தலிபான் பயங்கரவாதிகள் விடுத்த கொலை மிரட்டலை புறக்கணித்து விட்டு பாகிஸ்தான் திரும்பியுள்ளார் அந்நாட்டின் முன்னாள் அதிபர் பர்வேஸ் முஷாரப்.

 

 

துபையில் இருந்து விமானம் மூலம் கராச்சி நகருக்கு ஞாயிற்றுக்கிழமை அவர் வந்தார்.

பாகிஸ்தானில் மே 11-ம் தேதி நாடாளுமன்றத் தேர்தல் நடைபெறவுள்ளது. இதனை முன்னிட்டு, சுமார் 4 ஆண்டுகளுக்குப் பின் அவர் நாடு திரும்பியுள்ளார்.

 

கொலை மிரட்டலை மீறி... முஷாரப், பாகிஸ்தானுக்கு வந்தால் அவர் மீது தற்கொலைப் படை தாக்குதல் நடத்துவோம் என்று  தெஹ்ரிக்-இ-தலிபான் பயங்கரவாதிகள் பகிரங்கமாக எச்சரிக்கை விடுத்தனர். எனினும் அதனைப் பொருட்படுத்தாமல் முஷாரப், நாடு திரும்பியுள்ளார். ஆதரவாளர்கள், பத்திரிகையாளர்கள் என சுமார் 150 பேர் அவருடன் வந்துள்ளனர்.

 

உற்சாக வரவேற்பு: விமான நிலையத்துக்கு வெளியே பெண்கள், குழந்தைகள் என ஏராளமான ஆதரவாளர்கள் கூடியிருந்தனர். அவர்கள் முஷாரபை வரவேற்றும், வாழ்த்துத் தெரிவித்தும் கோஷம் எழுப்பினர்.

 

 

காத்திருக்கும் வழக்குகள்: முன்னதாக பாகிஸ்தான் அதிபர் பதவியில் இருந்து விலகியதை 2009-ம் ஆண்டில் அடுத்து அவராகவே பாகிஸ்தானில் இருந்து வெளியேறி லண்டனுக்குச் சென்றார். பேநசீர் புட்டோ கொலை வழக்கு, 2007-ம் ஆண்டில் பாகிஸ்தானில் அவசர நிலையை அமல்படுத்தியது உள்பட பல்வேறு வழக்குகளும் முஷாரப் மீது உள்ளன. பாகிஸ்தானின் முன்னாள் ராணுவ தலைமை தளபதியான முஷாரப் அந்நாட்டின் சர்வாதிகாரியாக முன்பு ஆட்சியில் இருந்தார்.

 

எதையும் சந்திக்க தயார்: துபையில் இருந்து பாகிஸ்தான் புறப்பட்டவுடன் உற்சாகமாக பல கருத்துகளை தனது டுவிட்டர் பக்கத்தில் முஷாரப் பகிர்ந்து கொண்டுள்ளார். அதில், பாகிஸ்தானில் பயங்கரவாதமும், அடிப்படைவாதமும் ஒழிக்கப்பட வேண்டும் என்று குறிப்பிட்டுள்ளார்.

 

 

கைது செய்யப்படாமல் இருக்க நீதிமன்றத்தில் முன் ஜாமீன் பெற்றே நாடு திரும்பியுள்ளார்.

நெகிழ்ச்சியான தருணம்: விமானத்திலும் செய்தியாளர்களின் கேள்விக்கு முஷாரப் பதிலளித்தார். அப்போது, பாகிஸ்தானில் பல்வேறு சவால்களை எதிர்கொள்ள வேண்டியுள்ளது. பாதுகாப்புக்கு அச்சுறுத்தல், அரசியல் பிரச்னைகள், வழக்குகள் என பல பிரச்னைகள் உள்ளன. எனினும் அவை அனைத்தையும் சந்திப்பேன். தாய் நாட்டுக்கு மீண்டும் திரும்பி வருவது நெகிழ்ச்சியான தருணம் என்றார்.

 

 

கராச்சியில் முஷாரப் பங்கேற்க இருந்த பொதுக்கூட்டத்துக்கு வழங்கிய அனுமதியை பாகிஸ்தான் போலீஸ் அதிகாரிகள் திடீரென ரத்து செய்துவிட்டனர். முஷாரப் உயிருக்கு அச்சுறுத்தல் இருப்பதால் பொதுகூட்டத்துக்கான அனுமதியை ரத்து செய்ததாக போலீஸ் தரப்பில் தெரிவிக்கப்பட்டது.

தீவிர அரசியல்: தலைநகர் இஸ்லாமாபாத் செல்லும் முன்னர் சில நாள்களுக்கு கராச்சியில் அவர் தங்க இருக்கிறார். அதன் பின்னர் அவரது அரசியல் நடவடிக்கைகள் தீவிரமடையும் என்று முஷாரபின் கட்சியினர் தெரிவித்துள்ளனர்.

 

 

ராணுவ ஆட்சியாளர், அதிபர் என்ற பொறுப்புகளில் 1999 முதல் 2008-ம் ஆண்டு வரை பாகிஸ்தானை முஷாரப் தனது பிடியில் வைத்திருந்தார். அக்கால கட்டத்தில் அவரை கொலை செய்ய மூன்று முறை பயங்கரவாதிகள் முயற்சி மேற்கொண்டனர்.

 

http://dinamani.com/world/article1515928.ece