வட கலிங்கத்தின் மீது  முதலாம் குலோத்துங்க சோழனின் படைத்தலைவன் கருணாகரத் தொண்டைமான் படையெடுத்துச் சென்று பெறுவெற்றி கொள்கிறான். அவன் போரில் ஆயிரம் யானைகளை கொன்று, வென்ற செய்தியை  செயங்கொண்டார் என்னும் புலவர் கலிங்கத்துப் பரணியில் பாடுகிறார். பரணி என்பது போரில் ஆயிரம் யானைகளை வென்ற வீரனைப் பாடும் சிற்றிலக்கிய நூலாகும்.
 
இந்நூலில் பல பகுதிகளில் ஒன்றான "கடை திறப்பு"  பகுதியில், கலிங்கத்தின் மேல் போர்தொடுத்துச் சென்ற வீரர்கள் வீடு திரும்ப தாமதம் ஆனதால் அதனைக் கண்டு மகளிர் ஊடல் கொண்டு கதவை அடைத்ததாகவும், அப்பெண்கள் மகிழுமாறும் புலவி நீங்கிக் கதவைத் திறக்கச் செய்ய, தாம் வெற்றி பெற்ற கலிங்கப்போர் பற்றி பாடுவதாக அமைந்தது. இந்தப் போர் பற்றி அறிய இங்கே செல்லவும் www.tamilvu.org/courses/degree/c012/c0124/html/c01241l2.htm

இந்தக் கடை திறப்பு பகுதியில் காதல்/காம சுவை ததும்பும் பாடல்கள் கொட்டி கிடக்கின்றன. பரணிக்கு ஒரு செயங்  கொண்டான் என்று எல்லாப் புலவரும் பாடுவது இதனாலோ !!  கடல் போன்ற அந்தச் சுவையில் சில துளிகள் உங்களுக்காக....

விடுமின் எங்கள்துகில் விடுமின் என்றுமுனி
  வெகுளி மென் குதலை துகிலினைப்
பிடிமின் என்றபொருள் விளைய நின்றருள்செய்
   பெடைந லீர்கடைகள் திறமினோ !!

மனைவி கணவனுடன் ஊடல் கொண்டிருக்கிறாள். ஊடல் தணிக்க கணவன் அவளது ஆடையை ஆசையாய் பற்றுகிறான்.  அவளோ ஊடலால் கொண்ட சினத்தால் தனது மழலை மொழியில் என் ஆடையைப் தொடாதீர்கள், என் ஆடையைப் தொடாதீர்கள் என்று சொல்லி அந்த இடத்தை விட்டு அகலாமல் நிற்கிறாள். அப்படி அவள் சொல்வது என் ஆடையைப் பிடியுங்கள் பிடியுங்கள் என்று சொல்வது போல் உள்ளதாம்!!

தழுவுங் கொழுநர் பிழைநலியத்
     தழுவேல் என்னத் தழுவியகை
வழுவ உடனே மயங்கிடுவீர்
   மணிப்பொற் கபாடம் திறமினோ.

ஊடல் கொண்ட மனைவியை தழுவ விழைகிறான் கணவன். அவளோ ஊடல் கொண்ட கோபத்தால், அவன் மனம் வருந்த என்னைத் தழுவ முயலாதீர்கள் என ஏசி விடுகிறாள். கணவன் அவள் கோபத்திற்கு ஆளாக வேண்டாம் என்று தழுவியதை நழுவ விடுகிறான்.  அவன் கை நழுவியதும்   புணர்ச்சி வேட்கை கொண்ட மனைவி இனிமேல் தொட மாட்டாரா என மனம்  வருந்துகிறாள்.

மெய்யே கொழுநர் பிழைநலிய
 வேட்கை நலிய விடியளவும்
பொய்யே உறங்கும் மடநல்லீர்
 புனைபொற் கபாடம் திறமினோ.

மனைவியிடம் ஊடல் கொண்டதனால் கணவன் தூக்கம் கெட்டு மனம் வருந்துகிறாள். மனைவியோ அவன் மேல் கொண்ட புணர்ச்சி ஆசையால் விடிய விடிய தூக்கம் கொள்ளாமல் தூங்குவது போல் நடிக்கிறாள்.

சொருகு கொந்தளகம் ஒருகை மேலலைய
    ஒருகை கீழலைசெய் துகிலொடே
திருவ னந்தலினும் முகம லர்ந்துவரு
   தெரிவை மீர்கடைகள் திறமினோ.

மனைவி தூக்கலித்திருக்கிறாள். போர் முடிந்து திரும்பிய கணவன்  கதவை தட்டுகிறான். தூக்கதிலிருந்த எழுந்த அவளது முகம் நிலவு போல் முகிழ்ந்திருக்க, ஒரு கை  அவளது உலைந்த கூந்தலை சரிசெய்ய, மற்றொரு கையோ அவளது உலைந்த துகிலை(ஆடையை) சரிசெய்ய செல்லுமாம்.

இந்தப் பாடல்கள் எல்லாம் சும்மா...  மற்ற பாடல்களின் விளக்கங்களை எல்லாம் பேசாப் பொருள் பகுதியில் தான் போட வேண்டும். கீழே உள்ள பாடல்களின் சுவையை நீங்களே உணர்ந்து கொள்ளுங்கள் .

 செருவிள நீர்பட வெம்முலைச்
   செவ்விள நீர்படு சேயரிக்
கருவிள நீர்பட ஊடுவீர்
   கனகநெ டுங்கடை திறமினோ

உந்திச் சுழியின் முளைத்தெழுந்த
    உரோமப் பசுந்தாள் ஒன்றில் இரண்டு
அந்திக் கமலங் கொடுவருவீர்
   அம்பொற் கபாடம் திறமினோ.

 

Edited January 16, 201312 yr by ஆதித்ய இளம்பிறையன்

கவனம் ஆதித்தியன் ஒரேயடியாக இலக்கியக் கடலில் மூழ்கிவிடப் போகிறீர்கள்.

இலக்கியக் கடலில் மூழ்கி திளைக்க வேண்டும் என்பதே என் அவா.  மூழ்கினாலும் மீண்டு விடலாம் என்று எண்ணுகிறேன் ..