எந்தக்கதையில் உள்ளே நுழைத்தாலும் கச்சிதமாக பொருந்திக் கொள்கிற ஜெல்லி பீன் மிட்டாய் மாதிரி நம்ம கார்த்தி சிவகுமார்!

கார்த்தியின் ஏரியா காமெடியும், காதலும் மட்டும்தான் என்று நினைத்துக் கொண்டிருந்த அவரது ரசிகர்களுக்கு ஷாக் கொடுத்திருக்கிறது சகுனி! சாக்லேட் முகத்தொடு அரசியல் மைதானத்தில் கிங் மேக்கராக சிக்ஸர்களை விளாசியிருக்கிறார் கார்த்தி!

கடமை, காதல், காமெடி, அடிதடி முக்கியமாக அரசியல் ஆட்டத்தில் காய்களை அசால்ட்டாக வெட்டும் புத்திசாலி என கார்த்தி ஆடியிருப்பது ஒரு மாஸ் மசாலா ஐ.பி.எல்! மொத்த படத்திற்கும் தியேட்டரில் விசிலும், க்ளாப்ஸும் அள்ளுகிறது! கார்த்தியும் பிரகாஷ்ராஜும் சந்தித்துக் கொள்ளும் காட்சிகளிலோ மின்னல் வெட்டுகிறது! நல்ல வேலையாக கார்த்தி வந்த வேலையை முடித்துக் கொண்டு, அரசியல் சாக்கடைக்குள் காலை வைக்காமால் கிளம்பிவிடுவதால் படமும், கார்த்தியின் ’மாமு’ இமேஜும் தப்பிக்கிறது!

ஒரே ஒருவரிதான் கதை. பாரம்பரிய வீட்டை காப்பாற்ற ஒரு புத்திசாலி இளைஞன் நடத்தும் அரசியல் செஸ் ஆட்டத்தில் இறுதி வெற்றி அவனுக்கே கிடைக்கிறது! செட்டிநாட்டு இளைஞரான கார்த்தியின் பாரம்பரிய வீட்டை, சுரங்கப்பாதை அமைக்க இந்தியன் ரயில்வே எடுத்துக் கொள்கிறது. இதைத் தடுத்து வீட்டை காப்பாற்ற, தேர்தல் சமயத்தில் கார்த்தியின் வீடு தேடி வந்து, அதைக் கோவில் என்று புகழ்ந்து, கார்த்தியின் தாத்தாவுக்கு பக்கத்தில் அமர்ந்து சமபந்தி விருந்து சாப்பிட்டு அந்தப்பகுதி ஓட்டுகளை தந்திரமாக அள்ளிய பிரகாஷ்ராஜ்தான் தற்போது முதல்வர்! அந்த உரிமையில் பிரகாஷ்ராஜை சந்தித்து விட்டை மீட்டுத்தருமாறு முகத்துக்கு நேராக கேட்க..“ ஓட்டுபோட்ட ஒவ்வொருத்தனுக்கும் தனித்தனியாக நான் சேவகம் பண்ணமுடியுமா?“ என்று கார்த்தியை கழுத்தைப் பிடித்து வெளியே தள்ளச் சொல்கிறார்.

அதிகார பலமும் ஆள் பலமும் கொண்ட பிரகாஷ்ராஜின் பச்சோந்தித் தனம் கண்டு கொதிக்கும் கார்த்தி, தனது புத்திசாலித்தனத்தால் அவரை எப்படி பதவியை விட்டு இறக்குகிறார் என்பதுதான் இரண்டரை மணிநேர விறுவிறு சகுனி!

காதல் இல்லாமல் அரசியல் களத்தில் கார்த்தியை ராவாக இறக்கமுடியாது என்பதால், அத்தை மகள் ப்ரனிதாவை ஜி.வி.பிரகாஷின் இசையில் காதலிக்கிறார். ப்ரனிதா ஐந்தரை ஐடி வெண்ணிலா ஐஸ்க்ரிம் மாதிரி இருக்கிறார். பாவம் அவருக்கு பிரதான கதையில் எந்த தொடர்பும் இல்லை! ப்ரனிதாவை வைத்துக் கொண்டு கோட்டை விட்டதை சந்தாணத்தை வைத்துக் கொண்டு சமன் செய்திருகிறார் இயக்குனர்!

போதாக்குறைக்கு திரும்புகிற பக்கமெல்லாம் எக்குத்தப்பாக கதாபாத்திரங்கள். வட்டித்தொழில் செய்யும் ரமணி ஆச்சியாக ராதிகாவின் கதாபாத்திரம் கச்சிதம்! அவரை சென்னை மாநகராட்சியின் கவுண்சிலர் ஆக்கி, பிறகு மேயர் ஆக்கி அழகுபார்க்கும் கார்த்தி, அவரை தனது சதுரங்க ஆட்டத்தில் பிரகாஷின் செட்டப் மனைவியை வெட்டும் சோல்ஜராக பயன்படுத்திக் கொள்வது அசத்தல்!

அதேபோல காரமான காஜா பிடியைக் குடித்தபடியே சென்னைத்தமிழில் தத்துவங்களைப் பொழியும் நாசரை மௌனச்சாமியாக்கும் கார்த்தி, தேர்தல் நேர நிதிநெருக்கடியில் அவரை பேங்கராக பயன்படுத்திக் கொள்வது ஜிலீர்!

கட்சியின் சீனியரை காலிசெய்து சி.எம் நாற்காலியில் அமரும் அடுத்த சீனியர் ஆர்.கே பூபதியாக பிரகாஷ்ராஜ்! இவரை விட்டால் இந்தக்கதாபாத்திரத்துக்கு ஆட்களை தேடவேண்டி இருந்திருக்கும்! கார்த்தியை அவமானபடுத்தி அனுப்பிவிட்டு, பிறகு கார்த்தியின் பிரில்லியன்ஸியில் அவரைக்கண்டு “ யாருய்யா இவன்?” என ஒவ்வொரு கட்டத்திலும் மிரளுவது அபாரம்! செட்டப் மனைவியை பாம் வைத்துக் கொன்றுவிட்டு அந்த அனுதாப அலையில் ஓட்டு வாங்கி ஜெயித்து விடலாம் என்ற கனவோடு கடைசிகட்ட தேர்தல் பிரச்சாரம் செய்ய சேனலுக்கு வரும் பிரகாஷ்ராஜ்… “ மார்ச்சுவரி பிணத்தைக் கொண்டுவந்து போட்டுட்டு, கட்சிக்காக தீக்குளிச்சிட்டான்னு சொல்லுவோம்! குடிசைகளை எரிச்சுட்டு அது புகைஞ்சு முடியுறதுக்குள்ள எட்டாயிரம் நிவாரணம் கொடுப்போம். அரசியல் ரத்தத்துல ஊறியிருக்கு.” என்று சந்தர்ப்பவாதம் பேசும் க்ளைமாக்ஸ் காட்சியில் செம வில்லன்பா என்று சொல்ல வைத்து விடுகிறார்.

ராதிகாவை மேயர் ஆக்கவும், எதிர் கட்சித்தலைவர் கோட்டா சினிவாச ராவை முதல்வர் ஆக்கவும் கார்த்தி கமெடியாகவே இவ்வளவு பெரிய லாபியை ஆடுவது கொஞ்சம் நெருடினாலும், கார்த்தியின் ஆடுகளமே காமெடி என்பதால் எடுபட்டுவிடுகிறது!

அறிமுக இயக்குனர் ஷங்கர் தயாளின் பலம் என்றால் திரைக்கதையும். நெத்தியடியான அரசியல் வசனங்களும்தான்! நல்ல பகடி வகை மசாலா படங்களை இவரிடம் எதிர்பார்க்கலாம் என்று தோன்றுகிறது! கார்த்தியின் கால்ஷீட்டை வீணடிக்காமல் அவருக்கு நடிக்கும் வாய்ப்பை ஏற்படுத்திக் கொடுத்திருகிறார். எல்லா ஏரியாவிலும் மின்ன கார்த்திக்கும் வாய்ப்பா அமைந்து விட அவரும் அதைப் பயன்படுத்திக் கொண்டு மாஸ் மசாலா ஹீரோவாக அடுத்த கட்டத்துக்கு நகர முயற்சி செய்திருக்கிறார்.

மொத்தத்தில் சகுனி கார்த்திக்கு மட்டுமல்ல அவரது ரசிகர்களுக்கும் செமத்தியான

சிக்கன் 65!

http://www.4tamilmedia.com/cinema/movie-review/6322-65

கார்த்தியின் முதல் சொறிப்படம் என முகப்புத்தகத்தில் ஒருவர் எழுதியிருந்தார் .