சிறிலங்கா இராணுவத்துடன் சேர்ந்தியங்கும் துணை ஆயுதக்குழுவினரால் தமிழர் புனர்வாழ்வுக் கழகத்தின் யாழ். கிளை அலுவலகம் நேற்று இரவு ஊரடங்குச் சட்டம் அமுலில் இருந்தவேளை அடித்து நொறுக்கி எரியூட்டப்பட்டுள்ளது.

நேற்று புதன்கிழமை இரவு 11 மணியளவில் அலுவலக வளாகத்திற்குள் புகுந்த சுமார் ஆறு ஆயுதபாணிகள் அங்கு கடமையிலிருந்த காவலாளியை மிரட்டி வெளியேற்றிவிட்டு அலுவலகத்திற்குள் புகுந்து அங்கிருந்த கணனிகள், உபகரணகங்கள், ஆவணங்கள், தரவுகள் ஆகியவற்றை அடித்து நொறுக்கியுள்ளன. சுமார் இரண்டு மணிநேரமாக அலுவலகத்தின் அனைத்து பொருட்களையும் அழித்து நாசமாக்கிவிட்டு இறுதியில் எரியூட்டிவிட்டு சென்றுள்ளனர்.

அலுவலகம் எரிவதைக் கண்ட அருகாமையில் உள்ள இன்னொரு அரச சார்பற்ற அமைப்பு அலுவலகத்தினர் தீயணைப்பு படைக்கு அறிவித்ததை அடுத்து அவர்கள் விரைந்து வந்து அலுவலக தீயை அணைத்து, முழுமையான சேதத்தை தவிர்த்தனர்.

அலுவலகத்தின் சேத மதிப்பீடு சுமார் 10 லட்சம் ரூபாவுக்கு கூடுதலாகும் என்று தமிழர் புனர்வாழ்வுக் கழக அலுவலகத்தினர் தெரிவித்துள்ளனர்.

யாழ்ப்பாணம் கோயில் வீதியில் அமைந்துள்ள இந்த அலுவலகத்தை சூழ சர்வதேச தொண்டு அமைப்புக்கள் பலவற்றினதும் அலுவலகங்கள் உள்ளன. தமிழர் புனர் வாழ்வுக்கழக அலுவலகத்துக்கு நேர் எதிராக ஐக்கிய நாடுகள் சபையின் உத்தியோகபூர்வ வாசஸ்தலமும் அருகில் அகதிகளுக்கான ஐக்கிய நாடுகள் அமைப்பு அலுவலகம், சிறுவர் பாதுகாப்புக்கான ஐக்கிய நாடுகள் அமைப்பு அலுவலகம், ஐக்கிய நாடுகள் அபிவிருத்தி அமைப்பு அலுவலகம் மற்றும் சர்வதேச அமைப்பு அலுவலகங்களும் உள்ளன.

தமிழர் புனர்வாழ்வுக்கழக அலுவலகத்திலிருந்து சுமார் 200 மீற்றர் தொலைவில் கைலாசபதி பிள்ளையார் கோயிலடியில் சிறிலங்கா இராணுவத்தினரின் காவலரண் உள்ளது.

கடந்த ஜூலை 15 ஆம் திகதியும் மேற்படி அலுவலகம் ஆயுதப்படையினரின் தாக்குதலுக்குள்ளாகியமை குறிப்பிடத்தக்கது.

puthinam.com

அப்பாவி மக்களுக்கும் அடி...

அவைக்கு உதவுறவைக்கும் அடி...

இதுக்கெல்லாம்..வட்டி குட்டியா வேண்டேக்கில.....

இருக்கடியேய்.............