ஸ்பெயினின் கற்றலோனியா - இலங்கையில் ஈழம்: ஒற்றுமையும், வேற்றுமையும்

ஸ்பெயினின் கற்றலோனியா - இலங்கையில் ஈழம்: ஒற்றுமையும், வேற்றுமையும் [ திங்கட்கிழமை, 10 டிசெம்பர் 2012, 09:04 GMT ] [ நித்தியபாரதி ]

 

சிறிலங்காவில் தொடர்ந்தும் அதிகாரத்துவம் அதிகரித்துச் செல்லுமாயின் இங்கு வாழும் சிறுபான்மை இனங்கள் மத்தியில் குறிப்பாக தமிழ் சமூகத்தினர் மத்தியில் பிரிவினைவாதமும் தொடர்ந்து கொண்டேயிருக்கும். இது விரைவில் இந்தியாவிலும் குழப்ப நிலையை உண்டாக்கும்.

இவ்வாறு பேராசிரியர் குமார்டேவிட் Colombo Telegraph [December 1, 2012] ஊடகத்தில் எழுதிய ஆய்வுக்கட்டுரையில் தெரிவித்துள்ளார். அதனை புதினப்பலகைக்காக மொழியாக்கம் செய்தவர் நித்தியபாரதி.

 

 

ஸ்பெயினின் கற்றலோனியாவில் [Catalonia] நவம்பர் 25 அன்று மாகாணங்களுக்கான தேர்தல்கள் இடம்பெற்றன. கற்றலோனியா, ஸ்பெயினின் ஆதிக்கத்திலிருந்து விடுபட்டு சுதந்திர தேசமாகப் பிரகடனப்படுத்துவதற்கும் ஐரோப்பிய ஒன்றியத்தில் தனிநாடாக அங்கீகரிப்பதற்கும் இங்கு சில ஆண்டுகளில் கருத்து வாக்கெடுப்பு நடாத்தப்பட வேண்டும் என கோரப்பட்டுள்ளது.

கற்றலோனியா எதிர்நோக்கும் பிரச்சினைகள் சில ஈழம் எதிர்நோக்கும் பிரச்சினைகளை ஒத்ததாகும். பிரிந்து செல்லல் விவகாரமானது உலகிலுள்ள எல்லாத் தரப்பினர்களையம் விழிப்புறச் செய்கிறது. ஈழத்தை ஒத்த சில எண்ணக்கருக்கள் இங்கு காணப்பட்டாலும், கற்றலோனியாவின் முழு எண்ணக்கருக்களும் ஈழத்தை ஒத்தது எனக் கூறமுடியாது. இங்கு பல வேறுபாடுகளும் காணப்படுகின்றன.

கற்றலோனியாவைப் பொறுத்தளவில் இங்கு உள்நாட்டு யுத்தம் என்பது காணப்படவில்லை. ஸ்பெயினில் வாழும் ஏனைய இனத்தவர்களுக்கும் கற்றலோனிய மக்களுக்கும் இடையில் விரோதம் நிலவவில்லை. இங்கு பயங்கரவாத நடவடிக்கைகளுக்கு இடமில்லை. தீவிரவாதம் என்பது இங்கு செயற்படவில்லை. கற்றலோனியாவில் இடம்பெறும் தேர்தல்களும் பரப்புரைகளும் நீதியான முறையிலும் அமைதியாகவும் நடாத்தப்படுகின்றன. இவை ஈழத்தை விட கற்றலோனியாவில் காணப்படும் மிகப்பெரிய வேறுபாடுகளாகும்.

கற்றலோனியாவை தனிநாடாக அங்கீகரிப்பது தொடர்பில் விவாதங்களும் பரப்புரைகளும் மேற்கொள்ளப்படுகின்றன. மாகாணத் தேர்தல்களை நடாத்துமாறு இரு ஆண்டுகளுக்கு முன்னர் கற்றலன் மாகாண பிரதமரும் கற்றலன் ஒருங்கிணைப்பு மற்றும் ஒற்றுமைக் கட்சியின் தலைவருமான Artur Mas கோரியிருந்தார். தனது மக்களிடம் இது தொடர்பில் கருத்து வாக்கெடுப்பு ஒன்றை நடாத்துவதற்கான ஆணையை வழங்குமாறு அவர் கேட்டுக்கொண்டார்.

ஸ்பெயினின் தலைநகரான மட்றிட்டில் செயற்படும் தேசிய அரசாங்கத்தின் பிரதமரான மரியானா றாஜொய் மற்றும் இவரது மக்கள் கட்சியால் அமுல்படுத்தப்படும் ஐரோப்பிய சங்கம் தொடர்பான கோட்பாடுகளை மாசின் கற்றலன் ஒருங்கிணைப்பு மற்றும் ஒற்றுமைக் கட்சியானது எதிர்ப்பின்றி ஏற்றுக் கொண்டுள்ளது.

மாசின் இவ்வாறான நடவடிக்கைகள் சரியான நேரத்தில் வெற்றியளிக்கத் தவறுகிறது. கருத்துவாக்கெடுப்பு தொடர்பில் பெரும்பான்மையினரின் ஆதரவில் மேற்கொள்ளும் ஏமாற்றுத்தனமான நடவடிக்கையானது மாசுக்கான ஆதரவு வாக்கை குறைத்துள்ளது. அதாவது கற்றலோனிய மாநிலத்தின் நாடாளுமன்ற அவையில் காணப்படும் 135 ஆசனங்களில் முன்னர் 62 ஆசனங்களைக் கைப்பற்றியிருந்த மாசின் கட்சியானது தற்போது 50 ஆசனங்களை மட்டுமே பெற்றுக் கொண்டுள்ளது.

இத்தேர்தலில் இடதுசாரிக் கட்சியும், தீவிர பிரிவினைவாத கட்சியுமான தேசிய குடியரசு இடதுசாரிக் கட்சியானது மாசின் கட்சியின் தோல்வியை சாதகமாகப் பயன்படுத்தி 21 ஆசனங்களைப் பெற்றுக் கொண்டுள்ளது. இது முன்னர் 10 ஆசனங்களை மட்டுமே பெற்றிருந்தது. இத்தேர்தலில் போட்டியிட்ட கருத்துவாக்கெடுப்பை ஆதரிக்கும் நான்கு கட்சிகளும் மூன்றில் இரண்டு அறுதிப் பெரும்பான்மையை அடைந்து கொள்வதாயின் இவை நான்கும் பிரிந்து செல்லல் என்கின்ற பொதுவான நிகழ்ச்சித் திட்டத்தை தமது நோக்காகக் கொண்டு தமக்கிடையே ஒன்று சேரவேண்டும். இத்தேர்தலில் திரு.மாஸ் முன்னரை விட ஆதரவை இழந்துள்ளார். இவரால் கருத்துவாக்கெடுப்பு ஒன்றை நடாத்துதல் அல்லது தனிநாட்டுக் கோரக்கையை முன்வைப்பதில் தலைமை தாங்க முடியாது.

தற்போது நடந்து முடிந்த மாகாணத் தேர்தல்களில் இரு தேசியக் கட்சிகளும் போட்டியிட்டன. அதாவது சமவுடமைக் கட்சி 20 ஆசனங்களையும் ஸ்பெயின் பிரதமரின் மக்கள் கட்சியானது 10 ஆசனங்களையும் வென்றுள்ளன. இந்நிலையில் கருத்து வாக்கெடுப்பு ஒன்று நடாத்தப்பட்டு கற்றலோனியா தனிநாடாக அங்கீகரிக்கப்பட வேண்டும் எனக் கோரும் கட்சிகள் தமக்கிடையே ஒன்று சேரும் போதே இவற்றின் நோக்கத்தை மேலும் பலப்படுத்த முடியும்.

இதேபோன்றே சிறிலங்காவை எடுத்துக் கொண்டால், சிறிலங்காவின் வடக்கு மாகாணத்தில் சுதந்திரமான நீதியான தேர்தல் நடாத்தப்படுவதற்கான அனுமதியை ராஜபக்சாக்கள் வழங்குவார்களா? கற்றலோனிய பிரதமர் மாசின் கட்சியைப் போல சிறிலங்காவிலும் தமிழ்த் தேசியக் கூட்டமைப்பானது தமிழ் மக்களின் பெரும்பான்மை ஆதரவைப் பெற்ற கட்சியாகத் திகழ்கிறது. சிறிலங்காவில் இராணுவ ஆதிக்கமும் ராஜபக்ச அரசாங்கத்தின் அதிகாரமும் அதிகரித்துக் கொண்டு செல்கின்றது. இதுவே தமிழ் மக்கள் எதிர்நோக்கும் முதன்மையான பிரச்சினையாகக் காணப்படுகிறது.

ஆனால் கற்றலோனியாவின் பிரதான பிரச்சினையானது இன,மொழி போன்ற அடையாளங்களை விட பொருளாதாரத்தை அடிப்படையாகக் கொண்டது. கற்றலன்கள் ஸ்பானிய மொழியையும் பேசுகிறார்கள். கத்தோலிக்க மதத்தையும் பின்பற்றுகிறார்கள். இவர்கள் ஒரே கலாசாரத்தை பின்பற்றும் மக்கள் கூட்டமாக காணப்படுகிறார்கள். கற்றலோனியாவானது நில அளவில் சிறிலங்காவின் அரைவாசியாகும். இதன் சனத்தொகை 7.5 மில்லியன் ஆகும்.

ஆனால் சிறிலங்காவின் மொத்த தேசிய வருமானம் 60 பில்லியன் டொலர்களாக காணப்படும் அதேவேளை கற்றலோனியாவின் மொத்த தேசிய வருமானமானது 320 பில்லியன் டொலர்களாகும். கற்றலோனியா, ஸ்பெயினின் தேசிய அரசாங்கத்திற்கு வரியாகவும் வருமான வரியாகவும் 21பில்லியன் டொலர்களை செலுத்துவதும் குறிப்பிடத்தக்கதே. பொருளாதாரத்தை மையமாகக் கொண்டே கற்றலோனியா, ஸ்பெயினிலிருந்து பிரிந்து செல்ல வேண்டும் என விவாதிக்கப்படுகிறதே தவிர, இதற்கென வேறெந்த வரலாற்று ரீதியான, அடையாளங்களைப் பாதுகாக்கின்ற நோக்கில் இது பிரிந்து செல்ல முடியாது. இனிவருங் காலங்களில் இதன் பொருளாதாரம் ஏற்றம் கண்டால் இந்த நிலைமை மாறலாம்.

"அடுத்த நான்கு ஆண்டுகளில் நான் மக்களுடன் கலந்துரையாடி இது தொடர்பில் முடிவெடுப்பேன்" என மாஸ் அறிவித்திருந்த போதிலும், இவரது கலந்தாலோசனையின் முடிவானது பயனற்றதாகவே காணப்படும். "நாங்கள் ஸ்பெயினின் மாகாணமாக இல்லாது ஐரோப்பிய ஒன்றியத்தில் தனிநாடாக அங்கம் பெறவேண்டும். இதுவே சிறந்த தெரிவாகும்" என பொதுமகன் ஒருவர் தெரிவித்திருந்தார்.

இவரைப் போலவே கற்றலோனியாவில் வாழ்கின்ற மக்களில் பெரும்பாலானவர்கள் தமக்கான தனிநாடு அங்கீகரிக்கப்பட வேண்டும் என விரும்புகின்றனர். இதனை அவர்கள் கடந்த வாரம் நடந்து முடிந்த தேர்தலில் தமது ஆணையாக வழங்கியுள்ளனர். ஐரோப்பிய ஒன்றியம் மற்றும் அனைத்துலக நாணய நிதியம் போன்றவற்றின் நிலைப்பாட்டைப் பார்க்கும் போது கற்றலோனியா தனிநாடாக அங்கீகரிக்கப்படுவதென்பது சாத்தியமாகதது போல் தோன்றுகின்றது. இதேவேளை ஏற்கனவே கற்றலன் உற்பத்திகளை புறக்கணிப்பதற்கான முயற்சிகள் முன்னெடுக்கப்படுகின்றன.

கற்றலன் மற்றும் ஸ்கொட்லாந்து ஆகியன ஜனநாயக வழியில் தமது பிரச்சினைகளை ஆராய்கின்றன. அரசியல் கட்டமைப்புக்களை அடிப்படையாகக் கொண்டு இவை கையாளப்படுகின்றன. அத்துடன் இங்கு பயங்கரவாதம் என்பது நடைமுறையிலில்லை. ஆனால் சிறிலங்காவானது இதிலிருந்து வேறுபட்டது.

சிறிலங்காவானது ஜனநாயக விதிமுறைகளை மீறி சிங்கள-பௌத்த தேசம் என்பதை அடிப்படையாகக் கொண்டு ஆளப்படுகின்றது. இங்கு பயங்கரவாத நடவடிக்கைகள் மேற்கொள்ளப்படுவதுடன், நீண்ட பத்தாண்டுகளாக உள்நாட்டு யுத்தம் ஒன்றும் இடம்பெற்றது. அதிகாரம் என்பது ராஜபக்சாக்களின் கைககளில் குவிந்துள்ளது.

சிறிலங்காவின் பிரதம நீதியரசர் மீதான நம்பிக்கையில்லாப் பிரேரணை மற்றும் அவர் மீதான விசாரணையை சந்தர்ப்பமாகக் கொண்டு சிறிலங்காவில் நிலவும் அதிகார ஆட்சி முடிவுக்கு கொண்டு வரப்பட வேண்டும். நான் இங்கு ஏற்கனவே குறிப்பிட்டது போன்று கற்றலான் மற்றும் ஈழம் ஆகிய இரண்டும் பெற்றுக்கொண்டுள்ள அனுபவங்கள் ஒத்தவையாகும். ஆனால் அடிப்படையில் இவை இரண்டினதும் கருத்தாக்கங்கள், இனம் மற்றும் வரலாற்று அடையாளங்கள் என்பன வேறுபட்டவை.

சிறிலங்காவில் தொடர்ந்தும் அதிகாரத்துவம் அதிகரித்துச் செல்லுமாயின் இங்கு வாழும் சிறுபான்மை இனங்கள் மத்தியில் குறிப்பாக தமிழ் சமூகத்தினர் மத்தியில் பிரிவினைவாதமும் தொடர்ந்து கொண்டேயிருக்கும். இது விரைவில் இந்தியாவிலும் குழப்ப நிலையை உண்டாக்கும்.

 

http://www.puthinappalakai.com/view.php?20121210107424