கிழக்கில் ஆட்சியமைக்க முஸ்லிம் காங்கிரஸின் ஆதரவை கோரப் போவதில்லை! - பசில் ராஜபக்ச

'கிழக்கு மாகாணசபையில் ஆட்சியமைப்பதற்கு ஒருபோதும் சிறிலங்கா முஸ்லிம் காங்கிரஸின் ஆதரவை ஆளும் ஐக்கிய மக்கள் சுதந்திர முன்னணி பெறப் போவதில்லை. எம்மால் கிழக்கு மாகாணசபையில் தனித்து ஆட்சியமைக்க முடியும். அந்த அதிகாரத்தை மக்கள் எங்களுக்கு வழங்குவார்கள்' என்று சிறிலங்காவின் பொருளாதார அபிவிருத்தி அமைச்சர் பசில் ராஜபக்ச தெரிவித்துள்ளார்.

அரசியல் தீர்வு, அபிவிருத்தி மற்றும் சுதந்திரம் என்பனவற்றை விரும்பும் மக்கள் ஆளும் ஐக்கிய மக்கள் சுதந்திர முன்னணிக்கே வாக்களிக்க வேண்டும் என்றும் அவர் குறிப்பிட்டுள்ளார்.

கிழக்கு, வடமத்திய மற்றும் சப்ரகமுவ மாகாணசபைத் தேர்தல் நிலைமைகள் குறித்து கருத்துத் தெரிவிக்கும் போதே அவர் இவ்வாறு கூறியுள்ளார். இது தொடர்பில் அவர் மேலும் தெரிவித்துள்ளதாவது:

'சிறிலங்கா முஸ்லிம் காங்கிரஸ் கட்சியுடன் ஆளும் ஐக்கிய மக்கள் சுதந்தி முன்னணி அரசாங்கத்துக்கு இருக்க வேண்டிய உறவுகள் தற்போது இல்லை என்றே கூறவேண்டும். அது தொடர்பில் நான் எவரையும் குறைகூற விரும்பவில்லை. காரணம் இது தேர்தல் காலம்.

அவ்வகையில் கிழக்கு மாகாணசபைத் தேர்தலின் பின்னர் அங்கு ஆட்சியமைப்பதற்கு சிறிலங்கா முஸ்லிம் காங்கிரஸின் ஆதரவை ஆளும் ஐக்கிய மக்கள் சுதந்தி முன்னணி ஒருபோதும் நாடாது என்பதனைத் தெளிவாகக் குறிப்பிடுகின்றோம். அதற்கு மக்களின் ஆணை கிடைக்காது.

கிழக்கு மாகாணசபைத் தேர்தலில் தனித்து ஆட்சியமைக்க மக்கள் ஆளும் ஐக்கிய மக்கள் சுதந்திர முன்னணிக்கு ஆணையை வழங்குவார்கள் என்ற நம்பிக்கை எங்களுக்கு இருக்கின்றது. அவ்வாறு மக்களின் ஆதரவுடன் எம்மால் ஆட்சியமைக்க முடியும்.

மக்களின் விருப்பத்துக்கு அமைவாகவே நாங்கள் செயற்படுவோம். கிழக்கு மாகாணத்தில் ஆட்சி அமைப்பதற்கு ஆளும் ஐக்கிய மக்கள் சுதந்திர முன்னணி எந்தவொரு கட்சியினதும் ஆதரவை நாடாது.

கிழக்கு மாகாணத்தில் ஆட்சி அமைக்கும் அதிகாரத்தை மக்கள் எங்களுக்கு வழங்கவில்லையாயின், ஆணையைப் பெறுபவர்கள் அங்கு ஆட்சி அமைத்துக் கொள்ள முடியும்.

எம்மைப் பொறுத்த வரை கிழக்கு மாகாணத்தில் அமைதியையும் சுதந்திரத்தையும் ஏற்படுத்தியுள்ளோம். பாரிய அபிவிருத்திகளை முன்னெடுத்து வருகின்றோம். அரசியல் தீர்வைக் காண்பதற்கான முயற்சிகளையும் முன்னெடுத்து வருகின்றோம்.

இந்நிலையில் மக்கள் எம்மை ஆதரிப்பார்கள் என்ற நம்பிக்கை ஆளும் ஐக்கிய மக்கள் சுதந்திர முன்னணிக்கு உள்ளது. அதேவேளை முஸ்லிம் காங்கிரஸுக்கும் ஆளும் ஐக்கிய மக்கள் சுதந்திர முன்னணி அரசாங்கத்துக்கும் இருக்க வேண்டிய உறவுகள் தற்போது இல்லை என்றே கூறவேண்டும்.

தனித்துப் போட்டியிடும் முன்னர் முஸ்லிம் காங்கிரஸ் 10 வேட்பாளர்களைக் கேட்டது. நாங்கள் ஒன்பது வேட்பாளர்களைத் தருவதாகக் கூறினோம். அதனை விரும்பாது தனித்துச் சென்றனர். ஆனால் தற்போது அவர்களால் ஒன்பது ஆசனங்களைக் கூடப் பெற முடியுமா என்பது கேள்விக்குறியாக உள்ளது. ஆளும் ஐக்கிய மக்கள் சுதந்திர முன்னணியுடன் இணைந்து முஸ்லிம் காங்கிரஸ் போட்டி இட்டிருந்தால் அந்த ஒன்பது ஆசனங்களைப் பெற்றிருக்கலாம். ஆனால் இன்று நிலைமை மாறிவிட்டது' என பசில் ராஜபக்ச மேலும் தெரிவித்துள்ளார்.

ஆதாரம்: பொங்குதமிழ்

தேர்தல் முடியட்டும். பார்க்கலாம் இவரின் கருத்தினை.

கக்கீம்தான் காலில் விழுவது அல்ல காலுக்கு கீழ் செருப்பாக மாற வேண்டிய நிலை வரப்போகுது போல் இருக்கு.