொழுது அதே புலிக்கொடியைத்தான் இராணுவம் ஏந்திக் காட்டியது.

வன்னி யுத்த களத்தில் லட்சக்கணக்கான மக்கள் கொல்லப்பட்டு தமிழ் மக்களின் போராட்டம் அழிக்கப்பட்டதன் வெற்றியை இலங்கை இராணுவத்தினர் சிங்கக் கெடியை உயர்த்திப் பிடித்து அறிவித்தனர். தமிழ் மக்களின் பிணங்களின்மீதும் இரத்ததின்மீது வெற்றிக் களிப்பில் அசையும் சிங்கக் கொடி ஊன்றப்பட்டது. ஈழத் தமிழர்களின் தீராக் கண்ணீரை அந்தக்கொடியின் நிழல் மறைத்தது.

அதோ அகொடியைத்தான் தமிழ்த் தேசியக் கூட்டமைப்பின் தலைவர் சம்பந்தர் கடந்த மேதினக் கூட்டத்தில் எதிர்க்கட்சிகளுடன் ஏந்திப் பிடித்தார். ரணில் விக்கிரமசிங்கவுடன் இணைந்து பிடித்த கொடி பின்னர் சில நிமிடத்தில் சம்பந்தரின் கையில் தனியே உயர்ந்து அசைந்தது. இது காலம் காலமாக சிங்கக் கொடியினால் நிகழ்த்தப்பட்ட அநீதிகளால் பாதிக்கப்பட்ட தமிழ் மக்களுக்கு பெரும் அதிர்ச்சியை ஏற்படுத்தியது. சிங்கக் கொடியை உயர்த்திப் பிடிக்கும் சம்பந்தரின் முகத்தில் ஆனந்தமும் பெருமிதமும் கொடிகட்டடிப் பறந்தது.

இலங்கையில் சிங்கக் கொடியால் தமிழர்கள் கடுமையாக பாதிக்கப்பட்டிருக்கிறார்கள். தொடக்க காலத்தில் அந்தக் கொடி தமிழ் மக்களை பிரதிபலிக்கவில்லை என்றும் அது ஒரு சிங்களப் பேரினவாத தேசியக் கொடி என்றும் தமிழ்த் தலைவர் புறக்கணித்தார்கள். கடந்த முப்பதாண்டுகளில் போர் முழக்கங்களுடன் சிங்கக் கொடியை ஏற்றும் சிங்கள ஜனாதிபதிகளையும் எங்கள்மீது படையெடுத்து வரும் இராணுவத்தினர் எங்கள் நிலங்களை கைப்பற்றி அந்தக் கொடியை ஏற்றுவதையும் பார்த்திருக்கிறோம்.

வன்னி யுத்தம் நடந்து கொண்டிருந்த பொழுது யாழ்ப்பாணத்திலும் கிழக்கிலும் வீடுகளில் மக்கள் சிங்கக் கொடியை ஏற்ற வேண்டும் என்று வற்புறுத்தப்பட்டிருக்கின்றனர். அத்துடன் மக்களின் வீட்டு வாசல்களில் இராணுவத்தினர் கொடியை பலவந்தமாக சொருகிச் சென்றிருக்கின்றனர். எங்களுடைய நகரங்களிலும் எங்களுடைய தெருக்களிலும் அந்நியக் கொடி பறக்கிறது என்ற அந்நிய உணர்வு நம்மை வாட்டியிருக்கிறது. சிங்களப் பேரினவாதக் கொடியை எதிர்த்தமைக்காக பலர் அரச படைகளால் பலி கொள்ளப்பட்டிருக்கிறார்கள்.

தமிழ் தேசியக் கூட்டமைப்பின் தலைவர் சம்பந்தனின் கையில் சிங்கக் கொடி திணிக்கப்பட்டது என்றும் அதை பார்த்த பொழுது தான் பெரும் அதிர்ச்சியடைந்ததாகவும் தமிழ் தேசியக் கூட்டமைப்பின் மற்றொரு எம்.பியான மாவை சேனாதிராஜா தெரிவித்துள்ளார். இதற்காக தான் மன்னிப்புக்கோருகிறேன் என்றும் அவர் குறிப்பிட்டிருந்தார். ஆனால் சம்பந்தரோ யாரிடமும் மன்னிப்புக் கோர வேண்டிய அவசியம் இல்லை என்றும் சிங்கக் கொடியை தான் ஏந்திப் பிடித்தது உண்மை என்றும் அதை விரும்பியே செய்தேன் என்றும் தெரிவித்துள்ளார். இந்த இறுமாப்புக்கு பெயர் தந்திரோபாயமாக இருக்க முடியாது.

கொழும்பு தமிழ்ப் பத்திரிகைக்கு பேட்டி அளித்துள்ள தமிழ் தேசியக் கூட்டமைப்பின் தேசியப் பட்டியல் பாராளுமன்ற உறுப்பினர் சுமந்திரன் ஒன்று பட்ட நாட்டின் தேசியக் கொடியை ஏந்துவதில் ஏனிந்த எதிர்ப்பு என்று புரியவில்லை என்று தெரிவித்துள்ளார். இலங்கை அசராங்கம் என்ன செய்தாலும் ஒன்றுபடத் தயாராக இருக்கும், சிங்கக் கொடி ஏற்படுத்திய வலி என்ன என்றும் வரலாறு புரியாதிருக்கும் சுமந்திரன் போன்றவர்கள் இப்படிப் பேசத்தான் செய்வார்கள்.

சம்பதர் எதிர்கட்சிகளினால் சிங்கக் கொடியை ஏந்துவிக்கப்பட்டார். எதிர்கட்சிகளின் அரசியல் மே தினத்தின் பொழுது சாத்தியமாகிவிட்டது. தொழிலாளர்களுக்கும் சிங்கள மக்களுக்கும் இடையில் நல்லிணக்கத்தை வெளிப்படுத்தவே இவ்வாறு கொடி ஏந்தியதாக சம்பந்தர் குறிப்பிடுகிறார். முழு இலங்கையின் தொழிலாளர்களுடனும் சிங்கள மக்களுடனும் நல்லிண்ணத்தை காட்ட பேரினவாதக் கொடியை பிடிக்க வேண்டிய அவசியமில்லை. அதற்கு வேறு வழிகள் உள்ளன.

இலங்கை அரச தரப்பு இதை ஒரு நல்ல சமிக்ஞை என்று கருதுகிறார்கள். சம்பந்தர் இலங்கை அரசுமீது உள்ள விசுவாசத்தை காட்டுகிறார் என்றும் சொல்லுகிறார்கள். இலங்கை அரசோ எதிர்கட்சிகளின் மேடையில் நின்று அரசுக்குக் காட்டிய பச்சைக் கொடியாகவே இதனைக் கருதுகிறது. ஆனால் சம்பந்தர் சிங்கக் கொடியை காட்டும் பொழுது அரச தரப்போ நமக்கு புலிக்கொடியைக் காட்டுகிறது.