திவிநெகும சட்டத்தின் மூலம் தமிழர்களை அழிக்கத் திட்டம்: சுமந்திரன் குற்றச்சாட்டு

[கலையழகன்]

மாகாண சபைகளுக்கு வழங்கப்பட்டுள்ள பிரதான 15 அதிகாரங்கள் திவிநெகும சட்டத்தின் மூலம் பலவந்தமாகப் பறிக்கப்பட்டுள்ளன. மாகாண அதிகாரங்களை பறித்தெடுக்கின்ற இந்தச் சட்டமூலத்தின் மூலம் தமிழ் மக்களை வாழ்நாள் முழுவதும் ஏமாற்றி அவர்களை அழித்துவிட அரசு திட்டம் தீட்டிவிட்டது என தமிழ்த் தேசியக் கூட்டமைப்பு தெரிவித்துள்ளது.

கூட்டமைப்பின் நாடாளுமன்ற உறுப்பினர் சுமந்திரன், ஸ்ரீலங்கா நாடாளுமன்றில் நேற்றையதினம் இடம்பெற்ற திவிநெகும திருத்தச் சட்டமூலத்தின் இரண்டாம் வாசிப்பு மீதான விவாதத்தில் கலந்துகொண்டு உரையாற்றியபோதே இவ்வாறு குற்றம்சாட்டினார்.

இது தொடர்பில் நாடாளுமன்ற உறுப்பினர் சுமந்திரன் மேலும் தெரிவித்ததாவது:

அதிகூடிய அதிகாரப் பகிர்வை அளிப்போம், 13வது திருத்தச் சட்டத்திற்கும் அப்பாற்சென்று அதிகாரப்பகிர்வை அர்த்த புஷ்டியாக்குவோம் என்று கூறிய ஜனாதிபதியின் வாக்குறுதிகளுக்கு எதிராகவே இந்த திவிநெகும சட்டவரைவு ஏற்படுத்தப்பட்டுள்ளது.

இன்று சமுர்த்தி உத்தியோகத்தர்களை சபைக்கு அழைத்துவந்து நாம் அவர்களுக்கு நிரந்தர நியமனம் வழங்கப்படுவதை எதிர்ப்பதுபோல் காட்ட முனைகின்றனர். சமுர்த்தி உத்தியோகத்தர்களை ஓய்வூதியம் பெறக்கூடிய அரச ஊழியர்களாக உள்வாங்கப்படுவதை நாங்கள் ஆதரிக்கின்றோம். இதனை ஒரு சாதாரண சட்டத்தின் மூலம் செய்திருக்க முடியும்தானே. ஏன் அதை இனிப்பை பூசிய கசப்பான திவிநெகும சட்டத்தின் மூலம் செய்யவேண்டும்?

13 வது திருத்தச் சட்டம் வெறும் எழுத்திலான அரைகுறைச் சட்டம். அச்சட்டம்  அரைகுறையாகவேனும் மாகாணசபைகளுக்கு அதிகாரங்களை வழங்கியுள்ளது. அப்படி வழங்கியுள்ள அதிகாரங்களில் 15 விடயங்களை திவிநெகும சட்டம் பலவந்தமாகப் பறித்துள்ளது.

நாட்டின் அபிவிருத்தியையும், வறுமை ஒழிப்பினையும் மாகாணசபைகள் மூலம் செய்யக்கூடாதா? அதற்கு ஏன் தடைபோடுகின்றீர்கள்? திவிநெகும சட்ட வரைவு தொடர்பாக உயர்நீதிமன்றம் இரண்டு தீர்ப்புகளை வழங்கியுள்ளது. ஆனால், இவற்றை நீங்கள் உதாசீனம் செய்துவிட்டீர்கள்.

அமைச்சர் டக்ளஸ் தேவானந்தா இரண்டு நாட்களும் நீதிமன்றத்தில் வந்து அமர்ந்திருந்தார். அவருக்கு என்ன விளங்கியதோ தெரியவில்லை. இங்கு வந்து யாரோ எழுதிக் கொடுத்ததை அப்படியே வாசிக்கின்றார். சட்டமூலம் தொடர்பாக பேசாமல் தமிழ்த் தேசியக் கூட்டமைப்பின் மீது வசைபாடுகிறார்.

நாம் எமது அபிலாஷைகள் தொடர்பாக பேசுகின்றோம். அரசியல் அதிகாரம் பகிரப்படவேண்டும். நாமும் எமது பிரதேசங்களில் ஏனைய சமூகங்களைப் போன்று சமமான அரசியல் அதிகாரங்களுடன் வாழ விரும்புகின்றோம். இது தவறில்லையே.

நீதியமைச்சர் ரவூப் ஹக்கீம் 18வது அரசமைப்புக்கு ஆரதவளித்து அமைச்சரானபோது இந்தச் சபையில் கூறியதை நினைவுபடுத்த விரும்புகின்றேன். தமிழ்த் தேசியக் கூட்டமைப்பு அரசுக்கு வெளியே இருந்தும், முஸ்லிம் காங்கிரஸ் அரசுடன் இருந்தும் அதிகாரப் பகிர்வை பெற முயற்சிப்போம் என்று கூறினார். ஆனால், இன்று இவருடைய நிலைப்பாடு என்ன என்பதை அறிய விரும்புகின்றேன்.

திவிநெகும சட்டமூலத்தை தனிப்பட்ட முறையில் தமிழ்த் தேசியக் கூட்டமைப்பு மட்டும் எதிர்க்கவில்லை. இதனை எதிர்த்து பெரும்பான்மை இனத்தைச் சேர்ந்த பல புத்திஜீவிகள் கையெழுத்திட்டு அனுப்பியுள்ள கடிதம் ஆங்கில பத்திரிகைகளில் வெளிவந்துள்ளன.

எம்மை விமர்சிக்கும் அமைச்சர் டக்ளஸ், யாரைக் கொண்டாவது அதனை வாசித்து தெளிவுபெற வேண்டும் என சுமந்திரன் தனதுரையில் தெரிவித்தார்.

அப்போது பிரதியமைச்சர் முரளிதரன் (கருணா) ஏதோ கூறினார்.

உங்களுக்கு எதுவுமே தெரியாது. அமைச்சர் பதவியை காப்பாற்றிக் கொள்வதற்கு சும்மா கொக்கரிக்க வேண்டாம் என்று பதிலடி கொடுத்தார் சுமந்திரன்.

இவ்விவாதத்தில் தமிழ்த் தேசியக் கூட்டமைப்பின் நாடாளுமன்ற உறுப்பினர் சுரேஷ் பிரேமச்சந்திரனும் கலந்துகொண்டு உரையாற்றினார்.

 

http://tamilleader.com/mukiaya/8553-2013-01-09-02-06-33.html

[மல்லையூரன்]

சரிதான் போ! பூராயம் இதை கொண்டுவந்து பதிகிறார். கூட்டமைப்பு வீடுகளில் எல்லாம் அடை மழை பெய்ய போகிறது.

 

 

 

அமைச்சர் டக்ளஸ் தேவானந்தா இரண்டு நாட்களும் நீதிமன்றத்தில் வந்து அமர்ந்திருந்தார். அவருக்கு என்ன விளங்கியதோ தெரியவில்லை. இங்கு வந்து யாரோ எழுதிக் கொடுத்ததை அப்படியே வாசிக்கின்றார். சட்டமூலம் தொடர்பாக பேசாமல் தமிழ்த் தேசியக் கூட்டமைப்பின் மீது வசைபாடுகிறார்.

பாவம் இரண்டு நாள் அலைய வேண்டி வந்துவிட்டது. என்றைக்கு வாக்களிப்பு என்று யாரும் முதலிலேயே சொல்லிக்கொடுக்கவில்லை போலும்.

 

 

 

எம்மை விமர்சிக்கும் அமைச்சர் டக்ளஸ், யாரைக் கொண்டாவது அதனை வாசித்து தெளிவுபெற வேண்டும் என சுமந்திரன் தனதுரையில் தெரிவித்தார்.

அப்போது பிரதியமைச்சர் முரளிதரன் (கருணா) ஏதோ கூறினார்.

உங்களுக்கு எதுவுமே தெரியாது. அமைச்சர் பதவியை காப்பாற்றிக் கொள்வதற்கு சும்மா கொக்கரிக்க வேண்டாம் என்று பதிலடி கொடுத்தார் சுமந்திரன்.