'சூது கவ்வும்': இலங்கையில் சூதாட்ட முதலீடும் மதகுருமாரின் எதிர்ப்பும்

ஆஸ்திரேலியாவின் பிரபல க்ரவுன் கஸினோ நிறுவனம் இலங்கையில் ஆடம்பர கஸினோ நட்சத்திர விடுதியை திறக்கும் தனது திட்டத்தை முதற்தடவையாக வெளிப்படுத்தியுள்ளது.

சுமார் 40 கோடி டாலர்கள் செலவில் இலங்கையில் ஐந்து நட்சத்திர கஸினோ சூதாட்ட விடுதியை திறக்கும் தனது திட்டம் பற்றி க்ரவுன் கஸினோ நிறுவனத்தின் உரிமையாளர் ஜேம்ஸ் பாக்கர் ஆஸ்திரேலிய பங்கு பரிவர்த்தனைச் சந்தைக்கு அறிவித்துள்ளதாக ஆஸ்திரேலிய ஊடகங்கள் தெரிவித்துள்ளன.

இலங்கை அரசாங்கம் வரிவிலக்கு உள்ளிட்ட சலுகைகளை வழங்கும் பட்சத்தில் தனது வேலைத்திட்டத்தை தொடங்கவுள்ளதாக ஜேம்ஸ் பாக்கர் கூறியுள்ளார்.

தலைநகர் கொழும்பின் மத்தியில் அமையவுள்ள இந்த பெரும் செயற்திட்டத்திற்கான முதலீட்டை ஈர்க்கும் வகையில் இலங்கை அரசாங்கமும் பல வகைகளிலும் ஜேம்ஸ் பாக்கரின்

க்ரவுன் நிறுவனத்துக்கு வசதிகளை வழங்கக்கூடிய விதத்தில் சட்ட ஏற்பாடுகளைக் கொண்டுவரும் நடவடிக்கையில் இறங்கியுள்ளது.

உள்நாட்டுப் போர் முடிந்து 4 1/2 ஆண்டுகளாகும் சூழ்நிலையில் இலங்கை அரசு வெளிநாட்டு சுற்றுலாப் பயணிகளை ஈர்க்கும் வேலைத்திட்டங்களை முன்னெடுத்துவருகிறது.

அங்கு இந்த ஆண்டு ஒரு மில்லியன் வரை அதிகரித்த சுற்றுலாப் பயணிகளின் வருகையை 2016-ம் ஆண்டளவில் இரண்டரை மில்லியனாக அதிகரிக்கும் வேலைத்திட்டத்தில் சுற்றுலாத்துறை ஈடுபட்டுள்ளது.

சீனாவின் மெக்கோவ் தீவு, ஒஸ்ட்ரேலியாவின் மெல்பர்ன், பேர்த் ஆகிய நகரங்களில் ஏற்கனவே கஸினோ சூதாட்ட மையங்களை நடத்திவரும் ஜேம்ஸ் பாக்கர், அடுத்து பிலிப்பைன்ஸின் மனிலாவிலும் சூதாட்ட கட்டடத்தை திறக்கவுள்ளார்.

இலங்கையின் எதிர்கால பொருளாதார முன்னேற்றத்தில் நம்பிக்கை வைத்து இந்த முதலீட்டில் இறங்கியுள்ளதாக ஜேம்ஸ் பாக்கர் கூறுகிறார்.

'சூது கவ்வும்': மதகுருமார் எதிர்ப்பு

ஆனால், இலங்கையில் சூதாட்ட நிலையத்தை திறக்க அரசாங்கமே சட்ட ஏற்பாடுகளைக் கொண்டுவருவதா என்று பௌத்த பீடங்களின் தலைவர்களின் முன்னெடுப்பில் சர்வமதத் தலைவர்களின் சம்மேளனம் எதிர்க்கத் தொடங்கியிருக்கிறது.

இலங்கையில் சூதாட்டத்திற்கு அரசாங்கம் சட்ட ரீதியான சலுகைகளை வழங்கக்கூடாது என்ற தங்களின் நிலைப்பாட்டை அரசின் உயர்மட்டத்திடம் கொண்டுசெல்லும் வேலையில் ஈடுபட்டுள்ளதாக சர்வமத சம்மேளனத்தின் உப தலைவர் பிரம்மஸ்ரீ எஸ். குகானந்த சர்மா பிபிசி தமிழோசையிடம் தெரிவித்தார்.

சூதாட்டத்தின் மூலம் ஈட்டப்படும் பணம் இலங்கை மக்களின் முன்னேற்றத்துக்கு உதவாது என்பதே சர்வமதத் தலைவர்கள் சம்மேளனத்தின் நிலைப்பாடு என்றும் அவர் கூறினார்.

ஜேம்ஸ் பாக்கரின் சூதாட்ட நிலைய முதலீட்டுக்கு 10 ஆண்டு காலத்துக்கு வரிவிலக்கு அளிக்கும் அரசின் திட்டத்துக்கு அமைச்சரவை ஒப்புதல் அளித்துள்ளதாக இலங்கை அதிகாரி ஒருவர் கடந்த மாதம் அறிவித்திருந்தமை குறிப்பிடத்தக்கது.

http://www.bbc.co.uk/tamil/sri_lanka/2013/10/131018_casinosrilanka.shtml